მამუკა გორგოძემ ლიონელებთან იჩხუბა [სარაგბო ლეგიონი]

საფრანგეთის სარაგბო ჩემპიონატის ელიტურ, მეორე დივიზიონში პირველი ტურის შეხვედრები გაიმართა. მატჩების უმრავლესობა, როგორც ამ დივიზიონისათვის ზოგადადაა დამახასიათებელი, მასპინძელთა გამარჯვებით დასრულდა.

ქართველ მორაგბეთა გუნდებიდან გამარჯვებას სამმა, ბასკურმა "ბიარიცმა", "კოლომიემ" და "ორიაკმა", მიაღწია. ვახტანგ ახობაძის "ბიარიცის" მეტოქე პირველ ტურში თორნიკე მატარაძის და გურამ პაპიძის "ნევერი" იყო. ბასკებს სტუმრებმა სერიოზული წინააღმდეგობა გაუწიეს. თუმცა, "ბიარიცმა" მაინც შეძლო გამარჯვების მოპოვება - 19:16.

ახობაძე ძირითად შემადგენლობაში იყო და 54-ე წუთზე შეცვალეს, ნევერელი ქართველები განაცხადში არ იყვნენ.


ბექა შეყლაშვილის "კოლომიეს" დიდი ბრძოლის გადატანამ მოუწია დივიზიონის დებიუტანტ "ექსთან" საშინაო მატჩში. მასპინძლებმა ბოლო წამებზე ზუსტი არეკნის წყალობით მოიგეს - 28:26. თამაშის დაძაბულობაზე ისიც ნათლად მეტყველებს, რომ არბიტრმა ორივე გუნდიდან ჯამში ოთხი მორაგბე გაუშვა სინბინში. შეყლაშვილი განაცხადში არ იყო. 


მერაბ შარიქაძის, გიორგი ცუცქირიძის, გიორგი ვეფხვაძისა და გიორგი ჯავახიას "ორიაკმა" შინ მიიღო ირაკლი მირცხულავას "ოიონაქსი" და მინიმალური სხვაობით 20:19 დაამარცხა. ცუცქირიძე, რომელიც ძირითად შემადგენლობაში იყო, 37-ე წუთზე დაშავდა და შეცვალეს, ვეფხვაძემ მოედანი 47-ე წუთზე დატოვა. დანარჩენ ქართველებს არ უთამაშიათ.


კარლენ ასიეშვილის, ვასილ ლობჟანიძის, სოსო ბეკოშვილის, ოთარ გიორგაძისა და ლუკა გოგინავას "ბრივი" სტუმრად დამარცხდა "ბაიონთან" - 17:30. გოგინავა და გიორგაძე თამაშში მე-60 წუთიდან ჩაერთნენ. ხუთ წუთში მატჩის არბიტრმა გოგინავა სინბინში გაუშვა. ასიეშვილი ტრავმირებულია, სხვა ჩვენებურები განაცხადში არ იყვნენ.


შალვა სუთიაშვილის "ანგულემმა" სტუმრად წააგო ლანგედოკურ "ბეზიესთან" - 21:25. საქართველოს ნაკრების მესამეხაზელმა მეორე ხაზში ითამაშა. ის ძირითად შემადგენლობაში იყო და 52-ე წუთზე შეცვალეს.


ასევე სტუმრად, "მონ დე მარსანთან" წააგო ილია კაიკაციშვილის "მასიმ" - 10:33. ქართველი შერკინების ბურჯი თადარიგში იყო და 46-ე წუთზე შეცვალეს.


ამასობაში ელიტური, პირველი დივიზიონის გუნდებმა ჩემპიონატის დაწყების წინ ბოლო საკონტროლო მატჩები გამართეს. მიხეილ ნარიაშვილის, კონსტანტინე მიქაუტაძის, ლევან ჩილაჩავას და გელა აფრასიძის "მონპელიემ" სამხრეთაფრიკულ "ვესტრნ პროვინსს" უმასპინძლა და 26:7 დაამარცხა. მიქაუტაძემ, რომელიც თამაშში მეორე ტაიმიდან ჩაერთო 78-ე წუთზე ლელო გაიტანა, მეორე ტაიმში გამოჩნდა მოედანზე ჩილაჩავაც. ნარიაშვილს და აფრასიძეს არ უთამაშიათ.


თამაზ მჭედლიძისა და გიორგი თეთრაშვილის "აჟენმა" სტუმრად სერიოზული ბრძოლა გაუმართა "ლა როშელს", რომლის ერთ-ერთი მწვრთნელი ყოფილი "ბორჯღალოსანი" აქვსენტი გიორგაძეა. აჟენელები მინიმალური სხვაობით 17:18 დამარცხდნენ.


დავით ზირაქაშვილის, ვიქტორ კოლელიშვილისა და ბექა კაკაბაძის "კლერმონმა" შინ დიდი ანგარიშით სძლია კანადის ეროვნულ გუნდს - 54:14. ზირაქაშვილი ძირითად შემადგენლობაში იყო, კაკაბაძე თამაშში მეორე ტაიმში ჩაერთო, კოლელიშვილი განაცხადში არ გახლდათ.


დავით ქუბრიაშვილისა და ბექა გიგაშვილის "გრენობლმა" იტალიურ "ზებრეს" უმასპინძლა და 31:7 მოუგო. "ალპელების" შემადგენლობაში მხოლოდ გიგაშვილმა ითამაშა.


მამუკა გორგოძისა და ბადრი ალხაზაშვილის "ტულონმა" შინ, სტად და მაიოზე "ლიონი" მიიღო და 14:21 დამარცხდა. გორგოძე ძირითად შემადგენლობაში იყო და მეორე ტაიმში ჩხუბის გამო არბიტრმა სინბინში გაუშვა.


ლექსო ყაულაშვილის, ლაშა ტაბიძისა და ბექა გორგაძის "ბორდომ" სტუმრად ითამაშა სამხრეთ აფრიკაში დურბანის "ნატალ შარქსასთან" და 17:19 დამარცხდა. ყაულაშვილი ძირითად შემადგენლობაში იყო, ტაბიძე და გორგაძე თამაშში მეორე ტაიმიდან ჩაერთნენ.

2370
მკითხველის კომენტარები / 0 /
მსგავსი ამბები
რუბრიკის სხვა სიახლეები
;