"მანჩესტერ იუნაიტედი" დიდი ცვლილებების მოლოდინში

სანაკრებო პაუზა დადგა და "მანჩესტერ იუნაიტედის" ფეხბურთელებიც მთელ მსოფლიოში გაიფანტნენ, რათა თავიანთი ქვეყნების ღირსება დაიცვან მოახლოებულ სპარინგებში...

ბოლო დღეები "იუნაიტედისთვის" მტკივნეული იყო. "წითელი ეშმაკები" ჩემპიონთა ლიგიდან გავარდნენ. თუ ჟოზე მოურინიო კარგა ხანია შეეგუა იმას, რომ წლეულს პირველი ადგილი მის ისტორიულ მოქიშპე პეპ გვარდიოლას დარჩება, "სევილიასთან" მარცხი ახალი შოკი იყო და ამის გადატანა არ იქნებოდა ადვილი.

ეს გამოჩნდა კიდეც ქარიზმატული პორტუგალიელის ბოლო პრესკონფერენციაზე, სადაც ის 12-წუთიანი მონოლოგით წარსდგა ჟურნალისტების წინაშე და გვარიანად გამოლანძღა თავისი ფეხბურთელები. "ღირსების, კლასისა და ბრძოლის ჟინის არარსებობა" - ასეთია მისი შეფასება.

ფეხბურთელებთან მიმართებაში ყველაფერი გასაგებია. ცოტა ხნის წინ მოურინიომ კბილი გაჰკრა კლუბის მესვეურებსაც, როცა თქვა - მაღალ მიზნებს რომ შევეჭიდოთ, მეტი ინვესტიციაა საჭირო, შემადგენლობა უნდა გავაძლიეროთო...

მოკლედ რომ ვთქვათ, ასეთი სიტუაციაა - კლუბის ბოსები ფულს აძლევენ მწვრთნელს, ხოლო ფეხბურთელებს თამაში არ უნდათ. აბა, მე რა ვქნა ასეთ სიტუაციაშიო?! - დაახლოებით ასეა. ანუ, დამნაშავეა ყველა, გარდა მოურინიოსი.

ამ სეზონში "იუნაიტედს" ერთი ტიტულის მოგების შანსი მაინც დარჩა. ეს არის ასოციაციის თასი, რომლის ნახევარფინალში "ტოტენჰემს" უნდა შეხვდეს (მეორე ნახევარფინალში ერთმანეთს "ჩელსი" და "საუთჰემპტონი" დაუპირისპირდებიან) და ვერავინ იტყვის, რომ "უემბლიზე" ვინმეს რაიმე გარანტირებული აქვს.

ტრადიციულად, ინგლისში ასოციაციის თასს დიდი სატურნირო წონა აქვს და მისი მოგებაც პრესტიჟულია, მაგრამ გრანდებისთვის ახლა სხვა საზომია დაწესებული - მინიმუმ ქვეყნის ჩემპიონი უნდა გახდე, ხოლო მაქსიმუმ - ჩემპიონთა ლიგა მოიგო...

ამ ფრონტზე "მანჩესტერის" მატარებელი უკვე ჩავლილია და გასაგებია მოურინიოს გაღიზიანებაც. ვიდრე მას "ზემოდან" შეუტევენ, ურჩევნია თავად გადავიდეს იერიშზე, რადგან იცის, რომ საუკეთესო თავდაცვა შეტევაა. ოღონდ, უკეთესი იქნებოდა, ამ პრინციპს უშუალოდ საფეხბურთო მოედანზე უერთგულოს.

აღმოჩნდა, რომ მისი სიტყვები - "როცა ვიგებთ, ვიგებთ ყველა, ხოლო როცა ვაგებთ, ვაგებთ ყველა" - უკვე იგნორირებულია. ჩანს, ყველაფერი ფეხბურთელების ბრალი ყოფილა. თუმცა ეს სხვა თემაა...

ახლა კი მთავარზე. დღეს ქერინგტონის საწვრთნელ კომპლექსს უნდა ეწვიოს "იუნაიტედის" ბოსი ედ ვუდვორდი, ვისაც მოურინიო მომავალი ზაფხულისთვის ახალი ინვესტიციის საჭიროებაზე დაელაპარაკება.

გუნდის რეკონსტრუქციისთვის ჟოზეს, არც მეტი, არც ნაკლები, 300 მილიონი ფუნტი სჭირდება, ოღონდ, ეს ფული მარტო ბოსის ჯიბიდან ვერ მოვა. როგორც ამბობენ, "მანჩესტერი" ზაფხულში 9 ფეხბურთელს გაყიდის.

გასაყიდთა სიაში ერთ-ერთი პირველი ლუკ შოუ იქნება, ისევე, როგორც მატეო დარმიანი და დელეი ბლინდი. სხვათა შორის, შოუმ აღნიშნა, რომ ძალიან არ მოეწონა მწვრთნელის კომენტარები კონკრეტულად მასთან მიმართებაში.

ჟოზემ თქვა, რომ "იუნაიტედს" ყველაზე მეტი საფრთხე სწორედ შოუს ფლანგიდან ემუქრებოდა. გავითვალისწინოთ ისიც, რომ მოურინიოს მასთან მანამდეც არ ჰქონია სიამტკბილობა...

ანდერ ერერა, ანტონი მარსიალი, ხუან მატა და კრის სმოლინგი - არც ამ ოთხეულს აქვს გარანტირებული, რომ მისი სამუშაო ადგილი მომავალ სეზონშიც "ოლდ ტრაფორდი" იქნება.

მით უმეტეს, ეს ეხება მარუან ფელაინისაც, ხოლო რაც შეეხება მაიკლ ქერიკს, ის დიდი ხანია იგნორირებულია მოურინიოს მიერ და ერთი ხანობა, ფეხბურთიდან წასვლაზეც ფიქრობდა...

ჯერჯერობით, მწირია ინფორმაცია იმ ფეხბურთელებზე, რომლებზეც ახალი "იუნაიტედი" უნდა აშენდეს. ამიტომ, უნდა დაველოდოთ მოვლენათა

განვითარებას. ჯერ მაინც არავინ იცის ზუსტად, ვის დაბრალდება საბოლოოდ სეზონის ფიასკო, არავინ იცის, რას ფიქრობს "მანჩესტერის" დირექტორატი, ვის ერგება ბოლოს და ბოლოს განტევების ვაცის სტატუსი - ფეხბურთელთა დიდ ჯგუფს თუ მთავარ მწვრთნელს?

ყოველდღიური სპორტული გაზეთი "ლელო"
752
მკითხველის კომენტარები / 0 /
მსგავსი ამბები
რუბრიკის სხვა სიახლეები