[VIDEO] მანუჩარ კვირკველია: ოლიმპიადის წინ ინგამ მითხრა - 13 აგვისტოსაა ფინალი, შენთვის 13 ბედნიერია, იმიტომ, რომ...

ორთაბრძოლისას ისე ვფრთხილობდი, რომ მეტოქეს ნეკნი გავუტეხე

ზაფხულის XXIX ოლიმპიური თამაშები 2008 წლის 8-24 აგვისტოს პეკინში (ჩინეთი) გაიმართა. ოლიმპიადის გახსნის დღეს დაემთხვა რუსეთ-საქართველოს ომი, რომელიც, ოლიმპიადის პარალელურად, მსოფლიოს ყურადღების ცენტრში მოექცა. მძიმე ფსიქოლოგიური ტრავმის მიუხედავად, ქართველმა სპორტსმენებმა ჩინეთის თამაშებში სამ-სამი ოქროს და ბრინჯაოს მედალი დაიმსახურეს: ოლიმპიური ჩემპიონები გახდნენ მანუჩარ კვირკველია (ბერძნულ-რომაული ჭიდაობა), ირაკლი ცირეკიძე ( ძიუდო) და რევაზ მინდორაშვილი (თავისუფალი ჭიდაობა), ხოლო მესამე ადგილებზე ნინო სალუქვაძე (ტყვიის სროლა), ოთარ თუშიშვილი (თავისუფალი ჭიდაობა) და გიორგი გოგშელიძე (თავისუფალი ჭიდაობა) გავიდნენ.

ყველამ გაიგოს, ყველამ იცოდეს...

უნებურად 2007 წლის ევროპის ჩემპიონატის ფინალი გამახსენდა - 74 კილოში მანუჩარ კვირკველია ჭიდაობის საერთაშორისო ფედერაციის მაშინდელ პრეზიდენტ რაფაელ მარტინეტის შვეიცარიელ ფავორიტ რეტო ბუჩერს დაუპირისპირდა. მსაჯებმა პირველი პერიოდი ჩვენებურს აშკარად წააგებინეს. მეორე რაუნდში ქართველმა ფალავანმა წონასწორობა აღადგინა, მესამეში კი ძალოსანივით მკერდამდე აიტაცა შვეიცარიელი, გემრიელად ჩაიხუტა გულში, მერე ამოატრიალა და ხალიჩაზე რომ დაახეთქა, ნირწამხდარ არბიტრებს ეგონათ, იატაკი ჩაინგრაო.

[VIDEO] რევაზ მინდორაშვილი: თამილას დავურეკე და კახურად ვუთხარი... ოლიმპიური მედალიც მის სახელზე მოვიპოვე

მსგავსი რამ 2008 წელს პეკინშიც გამეორდა, ისიც - ფინალში: მანუჩარმა მასპინძელთა კერპი იუნ-სიან ჩანი უკუსარტყლიდან ეფექტური გდებით ისე დაანარცხა ხალიჩას, მეტოქეს კი არა, ლამის მთელ ჩინეთს თავბრუ დაეხვა.
ძნელი გზა გაიარა კვირკველიამ ოლიმპიური კვარცხლბეკის უმაღლეს საფეხურამდე, თანაც ისეთი ზიგზაგებით, რომ გულშემატკივრები გვარიანად გვანერვიულა.

ოზურგეთში დაბადებულ-გაზრდილმა ფალავანმა (თავიდან გურამ მაჭარაშვილთან ვარჯიშობდა, მერე ჯონი რეხვიაშვილსა და ბეგი დარჩიასთან იმაღლებდა ოსტატობას) 2002 წელს მსოფლიო ჩემპიონატზე მესამე ადგილი დაიკავა, ევროპის ჩემპიონატზე კი ერთი საფეხურით დაწინაურდა. მომდევნო წელს საფრანგეთის ქალაქ კრეტიეში პლანეტის უძლიერეს ფალავნებთან პაექრობისას ყველას აჯობა. ფინალის წინ მასთან 1989 წლის 9 აპრილს დაღუპული თამარ ჭოველიძის მამა მისულა და შეუგულიანებია - შენ შეგიძლია საქართველოს დროშა ააფრიალო და გაგვახარო, აბა, შენ იციო.

გადამწყვეტ ორთაბრძოლამდე მანუჩარმა ზედიზედ დაამარცხა კანადელი ეისლი რობინსონი, პოლონელი 1996 წლის ოლიმპიური ჩემპიონი რიჩარდ ვოლნი, 1997 წლის თურქი მსოფლიოს ჩემპიონი სერეფ ეროთლუ, რომელთანაც იმავე წლის ევროპის ჩემპიონატზე წააგო. ნახევარფინალში უნრელ ლევენტე ფურედის სძლია. მადიარმა მერე ბრინჯაოს მედალი მოიპოვა. ოქროსთვის გადამწყვეტი პაექრობის დამატებით დროში ევროპის ვერცხლის პრიზიორი, უკრაინის სახელით მოჭიდავე არმენ ვარდანიანი დაჯაბნა და მსოფლიოს ჩემპიონი გახდა.

2006 წლის მსოფლიოზე ბრინჯაოს მედალი ერგო, მომდევნო წელს სოფიაში ერთი ამოსუნთქვით მოიგო კონტინენტის პირველობა, ხოლო ბაქოში სალიცენზიო მსოფლიოს ჩემპიონატზე ხელი მოეცარა - მეორე წრეში თითქმის უბრძოლველად დათმო შეხვედრა გერმანელ კონსტანტინ შნაიდერთან და, მედალს ვინ ჩივის, უსაგზუროდ დარჩა. ამას კი არავინ მოელოდა. თავადაც.

2008 წლის სეზონი იღბლიანად დაიწყო: უნგრეთში ჯერ მსოფლიოს თასზე იყოჩაღა. ტრავმამოუშუშებელმა იქვე საერთაშორისო ტურნირზე კიდევ სამ მეტოქეს სძლია. ბორჯომის საწვრთნელი შეკრების შემდეგ ნაკრების მთავარმა მწვრთნელმა ბეგი დარჩიამ კვირკველია ევროპის ჩემპიონატზე წამსვლელი გუნდის შემადგენლობაში არ დააყენა, სამაგიეროდ, რომის სალიცენზიო ტურნირზე წაიყვანა, სადაც პეკინის ოლიმპიადის ოთხი საგზური თამაშდებოდა.
იტალიის დედაქალაქში მანუჩარ კვირკველიამ სტარტზე კანადელ კოლინ დეინესს იოლად სძლია (6:0, 6:0). მეორე წრეში ვარტერეს სამურგაშევს დაუპირისპირდა.

29 წლის რუსეთელი მოჭიდავე საკმაოდ გამოცდილი და ტიტულიანიც გახლდთ. შეჯიბრებებზე მას შეძლებული ძმები დაჰყვებოდნენ. მოსკოვში 2006 წლის ევროპის ჩემპიონატის ნახევარფინალში არბიტრებმა კვირკველიას ფანდი რატომღაც სამურგაშევს ჩაუთვალეს და ფინალში გაიყვანეს. ქართველი ფალავანი კი "ბრინჯაოს" დააჯერეს. ეს ეპიზოდი კარგად ახსოვდა მანუჩარს და მასთან პაექრობისას ფრთხილობდა. საბედნიეროდ, ამჯერად თემიდის წარმომადგენლებმა პატიოსნად იმსაჯეს. ჩვენმა მოჭიდავემ შეხვედრა 5:0, 0:6, 2:1 მოიგო. მომდევნო ორთაბრძოლებში მან ესტონელ ეერიკ აპსს, შვედ ბაბულფატს, აზერბაიჯანელ აბდულოვსაც დააყრევინა ფარ-ხმალი და პირველ ადგილთან ერთად პეკინის საგზურსაც დაეუფლა.

რომან რურუა: მსოფლიოზე 6 მეტოქე ჯამში 82:0 დავამარცხე

- რომში სალიცენზიო ტურნირის ფინალში გასვლით ოლიმპიადის საგზური გავინაღდე, - იხსენებს იმ დღეებს მანუჩარი. - გადამწყვეტი პაექრობისთვის ხალიჩაზე გასვლა არ მინდოდა, რადგან ტრავმის მეშინოდა, მაგრამ ბეგი დარჩიამ დამარწმუნა, უნდა იჭიდაოო. ორთაბრძოლისას ვფრთხილობდი, თანაც ისე, რომ მეტოქეს ნეკნი გავუტეხე...

ჩინეთის დედაქალაქში გამგზავრებამდე ნაყოფიერი საწვრთნელი შეკრებები გაიარა წახკაძორში (სომხეთი), მინსკსა და ბორჯომში; ბაქოს საერთაშორისო ტურნირზე მეორე ადგილი დაიკავა. ის იყო, პეკინში წასასვლელად ემზადებოდა, რომ წინა დღით ავტომანქანა დაამტვრია. შინ უხასიათოდ დაბრუნებულს ჩვეულებისამებრ კარებთან მეუღლე შეეგება. დაღვრემის მიზეზი რომ შეიტყო, გაუღიმა და ეს ბედნიერების ნიშანიაო, უთხრა.

- ინგა არაჩვეულებრივი პიროვნებაა - იგი არა მარტო მეუღლე, არამედ უახლოესი მეგობარიცაა, - მითხრა მაშინ პეკინიდან დაბრუნებულმა ოლიმპიურმა ჩემპიონმა. - ჩემს გამარჯვებაში მასაც მიუძღვის დიდი წვლილი. სწორედ მან შემაგულიანა პეკინში გამგზავრების წინ - 29 წლის ხარ, 29-ე ოლიმპიადაა და აუცილებლად მოიგებო; 13 აგვისტოს იჭიდავებ, შენთვის ბედნიერი რიცხვია, რადგან 13 ოქტომბერს დაიბადე, ისიც ნუ დაგავიწყდება, 13 აგვისტოს გოგონა შეგვეძინება და ხელცარიელი ხომ არ დაგვიბრუნდებიო. საკვირველია, მაინც ამდენი დამთხვევა როგორ გაიხსენა.

- და შენც იმედები არ გაუცრუე...

- საქართველოზე რუსეთის აგრესიამ ყველას თავგზა აგვიბნია. ხომ იცით, ოლიმპიადის დატოვებაც კი გვინდოდა. როგორი საქმეა, ათასობით კილომეტრი გაშორებს სამშობლოს, რომელსაც გიბომბავენ. ნათესავები, ახლობლები, მეგობრები განსაცდელში არიან, შენ კი ყველაფერი ეს უნდა დაივიწყო სარბიელზე გასვლის წინ და მხოლოდ მეტოქის დამარცხებაზე იფიქრო. ღმერთი გაახარებს ნინო სალუქვაძეს - მან მოგვცა საკუთარი თავის ძლევისა და ვაჟკაცობის მაგალითი. მისი მედალი ჩვენთვის უდიდესი სტიმული იყო...

მანუჩარ კვირკველიამ პეკინის თამაშების პირველ წრეში მსოფლიოს 2007 წლის ჩემპიონტის ფრანგ ბრინჯოს პრიზიორ კრისტოფ გენოს მოუგო, შემდეგ გერმანელ კონსტანტინ შნაიდერს შეხვდა. წინა წელს, როგორც აღვნიშნეთ, აზერბაიჯანის დედქალაქში მსოფლიოს პირველობის მეორე წრეში ალემანმა ჩვენებურს აჯობა. ჰოდა, ოლიმპიადაზე მანუჩარმა რევანში აიღო. ნახევარფინალში ევროპის 2008 წლის ჩემპიონი უნგრელი პეტერ ბაჩი გააკრა ხალიჩას ბეჭებით, გადამწყვეტ პაექრობაში კი ჩინელ იუნ-სიან ჩანს აჯობა და კვარცხლბეკის უმაღლეს საფეხურზე ავიდა.

გურამ მაჭარაშვილი: არ ვიცი, როგორ გამოვხატო, თუ რა გმირობა გამოიჩინა მანუჩარმა! აღფრთოვანებული ვარ! ორთაბრძოლებს ოზურგეთში ჩემს შეგირდებთან ერთად ვუყურებდი. ფინალური პაექრობა რომ დაიწყო, ვერ გავუძელი და ოთახიდან გავედი. ორიოდ წუთში ბიჭების სიხარულის ყიჟინამ შემძრა. შინ შებრუნებულს მანუჩარის ეფექტური გდებით სახეგაბრწყინებული ყმაწვილების თვალებმა შემომანათა. უკუგდება ბავშვობიდან გაითავისა კვირკველიამ და დღემდე ამ ილეთით მრავალ წარმატებას მიაღწია...

- მანუჩარ, კვარცხლბეკის უმაღლეს საფეხურზე მდგარს ისეთი სახე გქონდა, თითქოს რიგითი საერთაშორისო ტურნირი მოგეგოს.

- ჩემი ქვეყნის განსაცდელმა ოლიმპიური ჩემპიონობის მოპოვებით გამოწვეული სიხარული დამიჩრდილა. იმ წუთას მხოლოდ იმაზე ვფიქრობდი, ომით გაწამებულ ქართველებს ოდნავი შვება მაინც თუ მოვგვარე-მეთქი.

- ყოველივეს მიუხედავად, მთელმა მსოფლიომ დაინახა, ხუთჯვრიანი დროშით როგორ შემოურბინე სარბიელს.

- ეს იყო სიმბოლური მომენტი: ყველამ გაიგოს, ყველამ იცოდეს, რომ საქართველოს ეროვნული დროშა ყოველთვის ლაღად იფრიალებს და ვერავითარი აგრესიული ძალა მას ხელს ვერ შეუშლის-მეთქი.
ხუთი შვილის მამას სჯერა, რომ ასე იქნება მუდამ...

11532
მკითხველის კომენტარები / 0 /
მსგავსი ამბები
რუბრიკის სხვა სიახლეები
;