მანუჩარ მარკოიშვილის ნაკრებში თამაში საეჭვოა

იტალიამარკოიშვილი -არ უთამაშია

მეტად არასასიამოვნო ინფორმაცია მოვიდა იტალიიდან: "რეჯო ემილიას" მწვრთნელმა მანუჩარ მარკოიშვილი "ორლანდოსთან" გასვლით მატჩზე არ წაიყვანა. მიზეზი მარჯვენა მუხლის არეში ტკივილია.

ასეთ ინფორმაციას გამოცემა "პიანეტაბასკეტი" გვაწვდის, პუბლიკაცია კი ასე მთავრდება: თებერვლის ბოლოს მსოფლიოს ჩემპიონატის შესარჩევი ეტაპის მატჩებია. მანუჩარის საქართველოს ნაკრებში თამაში კითხვის ნიშნის ქვეშაა.

რაც შეეხება "რეჯო ემილიას", მან ორლანდოში 9 ქულის სხვაობით გაიმარჯვა - 81:70.

ესპანეთი

შენგელია - 21
შერმადინი - 16

ესპანეთის ჩემპიონატში ქართული დერბი შედგა. ერთ გუნდში თორნიკე შენგელია იყო საუკეთესო, ხოლო მეორეში - გიორგი შერმადინი. "ბასკონიამ" "უნიკახას" უმასპინძლა და თანაბარი პირველი ნახევრის შემდეგ, საბოლოოდ დამაჯერებლად, 96:78 დაამარცხა.

მატჩი საინტერესოდ წარიმართა, თუმცა პირველი ნახევარი დაძაბულობით მეორეს სჯობდა. დიდ შესვენებაზე მალაგელები 38:36 იგებდნენ, რაც, უპირველესაც, შერმადინის დამსახურება გახლდათ. ქართველი ცენტრი სტუმართა შორის გამორჩეული იყო და საბოლოოდ "უნიკახაში" საუკეთესო შედეგი დააფიქსირა.

შერმადინი სასტარტო ხუთეულში იყო და მოედანზე 24 წუთი გაატარა: 5-დან 4 ორქულიანი და 8-დან 8 საჯარიმო ჩააგდო, 16 ქულა დააგროვა და ამას 2 მოხსნა, 1 პასი და ჩაჭრა მოაყოლა. ქართველი ცენტრის სარგებლიანობის კოეფიციენტი მალაგელთაგან საუკეთესო - 23 გახლდათ.

გადავინაცვლოთ გამარჯვებულ ბასკონიელთა ბანაკში, სადაც საუკეთესო ასევე ქართველი, ვიტორიული კლუბის კაპიტანი, თორნიკე შენგელია გახლდათ. თოკოს სასტარტო ხუთეულში არ უთამაშია, თუმცა ეს არაფერს ნიშნავს.

შენგელია შედეგიანად ჩაერთო თამაშში და მოედანზე მატჩის მონაწილეთა შორის ყველაზე მეტი, 28 წუთი გაატარა. ქართველმა ფორვარდმა 9-დან 6 ორქულიანი, 3-დან 2 სამიანი და 4-დან 3 საჯარიმო ჩააგდო.

შენგელიას მონაგარმა 21 ქულა, 9 მოხსნა და 2 პასი შეადგინა. მისი სარგებლიანობის ინდექსმა კი 28-ს უწია, რაც ორივე გუნდის შემადგენლობაში საუკეთესო შედეგი გახლდათ.

ამ გამარჯვებამ "ბასკონიას" ცხრილში მე-3 ადგილი მოუტანა, ხოლო "უნიკახა" მე-6 პოზიციამდე დაქვეითდა. ესპანეთის ჩემპიონატის შემდეგი ტური 3-4 მარტს გაიმართება, მანამდე ევროლიგის, ესპანეთის თასისა და ეროვნული ნაკრებების საკვალიფიკაციო მატჩებია.
ადრიატიკა

ბითაძე - 9

გოგა ბითაძის გუნდმა "მეგ ბიმაქსმა" ადრიატიკის ლიგაში მორიგი, რიგით მე-7 გამარჯვება მოიპოვა. მან სერბულსავე "რაბოტნიჩკის" უმასპინძლა და დაძაბულ ბრძოლაში - 74:72 მოიგო.

18 წლის ქართველი ცენტრი სასტარტო ხუთეულში იყო და 22 წუთში 8 ქულა, 9 მოხსნა, 2 პასი, 1 ჩაჭრა და 1 დაფარება მიითვალა. გოგამ 3-დან 1 ორქულიანი, 4-დან 1 სამქულიანი და 4-დან 3 საჯარიმო ჩააგდო.

გამარჯვებაში გოგას ლომის წილი მიუძღვის: საფინალო სირენამდე 4 წამით ადრე მან ჩოვიჩს დაუფარა, რის შედეგადაც სწრაფი შეტევა განხორციელდა და იარამაზმა ორქულიანით "მეგას" 74:72 მოაგებინა.

"მეგა ბემაქსმა" სატურნირო ცხრილში მე-9 ადგილზე გადაინაცვლა, მომდევნო მატჩს კი 5 მარტს, ხორვატიაში, "ზადარის" წინააღმდეგ გამართავს.

თურქეთი
დიქსონი - 3

თურქეთის მეორე ლიგაში 14 წუთი ითამაშა მაიკლ დიქსონმა, რომლის "ბაჰჩეშეჰირმა" "ანკარა" 81:74 დაამარცხა.
მაიკლმა მატჩი 2 ქულითა და 3 შედეგიანი გადაცემით დაასრულა.
"ბაჰჩეშეჰირს" 13 მოგება, 8 წაგება აქვს და ცხრილში მე-6 პოზიციაზეა.

ყოველდღიური სპორტული გაზეთი "ლელო"
1413
მკითხველის კომენტარები / 0 /
მსგავსი ამბები
რუბრიკის სხვა სიახლეები
;