მაგრაქველიძის მაგარი გუნდი

საქართველოს წყალბურთელ ვაჟთა ნაკრების წევრი გიორგი მაგრაქველიძე, რომელიც მეორე წელიწადია `ნოვაკის" ღირსებას იცავს, კვლავ წარმატებით განაგრძობს ასპარეზობას სლოვაკეთის უმაღლეს დივიზიონში.

ჩემპიონატის მეცხრე ტურში (`ნოვაკისთვის" მე-7 შეხვედრა იყო) ერთპიროვნულმა ლიდერმა ნოვაკელებმა კვლავ აღმავლობით ითამაშეს და შინ `ჟილინას" 19:5 მოუგეს, ხუთი ბურთი მაგრაქველიძემ გაიტანა. `ნოვაკი" 7-დან შვიდი მოგებით გათამაშების ცხრილის სათავეშია.

6-დან ხუთი მოგებით მეორე ადგილზეა კოშიცეს `ჰორნეცი", ხოლო მესამე საფეხურზე ბრატისლავის `სლავია" იმყოფება.

მაგრაქველიძე და მისი თანაგუნდელები მომდევნო ორ მატჩს 15-16 დეკემბერს კოშიცეში გამართავენ: ჯერ `ლურჯ დრაკონს", შემდეგ კი `ჰორნეცს" დაუპირისპირდებიან.

იტალიის ჩემპიონატში კვლავ სუსტად ასპარეზობენ ჩვენებურთა გუნდები. სერია A-ში მარკო ელაჩას `ორტიჯია" სტუმრად ერთ-ერთ გრანდ `პრორეკოსთან" დამარცხდა - 2:16. საქართველოს ნაკრების წევრს გოლი არ გაუტანია.

სერია A 2-ის სამხრეთ ლიგაში ანდრია ბითაძის რომის `ვის ნოვა" გასვლაზე `ჩივიტავეკიას" შეხვდა. მართალია, ქართველმა წყალბურთელმა ერთი გოლი მიითვალა და არბიტრებს მასპინძლები რვაჯერ გააძევებინა აუზიდან, მაგრამ რომაელებმა ამით მაინც ვერ ისარგებლეს და 7:9 დამარცხდნენ.

არადა, პირველი ტაიმის შემდეგ სტუმრები წინ იყვნენ 4:2, ბოლო რვაწუთიან მონაკვეთამდეც მატჩს იგებდნენ (6:5), თუმცა უპირატესობის საფინალო სასტვენამდე შენარჩუნება ვერ შეძლეს. ჩრდილოეთ ლიგაში დამარცხდა რევაზ იმნაიშვილის `სორიც" `პლებისიტოსთან" - 5:9. ჩვენებურს ბურთი არ გაუტანია.

ყოველდღიური სპორტული გაზეთი "ლელო"
1076
მკითხველის კომენტარები / 0 /
მსგავსი ამბები
რუბრიკის სხვა სიახლეები
;