"ა" ლიგის ლიდერ "ორბს" მამუკა ტურაშვილი გაუძღვება

საქართველოს ჩემპიონატის "ა" ლიგაში ერთპიროვნული ლიდერია "ორბი", რომელშიც მეხუთე ტურის წინ მწვრთნელი შეიცვალა. ნინო ყიფშიძის ნაცვლად მთავარი მწვრთნელის ფუნქციებს მამუკა ტურაშვილი შეასრულებს.

- "ორბიდან" წინადადება რომ მივიღე, ბევრი ვიფიქრე, - გვითხრა მამუკა ტურაშვილმა, - იოლი არ იყო "დინამოს" დატოვება, რადგან დიდი ხანია, ამ გუნდში ვარ. თუმცა ვთვლი, რომ ამ ეტაპზე სწორი გადაწყვეტილება მივიღე.

"დინამოში" ასისტენტად ვმუშაობდი, ახლა, დროა, მთავარი მწვრთნელის ფუნქციები შევასრულო. მითუმეტეს, რომ საინტერესო გუნდთან მომიწევს მუშაობა. კარგი დამოკიდებულება მაქვს კლუბის ხელმძღვანელობასთან, მწვრთნელ ნინო ყიფშიძეს ბავშვობიდან ვიცნობ, ვახლობლობ, ასევე გუნდის გუნდის პრეზიდენტ თორნიკე გიორგაძესთან.
მამუკა ტურაშვილის მისვლამდე "ორბმა" "ა" ლიგაში 4 მატჩი გამართა და ოთხივე მოიგო.

- კარგი გუნდია, კარგადაა მომზადებული და ჯერჯერობით ვცდილობ ხელი არ შევუშალო. პლეი ოფისთვის კი, თამაში კიდევ უნდა გავაუმჯობესოთ. რა თქმა უნდა, ისევე როგორც ნებისმიერ მწვრთნელს, მაც მაქვს შენიშვნები, რომლებიც უნდა გამოვასწოროთ და დასახულ მიზნამდე მივიდეთ.

სეზონის დასაწყისში პრეზიდენტმა თორნიკე გიორგაძემ გვითხრა - ამ სეზონში ჩვენი მიზანი სუპერლიგის საგზურის მოპოვებააო. "ა" ლიგიდან (სადაც 6 გუნდი თამაშობს) უმაღლესში პირდაპირი გზით ერთი გადადის, ფინალისტი კი ამ სეზონში სუპერლიგის მეათეადგილოსანთან იბრძოლებს.

- "ორბში" იმიტომაც მივედი, რომ მაღალ მიზნებს ისახავს. ჩვენი ამოცანა "ა" ლიგის მოგებაა. შემადგენლობაც შესაბამისია. როდესაც გუნდში შუა სეზონში მიდიხარ, მოთამაშესაც და მწვრთნელსაც სჭირდება გარკვეული დრო ადაპტაციისთვის. თუმცა, იმედი მაქვს, პლეი ოფამდე ჩემი სტილის ვარჯიშებსაც მიეჩვევიან და გადამწყვეტ მატჩებს სასურველ ფორმაში შევხვდებით.

"ორბი" "ა" ლიგის პირველ წრეს 4 მარტს "მეგასთან" მატჩით დაასრულებს. წრის შეფასება ნინო ყიფშიძეს ვთხოვეთ, რომელიც ამჟამად მამუკა ტურაშვილის ასისტენტია, მანამდე კი ორ მატჩში მოაგებინა - "თელავთან" და "კავკასიასთან".

- ჩემპიონატს კარგად მომზადებულები შევხვდით და შედეგიც მივიღეთ. "ა" ლიგას უდანაკარგოდ ვლიდერობთ. ეს დადებითი მოვლენაა იმის ფონზე, რომ გუნდში მწვრთნელების არაერთი ცვლილება განხორციელდა. სეზონი ლევან ფაცაციამ დაიწყო, შემდეგ მე გადავიბარე, ახლა მამუკა ტურაშვილი განაგრძობს. მიუხედავად ნორმალური შედეგებისა, მე და თორნიკემაც გადავწყვიტეთ, მამუკა ტურაშვილი მოგვეწვია. ეს არის კოლოსალური სამუშაო და ვფიქრობ, მამაკაცის ხელი უფრო საჭიროა.

როგორც ნინო ყიფშიძემ გვითხრა, მიმდინარეობს მუშაობა გუნდის გაძლიერებაზე. შემადგენლობაში არის ერთი თავისუფალი ადგილი...

- ვფიქრობთ კარგი ცენტრის ჩამოყვანას. იმ მიზნის მისაღწევად, რომელიც სეზონის დასაწყისში დავისახეთ, რესურსის მაქსიმალურად ამოქმედება გვჭირდება. განაცხადში გვაქვს თავისუფალი ადგილი და მას ტანმაღალი ლეგიონერით შევავსებთ.

481
მკითხველის კომენტარები / 1 /
მანანა
0
ღირსეული ნაბიჯი
მსგავსი ამბები
რუბრიკის სხვა სიახლეები
;