მაისურაძემ რეიტინგი დაგვიბრუნა 

ბუნებრივია, ძიუდოისტთა საერთაშორისო რეიტინგში ბოლო პერიოდმა გარკვეული ცვლილებები შეიტანა, რამაც, ერთი შეხედვით, თითქოს დაგვაზარალა.

მაგალითად, 66 კილოგრამში დავკარგეთ პირველობა, შედეგად კი რეიტინგს კვლავინდებურად მხოლოდ ორ წონაში ვლიდერობთ - 100-სა და +100-ში;

სამაგიეროდ, 81 კილოგრამში ლუკა მაისურაძის ბოლოდროინდელმა წარმატებებმა ლიდერებში შეგვიყვანა. ჩვენთვის ყველაზე მნიშვნელოვანიც ეს ამბავი გვგონია. სასიხარულოა ისიც, რომ უმეტეს წონებში გაიზარდა შიდა კონკურენცია და ლიდერებს ახალგაზრდების ხარჯზე ღირსეული კონკურენტები წამოეწივნენ. 

ჩვენები მხოლოდ სამ წონაში არ შედიან მოწინავე ხუთეულში. განთესვის ზონაშიც ამდენში არ არიან. 

60 კგ. 
როგორც მოსალოდნელი იყო, ევროპის ჩემპიონსა და მსოფლიოს ორგზის მესამე პრიზიორ ამირან პაპინაშვილს ცოტა ხნის წინ ქულები დააკლდა და დაკარგა მეორე ადგილი, თუმცა მესამეზე მაინც რჩება. უახლოეს პერიოდში ამ განლაგებაში ცვლილება არაა მოსალოდნელი, ოღონდ ეგაა, პაპინაშვილსა და იაპონელ რიუჯუ ნაგაიამას შორის სხვაობა ცოტათი შემცირდება.

რაც შეეხება შიდა კონკურენციას, ცხრილში პაპინაშვილს კვლავაც ლუხუმ ჩხვიმიანი მოსდევს, თუმცა ამ ორივეს უკვე სერიოზულ კონურენციას უწევენ ახალგაზრდები - ჯაბა პაპინაშვილი და თემურ ნოზაძე. მართალია, წინა რეიტინგთან შედარებით ორივემ ცოტათი უკან დაიწია, მაგრამ არა კატასტროფულად. თუმცა გვჯერა, რომ ისინი უახლოეს პერიოდში დაუახლოვდებიან ლიდერებს და საოლიმპიადო ლიცენზიებისთვის დავაშიც აქტიურად ჩაერევიან. 

მოგეხსენებათ, პაპინაშვილიც და ჩხვიმიანიც მინსკში იასპარეზებენ მეორე ევროპულ თამაშებზე, სადაც ორივე განთესილთა შორის იქნებიან. 

1. რობერტ მშვიდობაძე (რუსეთი) - 6446 ქულა
2. რიუჯუ ნაგაიამა (იაპონია) - 6010 
3. ამირან პაპინაშვილი (საქართველო) - 5643
4. ნაოჰისა ტაკატო (იაპონია) - 5550
5. იელდოშ სმეტოვი (ყაზახეთი) - 4380
10. ლუხუმ ჩხვიმიანი (საქართველო) - 3258
35. ჯაბა პაპინაშვილი (საქართველო) - 1279
52. თემურ ნოზაძე (საქართველო) - 772

66 კგ.
საბედნიეროდ, ამ წონაში კონკურენციამ მოიმატა და დღეს ევროპის ჩემპიონი ვაჟა მარგველაშვილი სულაც არაა უკონკურენტო. ამის დასტურად ისიც გამოდგება, რომ ევროპული თამაშებისთვის გაორების პატივი ამ წონას ხვდა წილად, რაც ბაგრატ ნინიაშვილის და მისი ბოლოდროინდელი წარმატებების დამსახურებაა. ნინიაშვილი უკვე შედის სალიცენზიო ზონაში, რაც იმას ნიშნავს, რომ ტოკიოს ოლიმპიადის საგზურისთვის მათ შორის დიდი ბრძოლა გაჩაღდება. 

ამასობაში წლევანდელი სეზონის აღმოჩენად იქცა ქუთაისელი გიორგი თუთაშვილი, ვინც საქართველოს ჩემპიონატშიც მედალი მოიპოვა, მერე კი თბილისის „დიდ მუზარადზეც“ კი, ალბათ, ბევრისთვის მოულოდნელად, ვიცე-ჩემპიონი გახდა. 

ჯერჯერობით მარგველაშვილი მეორე ადგილზე რჩება, თუმცა აქ პირველ-მეორეს დიდი მნიშვნელობა არა აქვს, რადგან იაპონელებს მსოფლიოს ჩემპიონატზე რეიტინგის ლიდერი ჯოშირო მარუიმა მიჰყავთ, მას კი ჩვენებური თუნდაც მეორე ადგილზე ყოფნით ფინალამდე არ ხვდება. აი, იაპონელებმა მსოფლიოს ორგზის ჩემპიონი ჰიფუმი აბეც წაიყვანეს, მასთან კი მოუწევს ნახევარფინალში დაჭიდება. 

1. ჯოშირო მარუიამა (იაპონია) - 5690
2. ვაჟა მარგველაშვილი (საქართველო) - 5586
3. ჰიფუმი აბე (იაპონია) - 5060
4. ბარუხ შმაილოვი (ისრაელი) - 4892
5. ტალ ფლიკერი (ისრაელი) - 4615
24. ბაგრატ ნინიაშვილი (საქართველო) - 1975
90. გიორგი თუთაშვილი (საქართველო) - 490

73 კგ.
შიდა კონკურენციის მხრივ, ამ წონაში არცთუ სახარბიელო მდგომარეობა გვაქვს, მაგრამ ოლიმპიური და ევროპის ჩემპიონი ლაშა შავდათუაშვილი კვლავაც რჩება რეიტინგის ლიდერად - მესამე ადგილზეა. თბილისის ტურნირზე კარგად იასპარეზა ვალერი იაშვილმაც - ბრინჯაოს მედალი მოიპოვა, თუმცა ჯერ კიდევ ვნახოთ, რამდენად შეძლებს ის ოლიმპიური ჩემპიონისთვის ღირსეული კონკურენციის გაწევას ან თუნდაც საერთაშორისო არენაზე ღირსეულად გამოსვლას. 

1. ჩანგრიმ ანი (კორეა) - 6135
2. სოიჩი ჰაშიმოტო (იაპონია) - 6008
3. ლაშა შავდათუაშვილი (საქართველო) - 5656
4. რუსტამ ორუჯოვი (აზერბაიჯანი) - 5631
5. ტომი მაკიასი (შვედეთი) - 5178
92. ფრიდონ გიგანი (საქართველო) - 467

81 კგ.
ჯერ ეკატერინბურგში მოპოვებულმა ბრინჯაომ, მერე კი ანტალიაში გამარჯვებამ ლუკა მაისურაძე 29-ე ადგილამდე აღაზევა და ჩვენებურთაგან საუკეთესო რეიტინგის ლიდერად აქცია. არადა, ამ წონაში 100-ეულში კვლავაც ბევრი ქართველი შედის. მაისურაძეს ჯერჯერობით არაფერი დააკლდება, რადგან უფროსებში ბევრი ტურნირი არც უჭიდავია, ხოლო ევროპულ თამაშებზეც წარმატებით გამოსვლის შემთხვევაში მსოფლიოსთვისაც გაიუმჯობესებს რეიტინგს. 

1. საეიდ მოლაე (ირანი) - 5625
2. ფრანკ დე ვიტი (ჰოლანდია) - 5190
3. საგი მუკი (ისრაელი) - 5076
4. დომინიკ რესელი (გერმანია) - 4566
5. ხასან ხალმურზაევი (რუსეთი) - 4523
29. ლუკა მაისურაძე (საქართველო) - 1606
37. ზებედა რეხვიაშვილი (საქართველო) - 1304
56. თამაზ კირაკოზაშვილი (საქართველო) - 860
59. ნუგზარ ტატალაშვილი (საქართველო) - 816
66. ტატო გრიგალაშვილი (საქართველო) - 723
87. კობა მჭედლიშვილი (საქართველო) - 456 

90 კგ. 
ამ წონაში იქნებ ყველა ჩვენებური განთესვის ზონაში არ შედის, თუმცა იმდენად ტიტულოვანი ფალავნები გვყავს, წარმატების იმედი ნებისმიერ ტურნირზე დიდია. ამ წონას ქართველი ლიდერობს, თუმცა კი ესპანეთის სახელით მოჭიდავე - მსოფლიოს ჩემპიონი ნიკოლოზ შერაზადიშვილი, ხოლო ევროპის მესამე პრიზიორი ბექა ღვინიაშვილი ეკატერინბურგში მოპოვებულმა ვერცხლმა მეათე ადგილამდე აღაზევა. თუ ასე გააგრძელა, ვინძლო, მსოფლიოს ჩემპიონატს განთესილთა შორისაც შეხვდეს.

1. ნიკოლოზ შერაზადიშვილი (ესპანეთი) - 7042
2. კრისტიან ტოტი (უნგრეთი) - 6004
3. ივან ფელიპე სილვა მორალესი (კუბა) - 4855
4. ალექსანრდ კუკოლი (სერბეთი) - 4599
5. დონჰან გვაკი (კორეა) - 4436
10. ბექა ღვინიაშვილი (საქართველო) - 3347
17. უშანგი მარგიანი (საქართველო) - 2750
33. გიორგი პაპუნაშვილი (საქართველო) - 1543
39. ავთანდილ ჭრიკიშვილი (საქართველო) - 1368
63. ლაშა ბექაური (საქართველო) - 700

100 კგ.
კონკურენციის თვალსაზრისით, ალბათ, ამ წონაში ყველაზე ცუდი მდგომარეობა გვაქვს, რადგან ვალერი ლიპარტელიანს ღირსეული კონკურენტი ჯერაც ვერ გამოუჩნდა. სამაგიეროდ, თავად ევროპის სამგზის ჩემპიონი, მსოფლიოს სამგზის და ოლიმპიადის ფინალისტი ლიპარტელიანია რეიტინგში პირველ ადგილზე და ამ პოზიციას კარგა ხანს არც დაკარგავს, უახლოეს შეჯიბრებებში წარმატებები რომც ვერ მოიპოვოს. 

1. ვალერი ლიპარტელიანი (საქართველო) - 7477
2. გუჰამ ჩო (კორეა) - 5443
3. პეტერ პალჩიკი (ისრაელი) - 5079
4. მიხაელ კორელი (ჰოლანდია) - 4235
5. აარონ ვოლფი (იაპონია) - 4120
49. ლაშა ტაველური (საქართველო) - 931
60. ონისე სანებლიძე (საქართველო) - 789

+100 კგ. 
ამ წონაშიც ვლიდერობთ რეიტინგს - მართალია, მსოფლიოსა და ევროპის ჩემპიონ გურამ თუშიშვილს მსოფლიოს შემდეგ არ უჭიდავია და ქულები ცოტა კი დაკარგა, მაგრამ ჯერ მაინც უსწრებს კონკურენტებს. ამასობაში მეორე სუნთქვა გაეხსნა ევროპის პრიზიორ ლევან მატიაშვილს, თუმცა აქ ყურადღებას სხვა ახალგაზრდებიც იპყრობენ. მათ შორის მაინც ყველაზე ახალგაზრდას - გელა ზაალიშვილს გამოვარჩევთ, ვისაც ახლანდელ რეიტინგზე ბევრად მეტი შეუძლია. 

1. გურამ თუშიშვილი (საქართველო) - 6907
2. ლუკაშ კრპალეკი (ჩეხეთი) - 5020
3. დავიდ მოურა (ბრაზილია) -4365
4. ტამერლან ბაშაევი (რუსეთი) - 3847
5. დუურენბაიარ ულზიიბაიარი (მონღოლეთი) - 3834
23. ლევან მატიაშვილი (საქართველო) - 1846
53. ადამ ოქრუაშვილი (საქართველო) - 870
54. ონისე ბუღაძე (საქართველო) - 865
56. გელა ზაალიშვილი (საქართველო) - 766
90. გიორგი ქავთარაძე (საქართველო) - 279 

ყოველდღიური სპორტული გაზეთი "ლელო"
2035
მკითხველის კომენტარები / 0 /
მსგავსი ამბები
რუბრიკის სხვა სიახლეები
;