მამუკა გორგოძემ ველოდრომზე მოიგო, ჟვანიას 100

საფრანგეთის სარაგბო ჩემპიონატის ელიტურ, პირველ დივიზიონში რეგულარული გათამაშების დასრულებამდე ორი ტურით ადრე პლეი ოფში თამაშის უფლება მხოლოდ ერთ გუნდს აქვს გარანტირებული. თეორიულად არსებობს იმის შანსი, რომ ამჟამად მეორე ადგილზე მყოფი გუნდი, საბოლოოდ პლეი ოფს მიღმა დარჩეს.

ოცდამეოთხე ტურის ცენტრალური მატჩი მარსელში, "ველოდრომზე" გაიმართა, სადაც მამუკა გორგოძისა და ლევან ჩილაჩავას ტულონმა" მიხეილ ნარიაშვილის, კონსტანტინე მიქაუტაძისა და დავით ქუბრიაშვილის "მონპელიეს" უმასპინძლა.

უნდა აღინიშნოს, რომ სტუმართა გუნდს რამდენიმე წამყვანი მორაგბე აკლდა. სავარაუდოდ, სწორედ ამის შედეგი იყო, რომ "ტულონმა" მატჩის ბედი პირველივე ტაიმში გადაწყვიტა. მასპინძლები შესვენებამდე 29:7 დაწინაურდნენ.

შესვენების შემდეგ ტულონელებმა ტემპს უკლეს და მხოლოდ სამი ქულის მოგროვება შეძლეს. საბოლოოდ კი 32:17 მოიგეს.

ქუბრიაშვილი, რომელიც 59-ე წუთზე შეცვალეს, მატჩის არბიტრმა მე-11 წუთზე გაასინბინა, ჩილაჩავა თამაშში 55-ე წუთიდან ჩაერთო, გორგოძე მოედანზე ოთხი წუთის შემდეგ გამოჩნდა. მარცხის მიუხედავად "მონპელიემ" ლიდერობა შეინარჩუნა. "ტულონს" კი პლეი ოფში მოსახვედრად ჯერ კიდევ მინიმუმ ერთი მატჩი მოსაგები აქვს.

ვასილ კაკოვინის "მეტრო რასინგი", რომელიც აქამდე მეორე ადგილზე იყო, სტუმრად დამარცხდა "ტულუზთან" 27:42 და პოზიცია სწორედ ტულუზელებს დაუთმო. კაკოვინი ძირითად შემადგენლობაში იყო და 45-ე წუთზე შეცვალეს.

ლექსო ყაულაშვილის "ლა როშელი" შინ დამარცხდა "კასტრთან" 18:26 და, მიუხედავად იმისა, რომ 61 ქულით მერვე ადგილზეა, მაინც ინარჩუნებს პლეი ოფში მოხვედრის შანსს. ყაულაშვილი სათადარიგოთა შორის იყო და მოედანზე 51-ე წუთიდან გამოჩნდა.

უკიდურესად მძიმე მდგომარეობაშია კარლენ ასიეშვილის, სოსო ბეკოშვილისა და ვასილ ლობჟანიძის "ბრივი", რომელმაც სტუმრად წააგო უშუალო კონკურენტთან, ირაკლი მირცხულავას "ოიონაქსთან" - 17:40. ბრიველები 32 ქულით ბოლო ადგილზე არიან. მათ ორი ქულით სწორედ "ოიონაქსი" უსწრებს.

მირცხულავა ძირითად შემადგენლობაში იყო და 61-ე წუთზე შეცვალეს, იმავდროულად თამაშში ჩაერთო ასიეშვილი, სხვა ქართველები განაცხადში არ იყვნენ.

გავარდნის საფრთხე დაემუქრა ზურაბ ჟვანიასა და გიორგი მელიქიძის "სტად ფრანსეს", რომელმაც სტუმრად ვერაფერი გააწყო "ლიონთან" - 3:44. ჟვანია ძირითად შემადგენლობაში იყო და 51-ე წუთზე შეცვალეს, მელიქიძეს არ უთამაშია. აღსანიშავია, რომ ჟვანიამ "სტად ფრანსეს" კვართი მეასედ მოირგო.

პირველ დივიზიონში დარჩენისკენ დიდი ნაბიჯი გადადგა წინ თამაზ მჭედლიძისა და გიორგი თეთრაშვილის "აჟენმა", რომელმაც სტუმრად შეძლო "პოს" დამარცხება - 33:22. ქართველ მორაგბეებს არ უთამაშიათ.

დავით ზირაქაშვილისა და ვიქტორ კოლელიშვილის "კლერმონმა" შინ დაამარცხა "ბორდო" - 33:3. კოლელიშვილი 41-ე წუთზე შეცვალეს, ზირაქაშვილმა 16 წუთით მეტი ითამაშა.

I დივიზიონი
XXIV ტური

ტულონი-მონპელიე 32:17
კლერმონი-ბორდო 33:3
ოიონაქსი-ბრივი 40:17
პო-აჟენი 22:33
ლიონი-სტად ფრანსე 44:3
ლა როშელი-კასტრი 18:26
ტულუზი-რასინგი 42:27

თ მ ფ წ ბ ქ(პ)
1. მონპელიე 24 16 0 8 +169 76(12)
2. ტულუზი 24 15 1 8 +129 70(8)
3. რასინგი 24 16 0 8 +91 70(6)
4. ტულონი 24 13 0 11 +225 68(16)
5. ლიონი 24 14 0 10 +161 66(10)
6. კასტრი 24 14 0 10 +9 64(8)
7. პო 24 14 0 10 +26 62(6)
8. ლა როშელი 24 13 1 10 +136 61(7)
9. კლერმონი 24 10 1 13 -58 50(8)
10. ბორდო 24 10 1 13 -40 47(5)
11. აჟენი 24 9 0 15 -201 42(6)
12. სტად ფრანსე 24 8 0 16 -184 38(6)
13. ოიონაქსი 24 6 3 15 -228 34(4)
14. ბრივი 24 6 1 17 -235 32(6)


მეორე დივიზიონში რეგულარული გათამაშება დასრულდა, რომელიც კატალონიურმა "პერპინიანმა" მოიგო. პლეი ოფში კი ქართველ მორაგბეთა ორი გუნდი, "გრენობლი" და "მონ დე მარსანი" გავიდა. დივიზიონის დატოვება ასევე ქართველ მორაგბეთა ორ გუნდს, ბექა ბიწაძის "ნარბონს" და ელიზბარ ყუფარაძის "დაქსს" მოუწევს.

ბექა გიგაშვილის "გრენობლმა" ბოლო ტურში სტუმრად ითამაშა შალვა სუთიაშვილის "ანგულემთან" და 19:10 მოუგო. სუთიაშვილი ძირითად შემადგენლობაში იყო და 64-ე წუთზე შეცვალეს. გიგაშვილი ტრავმირებულია.

ილია კაიკაციშვილის "მასი" სტუმრად დამარცხდა "კოლომიესთან" - 24:49. ქართველი შერკინების ბურჯი თადარიგში იყო და მოედანზე 48-ე წუთიდან გამოჩნდა.

მირიან ბურდულისა და გიორგი ნაცარაშვილის "კარკასონი" სტუმრად დიდი ანგარიშით დამარცხდა "პერპინიანთან" - 7:73. ბურდული ძირითად შემადგენლობაში იყო და მატჩის არბიტრმა 38-ე წუთზე სინბინში გაუშვა. ის 49-ე წუთზე ნაცარაშვილმა შეცვალა.

II დივიზიონი
XXX ტური

ანგულემი-გრენობლი 10:19
ორიაკი-მარსანი 31:26
ბეზიე-ნევერი 36:22
ბიარიცი-მონტობანი 58:31
კოლომიე-მასი 49:24
დაქსი-ვანი 34:28
ნარბონი-ბაიონი 26:21
პერპინიანი-კარკასონი 73:7

თ მ ფ წ ბ ქ(პ)

1. პერპინიანი 30 20 1 9 +348 97(15)
2. მონტობანი 30 20 2 8 +133 92(8)
3. გრენობლი 30 20 1 9 +108 88(6)
4. მარსანი 30 17 0 13 +213 84(16)
5. ბეზიე 30 19 1 10 +86 84(6)
6. ბიარიცი 30 17 0 13 +95 80(12)
7. ნევერი 30 15 0 15 +78 69(9)
8. ბაიონი 30 14 1 15 -32 69(11)
9. კოლომიე 30 14 1 15 -41 69(11)
10. ვანი 30 12 0 18 -18 62(14)
11. ორიაკი 30 13 1 16 -75 61(7)
12. მასი 30 13 0 17 -51 59(7)
13. ანგულემი 30 13 1 16 -69 59(5)
14. კარკასონი 30 11 0 19 -182 53(9)
15. დაქსი 30 9 1 20 -165 46(8)
16. ნარბონი 30 7 1 22 -428 35(3)
პლეი ოფი
გრენობლი-ბიარიცი, მონ დე მარსანი-ბეზიე

გაიმართა ზე რაგბის გათამაშების მორიგი ტური, რომელშიც ჯაბა ბრეგვაძისა და ნიკოლოზ ხატიაშვილის იაპონურმა "სანვულვზმა" შინ მიიღო ახალზელანდიური ოკლენდის "ბლუზი" და 10:24 დამარცხდა.

ხატიაშვილი თადარიგში იყო, მაგრამ მისი დებიუტი ისევ არ შედგა. ბრეგვაძე თამაშში 52-ე წუთიდან ჩაერთო. "სანვულვზს" შვიდი ტურის მერე ორი ქულა აქვს და ბოლო ადგილზეა.

კელტთა ლიგაში ანტონ ფეიქრიშვილის "კარდიფმა" სტუმრად დაამარცხა სამხრეთაფრიკული "საუთერნ კინგზი" - 45:12. ფეიქრიშვილი მოედანზე 66-ე წუთიდან გამოჩნდა. "კარდიფი" ახლა A ჯგუფში ოცი ტურის შემდეგ 53 ქულით მეოთხე ადგილზეა.

ყოველდღიური სპორტული გაზეთი "ლელო"
670
მკითხველის კომენტარები / 0 /
მსგავსი ამბები
რუბრიკის სხვა სიახლეები