მარაკეშის ტურნირი. არასრული და ოქტეტი მაროკოში ძიუდოისტთა გრან პრიზე

დღეს მაროკოს ქალაქ მარაკეშში ძიუდოისტთა გრან პრი იწყება, რომელშიც საქართველოს ვაჟთა ნაკრებიც მიიღებს მონაწილეობას. ოღონდ - არასრული გუნდით, სულ 8 სპორტსმენით, ორ ზედა წონას - 100 და +100 კილოგრამებს კი საერთოდ გამოვტოვებთ.

მაროკოში ამირან პაპინაშვილი (60), გიორგი გუგულაშვილი, ნიკო ჭიკაიძე (ორივე - 66), ლაშა შავდათუაშვილი, ფრიდონ გიგანი (73), ნუგზარ ტატალაშვილი, ბექა დონღვანი (81) და გიორგი პაპუნაშვილი (90) იჭიდავებენ.

მაროკოულ ტურნირზე მედლების მოპოვებას დღეს 60-66 წონების ფალავნები შეეცდებიან, ხვალ - 73-81-ისა პაპუნაშვილი კი კვირას იასპარეზებს.

ევროპის ჩემპიონი და მსოფლიოს ორგზის მესამე პრიზიორი ამირან პაპინაშვილი (60), როგორც რეიტინგის ლიდერი, პირველ წრეში ისვენებს, მისი პირველი მეტოქე კი ყაზახი მაგჟან შამშადინისა და თურქი სამეტ კუმტასის პაექრობაში გამოვლინდება.

66 კილოგრამში ჩვენი ორივე წევრი პირველივე წრიდან დაიწყებს ასპარეზობას. გუგულაშვილი ერაყელ აიოუბ ელიდრისის გაეჯიბრება, ამათში მოგებულს კი მეორე ეტაპზე უზბეკი შაკრამ ახადოვი ელოდება. ჭიკაიძე პოლონელ პატრიკ ვავრიჟჩეკს გაეჯიბრება, ხოლო თუ მოუგებს, სერბ სტრაჰინია ბუნჩიჩს გაეჯიბრება.

ტურნირზე ოლიმპიური და მსოფლიოს ჩემპიონი შავდათუაშვილიც რეიტინგის ლიდერია და პირველ წრეში ისიც ისვენებს, თუმცა მეორე წრეში მისი მეტოქე ახლავეა ცნობილი - ალჟირელი ფეტჰი ნურინე. მეოთხედფინალში ჩვენებურს სავარაუდო მეტოქეთა შორის გერმანელი იგორ ვანდტკეც ჰყავს, ვინც არცთუ სასურველი მეტოქეა მისთვის. მართალია, 4 შეხვედრიდან სამი მოუგო, მაგრამ წააგო ბოლო, მეოთხე პაექრობა - შარშან, ევროპის ჩემპიონატზე.

მაროკოში არ გამოდის იაპონიის ნაკრები (ისე კი 67 ქვეყანა მონაწილეობს). შესაბამისად, არც მათი მსოფლიოს ჩემპიონი და რეიტინგის ლიდერი სოიჩი ჰაშიმოტო ასპარეზობს. მის არყოფნაში შავდათუაშვილს რეიტინგის პირველ ნომრად გადასვლის შანსიც ეძლევა, თუმცა ეს დამოკიდებულია იმაზე, რამდენად შორს წავა ტურნირზე. ამავე წონაში გიგანი პირველივე წრეში ჭიდაობს, სადაც შვეიცარიელ ტიმო ალემანს ხვდება, ამ წყვილის გამარჯვებული კი მეორე წრეში ყაზახ ჟანსაი სმაგულოვს ხვდება.

ევროპის ორგზის ფინალისტი ტატალაშვილიც პირველივე წრიდან ჩაებმება შეჯიბრებაში, სადაც მასპინძელი ზაიდ იასიფი ერგო მეტოქედ. ამათში გამარჯვებულის მომდევნო მეტოქე ამერიკელი არტურ ვრაიგტი იქნება. ამ ჯგუფის ლიდერია თურქთა სახელით მოჭიდავე ქართველი მსოფლიოს მესამე პრიზიორი ვედატ ალბაირაქი.

დონღვანიც პირველივე წრეში იჭიდავებს ესპანელ ხოსე მარია მენდიოლა იზქუიტასთან, ამათგან უმჯობესის მომდევნო მეტოქე კი ბულგარელი ივაილო ივანოვია.
დაბოლოს, საქართველოს ჩემპიონი პაპუნაშვილი... ის პირველ წრეში თავისუფალია, მეორეში კი შვეიცარიელ კირილ გროსკლაუსს შეხვდება.

დანარჩენ წონებთან დაკავშირებით ერთს შევნიშნავთ: მაროკოში კვლავაც არ ჭიდაობს მსოფლიოს 10-გზის და ორგზის ოლიმპიური ჩემპიონი, ფრანგი ტედი რინერი (+100). ის თავდაპირველად კი დარეგისტრირდა შეჯიბრებაზე, მაგრამ მოგვიანებით განაცხადა, რომ ტრავმის გამო არ იჭიდავებდა და მხოლოდ შეკრებაზე ჩავიდოდა მაროკოში.

ყოველდღიური სპორტული გაზეთი "ლელო"
527
მკითხველის კომენტარები / 0 /
მსგავსი ამბები
რუბრიკის სხვა სიახლეები
;