მაისურაძემ სომხეთის წარმომადგენელი მარკოსიანი 3:2 დაამარცხა და ევროპის ჩემპიონია!

პონტევედრაში დღეს დასრულდა თავისუფალი სტილით მოჭიდავეთა ევროპის ჩემპიონატი ახალგაზრდებს შორის. ის ჩვენმა ნაკრებმა მაჟორულ ნოტაზე დაასრულა - ბოლო დღეს სამი მედალი მოიპოვა. მათ შორის - ოქროსიც, რასაც კიდევ ორი ბრინჯაო დაუმატა.

ევროპის ჩემპიონი ონელი მირიან მაისურაძე გახდა 86 კილოგრამში. ფინალში მან საკმადო დაძაბულ პაექრობაში 3:2 დაამარცხა სომეხი მჰერ მარკოსიანი. პირველი პერიოდი ჩვენმა ათლეტმა 1:0 მოიგო - პასიურ მეტოქეს 30-წამიანი საჯარიმო ჩაურთეს, მაგრამ მაისურაძემ არაფერი დაუთმო; პირიქით - უპირატესობას კვლავაც თავად ინარჩუნებდა და რაკი მეტოქემ მიცემულ დროში ილეთი ვერ გააკეთა, ქულა ქართველს მისცეს: 1:0 მაისურაძის სასარგებლოდ. ის ამის შემდეგაც აგრძელებდა შეტევას და მეტოქემ საფრთხე ვერ შეუქმნა.

მეორე პერიოდი ფრიად დრამატული გამოდგა. მაისურაძემ ისევ აგრესიულად შეუტია, თუმცა ერთ ეპიზოდში შეცდა და სომეხი იოლად შეუშვა ფეხში. მართალია, ვერ გაექცა, მაგრამ არც გდება დაანება და წრიდან გავიდა: 1:1. ეპიზოდის განახლებისთანავე უკვე თვთონ აიყვანა ფეხიდან და გადააგდო კიდეც, ოღონდ ვერ დაატრიალა, თუმცა 3:1 მაინც დაწინაურდა. მოგვიანებით ისევ შევიდა ფეხში, ოღონდ მეტოქე გაექცა და ზურგიდანაც მოუარა, ოღონდ ჩვენებურმა ისევ მოახერხა წრიდან გასვლა.

მსაჯებმა ერთი ქულა სომეხს მისცეს, ოღონდ მერე რატომღაც ზემდგომთ ეს ეპიზოდი თავიდან განიხილეს და ჩვენთვის საგანგაშო გადაწყვეტილება მიიღეს: ეს ქულა გააუქმეს, მაგრამ მაისურაძე ქულა გაფრთხილებით დასაჯეს ანუ მარკოსიანს მაინც მისცეს 1 ქულა და თან ჩვენებური ჩოქბჯენში დააყენეს! საბედნიეროდ, მაისურაძემ ამ კრიტიკული მომენტიდან თავის დაძვრენა შეძლო - მეტოქემ ფეხი კი აუღო, მაგრამ ქართველმა გდება არ დაანება. ის დარჩენილ ერთ წუთშიც გააფთრებით იცავდა თავს და უძნელესი გამარჯვება მოიპოვა, ბოლოს კი ქართული დროშით ამაყად შემოურბინა არენას.

მაისურაძისთვის აქამდე ყველაზე დიდი მიღწევა ჭაბუკებში მსოფლიოს ჩემპიონობა იყო.

ჩვენს ნაკრებს ბრინჯაოს მედლები თბილისელებმა - გოგა მამიაურმა (74) და ვასილ ხვისტანმა (125) შეჰმატეს. მამიაურმა გადამწყვეტ შეხვედრაში აზერბაიჯანელი ნასიბ ისაევი წმინდად, 10:0 დაამარცხა, ხოლო ხვისტანმა დამამშვიდებლის ფინალში ბელარუს მიკიტა ჰორჰუნს 9:5 აჯობა. მამიაურმა პირწმინდად დაჯაბნა მეტოქე, რაზეც ანგარიშიც მიუთითებს, ხვისტანმა კი ძალიან დაძაბულ შეხვედრაში მოიპოვა გამარჯვება - პირველი პერიოდი 4:5 დათმო, ხოლო თავად პაექრობა, მძიმეწონოსანთა კვალობაზე, მოსალოდნელზე უფრო სანახაობრივი გამოდგა: საწყის ორ წუთში დგომში ჯვარედინ მოვლებაზე ორჯერ გაკეთდა 4-ქულიანი გდება.

თავიდან ეს პირველივე წუთზე ხვისტანმა მოახერხა და იქვე შეეძლო შეხვედრის დასრულებაც, მაგრამ `ტუშე~ ვერ დააფიქსირა - ბეჭებზე დადებული მეტოქე გაექცა, თუმცა 4:0 მაინც დაწინაურდა. ცოტა ხანში ასევე დგომიდან ჯვარედინი მოვლების შემდეგ უკვე ჰორჰუნმა გადააგდო ქართველი უკან 4-ქულიანზე და ანგარიში გაათანაბრა, პერიოდის მიწურულს კი ხაზთან გამართულ ძიძგილაობაში ხვისტანი უფრო ადრე დაეცა ხალიჩაზე და ქულა ბელარუსს მისცეს: 5:4 მის სასარგებლოდ.

მეორე პერიოდი მთლიანად ხვისტანისა გამოდგა, ვინც უფრო გამძლეობისა და ფიზიკური კონდიციების ხარჯზე აჯობა ჰორჰუნს: ჯერ იყო და ამოსმულის მსგავსი მოძრაობის მცდელობისას ილაჯგამოცლილი ბელარუსი თვითომ გადავარდა უკან და ხვისტანს ისღა დარჩენოდა, მთელი მასით მისწოლოდა და გდება დაეფიქსირებინა, ბოლო წუთზე კი ისევ დგომში ჯვარედინ მოვლებაზე, როცა ჩვენებური არც ცდილობდა გამწვავებას, რადგან არც სჭირდებოდა, ჰორჰუნმა კისრულის მსგავსი გდება დააპირა, მაგრამ ვერ შეძლო და ხვისტანმა არა მარტო ადვილად დააგდო ხალიჩაზე, არამედ ბეჭებიც დაადებინა.

3052
მკითხველის კომენტარები / 0 /
მსგავსი ამბები
რუბრიკის სხვა სიახლეები
;