მაიას თასი ჯობავას და ხოტენაშვილს 

დიდ დიღომში, როგორც ვწერდით, საზეიმოდ გაიხსნა მსოფლიოს ხუთგზის ჩემპიონისა და საჭადრაკო ოლიმპიადების ცხრაგზის გამარჯვებულის, ოთხი საჭადრაკო ოსკარის მფლობელ მაია ჩიბურდანიძის საჭადრაკო აკადემია, სადაც სწავლება ჩიბურდანიძის პროგრამით წარიმართება. 

აკადემიის გახსნას დაემთხვა საჭადრაკო ფესტივალი „მაიას თასი“ (რაპიდი, საპრიზო ფონდი 20.000 ლარი), რომელიც 2004 წლიდან იმართება. A კატეგორიის ტურნირში 86 ქალ-ვაჟი მონაწილეობდა.

საქართველოს ნაკრების ლიდერმა ბაადურ ჯობავამ 9 შესაძლებლობიდან 7,5 ქულა მოაგროვა და პირველი ადგილი დაიკავა. ბაადურმა ექვსი ორთაბრძოლა მოიგო და სამ პარტიაში ძმას - ბეგლარ ჯობავას, ასევე, დავით არუთინიანსა და ალექსანდრ ფიერს (ბრაზილია) დაუზავდა.

ერთბაშად ხუთმა მოჭადრაკემ 7-7 ქულას მოუყარა თავი. დამატებითი მაჩვენებლებით, შესაბამისად, მეორე-მეექვსე ადგილები ალექსანდრ ფიერმა, დავით მაღალაშვილმა, დავით ჯოჯუამ, ლევან ფანცულაიამ და ნიკა ვოლკოვმა გაინაწილეს. მე-7 საპრიზო ადგილი 6.5 ქულით გიგა ყუფარაძეს ერგო. 

B კატეგორიის ქალთა ტურნირში 32 მანდილოსანი ჩაება. შესანიშნავად ითამაშა დიდოსტატმა ბელა ხოტენაშვილმა, რომელიც ცხრა პარტიიდან მხოლოდ მე-5 ტურში დაუზავდა სოფიკო ხუხაშვილს, დანარჩენ რვა მეტოქეს კი აჯობა, მათ შორის - სალომე მელიას, ნინო ხომერიკს, მერი არაბიძესა და ნინო ბაციაშვილს.

ბელამ „მაიას თასი“ 9 შესაძლებლობიდან 8.5 ქულით მოიპოვა. გამარჯვებულს ქულით ჩამორჩა ნინო ხომერიკი. 7 ქულით მესამე ადგილი სოფიკო ხუხაშვილმა დაიკავა. მომდევნო ოთხ საპრიზო ადგილზე გავიდნენ ალექსანდრა ვახანია (6.5 ქულა), ნინო ბაციაშვილი (6), მერი არაბიძე (5.5) და ლელა ჯავახიშვილი (5.5).

ყოველდღიური სპორტული გაზეთი "ლელო"
70
მკითხველის კომენტარები / 0 /
მსგავსი ამბები
რუბრიკის სხვა სიახლეები
;