მანჩინი ცვლილებებს გეგმავს

იტალიის ნაკრებმა ერთა ლიგა პოლონეთთან ბოლონიური ფრით (1:1) დაიწყო. რა თქმა უნდა, "სკუადრა აძურას" ქომაგები გაწბილებულები არიან, მაგრამ, მეორე მხრივ, საქმე ისე წავიდა, ქულითაც კმაყოფილები უნდა იყვნენ - რობერტო მანჩინის გუნდმა ქულა 78-ე წუთზე, ჟორჟინიოს პენალტით გადაარჩინა.

ცხადია, უკმაყოფილო დარჩა თავად მანჩინიც, თუმცა ეს დიდწილად ეხება შედეგს და არა - თამაშის ხარისხს, რომელიც "აძურას" მწვრთნელს დიდად არ გაუკრიტიკებია.

მატჩისშემდგომ პრესკონფერენციაზე მან თქვა, რომ პორტუგალიასთან თამაშისთვის, რომელიც 10 სექტემბერს ლისაბონში გაიმართება, ცვლილებებს გეგმავს.

"პირველ ტაიმში ძალიან ხშირად ვკარგავდით ბურთს და მეტოქის კართან ვერ ვიმოქმედეთ საკმარისად მწვავედ. რა თქმა უნდა შედეგით უკმაყოფილო ვარ, მაგრამ თამაშის ხარისხს არა უშავდა, ბიჭებმა გააკეთეს ყველაფერი საიმისოდ, რათა მოგვეგო...

ბალოტელი? ის არ არის ახლა საუკეთესო კონდიციებში, თან მატჩის წინ კუნთის სტკიოდა, მაგრამ გუნდისთვის უდავოდ საჭირო ფეხბურთელია...

კიეზა ახალგაზრდაა და აუცილებლად მოუმატებს. ის შეცვალზე შევუშვით და ვფიქრობ, სწორად მოვიქეცით. მას აქვს ის თვისებები, რაც აკლიათ სხვებს...

ბერნარდესკიმაც კარგად ითამაშა. ის ძალიან ტექნიკურია და უზარმაზარი პოტენციალი აქვს იმისთვის, რომ მოუმატოს...

პორტუგალიასთან მატჩისთვის აუცილებლად იქნება გარკვეული ცვლილებები. პოლონეთთან მეორე ტაიმში კარგად ვითამაშეთ და სწორედ ამაზე უნდა ავაგოთ გუნდის მომავალი. პორტუგალიასთან გაცილებით უკეთესი შედეგი გვჭირდება, ვიდრე პოლონეთთან გვქონდა", - თქვა მანჩინიმ.

959
მკითხველის კომენტარები / 0 /
რუბრიკის სხვა სიახლეები
;