ლუკა ლაკვეხელიანი: ახალგაზრდულში მიწვევა ჩემთვის მნიშვნელოვანია

"საბურთალოს" ფეხბურთელი ლუკა ლაკვეხელიანი საქართველოს 17 და 19-წლამდელთა ასაკობრივი ნაკრების წევრი გახლდათ, ახლა კი მარცხენა მცველი გია ცეცაძემ ახალგაზრდულ ნაკრებში მიიწვია და ფეხბურთელი დებიუტის მოლოდინშია.

ნაკრების შეკრებამდე ლაკვეხელიანმა "რუსთავთან" ითამაშა, რომელიც "საბურთალომ" 2:1 მოიგო.

"საჭირო 3 ქულა მოვიპოვეთ. ჩვენი მდგომარეობა განსაკუთრებით მეორე ნახევარში დამძიმდა, როდესაც უმცირესობაში დავრჩით. 10 კაცით ყოველთვის რთულია თამაში, როგორი მოწინააღმდეგეც არ უნდა გყავდეს.

მწვრთნელების არჩეულმა ტაქტიკამ და ცვლილებებმა გაამართლა. თუმცა, მობილიზება მოვახერხეთ და მნიშვნელოვანი გამარჯვებაც მოვიპოვეთ. რა დავალებები მივიღეთ? მეტოქის შეტევები დროულად უნდა ჩაგვეშალა, მეორე ბურთზე გვებრძოლა და თამაშის ტემპისთვის მოგვემატა.

საამისოდ, მაქსიმუმი გავიღეთ და გატანის რამდენიმე კარგი შესაძლებლობა გვქონდა. მოწინააღმდეგეზე უკეთ გამოვიყურებოდით და შრომა დაგვიფასდა", - ამბობს ლუკა ლაკვეხელიანი.

მან გორში "დილასთან" მარცხის მიზეზებზეც ილაპარაკა: "პირველ ნახევარში ბევრი საგოლე მომენტი ვერ გამოვიყენეთ და რომ გაგვეტანა, თამაში სხვა სცენარით წარიმართებოდა. ისეთი მატჩი იყო, ვინც დაწინაურდებოდა, დიდ უპირატესობას მოიპოვებდა. ბევრი ვეცადეთ, მაგრამ თამაშის გადარჩენა ვერ შევძელით".

მისივე თქმით, "საბურთალოს" წარმატების ერთ-ერთი მიზეზი დიდი კონკურენციაა. თავადაც ამის მაგალითია - ლაკვეხელიანი, რომელიც თავის პოზიციაზე ეროვნულ ლიგაში ერთ-ერთი საუკეთესოა, ხან ძირითადშია და ხან ცვლილებაზე შედის:

"ყველანი მოტივირებულები ვართ, რადგან ძირითადში ადგილი გარანტირებული არავის აქვს. ის ფეხბურთელები თამაშობენ, რომლებიც კონკრეტული მატჩისთვის უკეთ მომზადებულები არიან. ფეხბურთელი სწორედ ასეთ კონკურენციაში იზრდება. სამწვრთნელო შტაბს დიდი არჩევანი აქვს, თავის გამოჩენის შესაძლებლობა თუ რომელ ფეხბურთელს მისცეს. გასულ წლებში ჩვენს კლუბში ამხელა კონკურენცია არ იყო, მაგრამ "საბურთალო" იზრდება და ვითარდება".

ლაკვეხელიანმა ახალგაზრდულ ნაკრებში მიწვევაზეც ილაპარაკა: "სიმართლე გითხრათ, ველოდი, რომ ახალგაზრდულ ნაკრებში მიმიწვევდნენ, რადგან ბოლო პერიოდში ჯანმრთელად ვარ, კლუბში ვთამაშობდი და ვფიქრობდი, რომ გამომიძახებდნენ.

ახალგაზრდულ ნაკრებში გია გეგუჩაძის პერიოდშიც გამომიძახეს, მაგრამ ტრავმის გამო ვერ ვითამაშე. ახლა კი იმედი მაქვს, რომ ახალგაზრდულში დებიუტი მექნება. სასიამოვნოა, რომ გვერდში დგომას ვგრძნობ, რაც ჩემთვის მნიშვნელოვანია. ძალიან მინდა, ჩემს ქვეყანას გამოვადგე და სიხარული მივანიჭო".

ყოველდღიური სპორტული გაზეთი "ლელო"
681
მკითხველის კომენტარები / 0 /
მსგავსი ამბები
რუბრიკის სხვა სიახლეები
;