მანჩესტერული ანეკდოტები, ანუ გამოცდა, სახელად 'პოლ პოგბა'

"მანჩესტერ იუნაიტედის" თავს ბოლო დროს ძალიან სასაცილო ამბები ხდება, რომელსაც ანეკდოტური ელფერიც კი დაჰკრავს. როგორი საქმეა, ანდერ ერერას უფასოდ წასვლის საშუალება მისცე და ამავე დროს კვირაში 400 ათასი ფუნტი უხადო ალექსის სანჩესს, რომელსაც კლუბისთვის ვერანაირი სარგებლობა ვერ მოაქვს.

ალექსის სანჩესის მაგალითი უპრეცედენტოა. ის წელიეადში მართლაც რომ უზარმაზარ თანხას, 13 მილიონ გირვანქას იღებს და ფეხბურთს საერთოდ არ თამაშობს. რა თქმა უნდა, ეს დიდი ვერაფერი მაგალითია "წითელი ეშმაკების" დანარჩენი ფეხბურთელებისთვის და ნათლად მეტყველებს იმაზე, რომ კლუბში ყველაფერი რიგზე ვერ არის.

ცოტა ხნის წინ "იუნაიტედს" კონტრაქტის გაგრძელებაზე უარი უთხრა ესპანეთის ნაკრების მეკარე დავიდ დე ხეამ. კლუბი და ფეხბურთელი ხელფასზე ვერ შეთანხმდნენ. დე ხეამ ღიად განაცხადა, რომ ის იმაზე ნაკლებ ხელფასს არ იმსახურებს, ვიდრე იღებს სანჩესი.

ამ იდეას ოდნავ მოგვიანებით მხარი დაუჭირა მარკუს რაშფორდმა. ორ კვირაში უსრულდება კონტრაქტი ხუან მატას და ის, დიდი ალბათობით, გუნდიდან წავა. რაც შეეხება პოლ პოგბას, მისი საკითხი ჯერ კიდევ გადასაწყვეტია. ცნობილია, რომ პოგბასაც სურს გუნდის დატოვება.

პოგბას "იუნაიტედთან" კონტრაქტს ვადა 2021 წელს ეწურება. გამოდის, რომ მისი გაგრძელებაა საჭირო. ეს ზაფხული კი ერთადერთი შანსია იმისთვის, რომ თუ კონტრაქტი არ გაგრძელდება, პოგბა რეალურ ფასად გაიყიდოს.

26 წლის მსოფლიოს ჩემპიონსა და "მანჩესტერს" შორის ახალი კონტრაქტის თაობაზე მოლაპარაკება ჯერ კიდევ მაისში წარიმართა. ფრანგმა არაორაზროვნად განაცხადა კლუბის აღმასრულებელ თავმჯდომარე ედ ვუდვორდთან საუბარში, რომ მხოლოდ იმ შემთხვევაში დარჩება, თუ კვირაში 500 ათას გირვანქას მიიღებდა. ვუდვორდის ინიციატივით, მოლაპარაკებები შეწყდა. სხვანაირად რომ ვთქვათ, მან გარკვეული დრო ითხოვა მოფიქრებისთვის.

 "მანჩესტერ იუნაიტედში" სამი შესანიშნავი წელი გავატარე. რა თქმა უნდა, იყო როგორც ცუდი, ისე ძალიან კარგი მომენტები. ნებისმიერი ფეხბურთელი ასეა. რაც შეეხება ბოლო სეზონს, თუ ჩვენ კარგად დავაკვირდებით მოვლენებს, ვნახავთ, რომ ის საუკეთესო იყო ჩემს მანჩესტერულ კარიერაში. ახლა მე თამამად შემიძლია განვაცხადო, რომ მჭირდება ახალი გამოწვევა და ძალიან კარგი იქნება, თუ მას სადმე ვიპოვი", - როგორც ხედავთ, პოგბა წასვლის სურვილს არ მალავს.

 მის ამ განცხადებას არაერთგვაროვანი რეაქცია მოჰყვა "მანჩესტერის" გულშემატკივრებს შორის. ფაქტია, ყველა მათგანი გაბრაზდა. ზოგიერთი მიიჩნევს, რომ პოლის განცხადება უბრალოდ სისულელეა. როგორ შეიძლება, ფეხბურთელს კარგი სეზონი ჰქონდეს მაშინ, როცა მთლიანობაში გუნდს აქვს საშინელი სეზონი (თუ არ ჩავთვლით მცირე აღმაფრენას ოლე გუნარ სულშერის მოსვლის პერიოდში). მეორე კატეგორია კი ბრაზს ვერ მალავს იმის გამო, რომ პოგბა ღიად ლაპარაკობს წასვლაზე მაშინ, როცა მან ამ სამი წლის განმავლობაში იმდენი ვერ მისცა "იუნაიტედს", რამდენიც შეეძლო.

და ესეც ვიკითხოთ - სად მიდის პოგბა? მას ძალიან უნდა "რეალში" გადასვლა, სადაც მას ზინედინ ზიდანი ელის. ცნობილია, რომ ის და ზიზუ ერთმანეთს ძალიან დიდ პატივს სცემენ (პოლს არაერთხელ უთქვამს, რომ ზიდანთან მუშაობაზე ოცნებობს). ამდენად, ფრანგი მწვრთნელი ყველაფერს გააკეთებს საიმისოდ, რომ ედენ აზარის შემდეგ "სანტიაგო ბერნაბეუზე" პოგბაც აღმოჩნდეს. ზიდანმა აღფრთოვანებით ილაპარაკა თანამემამულე ვარსკვლავზე:

 "რა თქმა უნდა, მე ძალიან მომწონს პოლ პოგბას თამაში და ამ მხრივ არ ვარ გამონაკლისი - ყველა მწვრთნელს ძალიან მოსწონს კარგი ფეხბურთელები, პოგბა კი სწორედ ასეთია. ის ახლა "მანჩესტერ იუნაიტედის" ღირსებას იცავს. მას ერთნაირად კარგად შეუძლია თამაში როგორც დაცვაში, ისე შეტევაში", - ამბობს ზიდანი.

მოკლედ, ვითარება ასეთია: "მანჩესტერ იუნაიტედს" პოგბას სანაცვლოდ რაც შეიძლება, მეტი თანხის მიღება უნდა. თავის მხრივ, "რეალი" ცდილობს, ფრანგი ვარსკვლავი ხელში რაც შეიძლება, იაფად ჩაიგდოს.

ახლა კი დავსვათ ჩვენი წერილის მთავარი კითხვა. რაში სჭირდება "იუნაიტედს" პოგბა? რა თქმა უნდა, ის ძალიან მაგარი ფეხბურთელია, მაგრამ პოლმა უკვე რამდენჯერმე განაცხადა ღიად, რომ "ოლდ ტრაფორდზე" მოტივაცია ამოწურა.

როცა პოგბა ახალმისული იყო "მანჩესტერში", მაშინ არ იკლავდა თავს და რას იზამს ახლა, თუ მას ძალით დატოვებენ გუნდში? რა თქმა უნდა, ეს არ შედის კლუბის ინტერესებში. ჩვენ არაერთხელ ვნახეთ, თუ რას ნიშნავს მოტივაციის გარეშე მოთამაშე პოგბა. პირდაპირ უნდა ითქვას, რომ ეს მაინცდამაინც დიდი სიამოვნება არ არის.

 უნდა გავითვალისწინოთ ის ფინანსური ზარალიც, რომელსაც "იუნაიტედი" უსათუოდ მიიღებს იმ შემთხვევაში, თუ პოგბას ამ ზაფხულს არ გაყიდის. ეს არ იქნება პატარა თანხა. ლაპარაკია მილიონებზე. ცნობილია, რომ ვუდვორდს განსაკუთრებით უყვარს ფული...

 მოკლედ, პოლ პოგბა კიდევ ერთი დიდი გამოცდაა "მანჩესტერ იუნაიტედის" შეფობისთვის - გამოცდა, რომელსაც ფრიადზე სჭირდება ჩაბარება, მაგრამ ეს იოლი ნამდვილად არ იქნება. წერილის დასაწყისშიც აღვნიშნეთ - "მანჩესტერ იუნაიტედი" არის კლუბი, რომელიც ხელმძღვანელობის უცნაური გადაწყვეტილებების გამო ძალიან ხშირად ვარდება ტრაგიკომიკურ სიტუაციებში.

ყოველდღიური სპორტული გაზეთი "ლელო"
650
მკითხველის კომენტარები / 0 /
მსგავსი ამბები
რუბრიკის სხვა სიახლეები
;