მარია შარაპოვას ავტობიოგრაფია: მაქსს არ აინტერესებდა ჩემი თმის ფერი, სქესი...

(გაგრძელება. დასაწყისი "ლელო" N224, 225, 226, 227, 229, 230, 231, 232, 234, 235, 236, 237, 239, 240, 241, 242, 243, 245, 246, 247)

მარია შარაპოვას ავტობიოგრაფია: ეს არის ვნება, მაგრამ არა უბრალოდ ვნება

მარია შარაპოვას ავტობიოგრაფია: ვინ არის ბეტსი? რა შეცვალა მაშას კარიერაში?

მარია შარაპოვას ავტობიოგრაფია: ზებრა! - ასეთი იყო ჩემი ცხოვრება

გევინმა მოყოლა გააგრძელა: ჩრდილში ვიდექი. საშინელი სიცხე იყო. კორტზე უკვე იდგა ჰიტერი (ჩოგბურთში - ძლიერი დარტყმის მქონე ჩოგბურთელი). და აი, გამოჩნდა პატარა გოგო გრძელი ქერა თმით და მწვანე თვალებით. ოდნავ გამობურცული მუხლები და წვრილი ფეხები. სწორედ ასეთი იყავი. მაგრამ თვალები! მასში ჩანდა ჭკუა, მზერა კი ძალიან მახვილი იყო. აბსოლუტურად მზად იყავი. და ეს აშკარად გხვდებოდა თვალში. გამოხვედი კორტზე და პირველ ხუთ-ექვს წუთში პრაქტიკულად არ გაგიშვია არც ერთი მოწოდება, არც ერთი ბურთი. მსგავსი არაფერი მენახა. ხუთი-ექვსი წუთი?

ჩოგბურთში ეს მთელი ეპოქაა. შენ კი ისევ იმავე მოწოდებას ათამაშებდი. და შენი დარტყმები აბსოლუტურად ერთნაირი იყო. თანაბარი და ძლიერი. ვიდექი, გიყურებდი და ვფიქრობდი: ღმერთო, ეს სრულიად დაუჯერებელია. ვუყურებდი შენს თამაშს 30-40 წუთის განმავლობაში და სრულიად განცვიფრებული ვიყავი. არა იმით, როგორ იგერიებდი ბურთს, არამედ თამაშის გაგებით, იმის აღქმით, თუ რა ხდებოდა კორტზე.

შენ ხუთი-ექვსი დარტყმით ადრე ფიქრობდი, ამზადებდი შენს მოწინააღმდეგეს, არბენინებდი მას კორტზე, რომელსაც საჭადრაკო დაფასავით იყენებდი. და მე არ მგონია, რომ შესაძლებელია მსგავსი ხედვისა და თამაშისადმი მიდგომის შესწავლა. თამაშს ან უყურებ ასე, ან არა. როგორც უკვე ვთქვი, ყველაფერი შენს თვალებში ჩანდა. შენ გესმოდა ყველაფერი, რაც ხდებოდა კორტზე, ყველა ნიუანსი, ყველა წვრილმანი.

შემდეგ კორტი დავტოვეთ და სალაპარაკოდ დავსხედით. და მაშინ, მე პირველად წარვდექი სრულყოფილად თქვენ წინაშე. შენ იყავი ძალიან ზრდილობიანი, მაგრამ ოდნავ მორცხვი. ოღონდ არა ძალიან.

- მარია, - გკითხე მე. - რა გინდა აკეთო ცხოვრებაში?

და შენ პირდაპირ შემხედე თვალებში.

- მინდა გავხდე მსოფლიოს საუკეთესო ჩოგბურთელი, - იყო შენი პასუხი.

გევინ ფორბსი კლივლენდში თავის ოფისში დაბრუნდა და IMG-ში თავის კოლეგებთან კრება ჩაატარა. მათ ჩემ შესახებ მოუყვა და დაამატა, რომ აპირებს ხელი მოაწეროს ჩემთან კონტრაქტს, ამიტომაც ყველას მოუწევს ჩემი მხარდაჭერა.

გარკვეული დროის შემდეგ, IMG-მ სამუშაოდ აიყვანა ახალგაზრდა სპორტული აგენტი და გაგზავნა ის ბრეიდენტონში ელიტური მოთამაშეების ჯგუფთან სამუშაოდ. მას მაქს აიზენბადი ერქვა. ის ჩოგბურთს თამაშობდა პირველ სტუდენტურ დივიზიონში, მაგრამ არ აღმოჩნდა საკმარისად კარგი იმისთვის, რომ პროფესიონალებში გადასულიყო, ამიტომაც გადაწყვიტა, ჩოგბურთი ბიზნესის თვალსაზრისით გაეგრძელებინა.

მაქს აიზენბადი ერთ-ერთი უმნიშვნელოვანესი ადამიანი გახდება ჩემს ცხოვრებაში. მისი მუდმივი შემადგენელი, რომელსაც შეიძლება ყოველთვის ენდო. და კიდევ, ის არის იურის ერთ-ერთი ფავორიტი, ერთადერთი ადამიანი, ოჯახის წევრების გარდა, რომელიც გვერდით იყო, როცა ყველაფერი კარგად მიდიოდა და კიდევ უფრო ახლობელი ხდებოდა, როცა რაღაც ისე ვერ იყო. ყველას უნდა შენ გვერდით ყოფნა, როცა "დიდი სლემის" ტურნირებს იგებ, მაგრამ ვინ დარჩება შენ გვერდით მაშინ, როცა მთელი მსოფლიო შენს წინააღმდეგაა ამხედრებული? აი, ამაშია საკითხი.

მახსოვს, როგორ შევიგრძენი პირველად მაქსის გვერდით ყოფნა. ის კორტის მიღმა იდგა. უბრალოდ, იდგა და აკვირდებოდა, როგორ ვთამაშობდი. ჩემმა თამაშმა მასზე ისეთი შთაბეჭდილება მოახდინა, როგორსაც, ალბათ, მხოლოდ ჩოგბურთელზე მოახდენდა. მას შეეძლო გვერდზე გადაედო ყველა წვრილმანი, ჩემი სქესი, სიმაღლე, თმის ფერი, ასაკი და კონცენტრირებული ყოფილიყო მთავარზე - იმაზე, რაც მამოძრავებდა, თამაშის მთავარ არსზე.

- მთელი საქმე კონცენტრაციაშია, - მეუბნებოდა მაქსი. - იმაში, როგორ აფიქსირებ ყურადღებას ბურთზე, რჩები კონცენტრირებული მთავარ ამოცანაზე. შენთვის არ არსებობდა არაფერი, გარდა ბურთისა, დარტყმისა და თამაშისა. დანარჩენი სამყარო ქრებოდა. კორტზე მხარეების შეცვლის დროსაც, არაფერი არ გიფანტავდა ყურადღებას. შენ ჯდებოდი, რომ დაგესვენა, შენი ფეხები კი აგრძელებდა მოძრაობას და შენ გაყინული მზერით პირდაპირ იყურებოდი. თუ შენ გრძნობ ნიჭს და ასეთი დონის კონცენტრაციას, როცა ჯერ კიდევ ბავშვი ხარ... აგენტს შეუძლია დაინახოს კორტზე მსგავსი ამა თუ იმ ასაკის ბავშვი ცხოვრებაში მხოლოდ ერთხელ. და ისიც, თუ გაგიმართლებს.

გევინ ფორბსი იმავეზე ლაპარაკობდა.

- ეს ის არის, რაც მაშინვე გხვდებოდა თვალში, - ჰყვებოდა ის. - როცა შენ კორტზე გადიოდი, კონცენტრირებული იყავი მთელი 100 პროცენტით და ბოლომდე ასეთად რჩებოდი. ამ ასაკში ამგვარი კონცენტრირება? რამდენი წლის იყავი მაშინ? ათის? თერთმეტის? შენი კონცენტრაცია, უბრალოდ, არარეალური იყო.

მაქსი დაჯდა და გაგვესაუბრა მე და მამას და ყველაფერი თავის ადგილას დადგა. იურიმ დაურეკა გევინს იმავე საღამოს და უთხრა, რომ მაქსი - ჩვენი კაცია. რამდენიმე დღის შემდეგ მაქსმა კონსულტაცია გაიარა კოლეგებთან IMG-ში და კომპანიამ მოამზადა თავისი წინადადება და გეგმა. ამასობაში, გავრცელდა ჭორები: IMG აპირებს კონტრაქტი გააფორმოს ამ რუს გოგონასთან. და მე მაშინვე გავხდი სასურველი გემრიელი ლუკმა. აგენტები, რომლებმაც ჩემ შესახებ არაფერი იცოდნენ, მზად იყვნენ ჩემთან კონტრაქტი გაეფორმებინათ. თუნდაც, არ ჰქონოდათ ნანახი ჩემი თამაში. მაგრამ ნანახი ჰქონდა IMG-ის და ეს საკმარისი იყო. როგორ იცვლება სამყარო. სულ რამდენიმე თვის წინ, მამაჩემი "ელ-კონკისტადორიდან" გამოაგდეს და გაურკვევლობაში გაუშვეს, ახლა კი მთელი მსოფლიოდან აგენტებისა და მენეჯერების სატელეფონო ზარებს პასუხობდა.

იური ნიუ იორკში გაფრინდა, რათა ცნობილ აგენტს პოლ ტეოფანუსს დალაპარაკებოდა. მასთან არაფრისთვის მოუწერია ხელი, მაგრამ ტეოფანუსი ძალიან სასიამოვნო ადამიანი აღმოჩნდა და მამას რჩევა მისცა, რომლის წყალობითაც, გადავიტანეთ ჩვენი ცხოვრების ყველაზე რთული და მხურვალე პერიოდი, რომელიც თანდათან გვიახლოვდებოდა. მისი სიტყვები იყო ერთგვარი ჭკუის დარიგება იმ პერიოდის იურისთვის.

- აქამდე, იყავით მხოლოდ შენ და მარია, - უთხრა ტეოფანუსმა მამას. - მაგრამ, ახლა, ეს შეიცვლება. თუ თქვენი ქალიშვილი მართლაც დიდი მოთამაშე გახდება, თქვენ ვერ შეძლებთ ყველაფერი მარტო აკეთოთ. თქვენ ვერ მისცემთ მას ყველაფერს, რაც მოუნდება. ერთი ადამიანისთვის, როგორი კარგიც უნდა იყოს ის, შეუძლებელია უზრუნველყოს ყველაფერი აუცილებელი. თქვენ მოგიწევთ დაიხიოთ ერთი ნაბიჯით უკან, მოუშვათ სადავეები და საშუალება მისცეთ სხვებს, დაგეხმარონ. ეს ქალიშვილთან თქვენს ურთიერთობებზე არანაირად არ იმოქმედებს. ამის გარანტიას გაძლევთ. ეს კავშირი კიდევ უფრო მყარი გახდება.

ბოლოს და ბოლოს, ბევრი წინადადების მოსმენის შემდეგ, გადავწყვიტეთ IMG-ის შეთავაზებას დავთანხმებულიყავით, რადგან პირველებმა მოგვაქციეს ყურადღება და თან, იმ მომენტისთვის მათი წინადადება ჩვენთვის საუკეთესო იყო.

როგორც უკვე მოგიყევით, სააგენტო დაარსებული იყო მარკ მაკკორმაკისა და არნოლდ პალმერის მიერ და ახლოპარტნიორობის ატმოსფერო, რომელიც ასე შეიძლება დაახასიათო: "ჩვენ ამას ერთად ვაკეთებთ", არსად გამქრალა.

დეტალები ერთ დღეს გევინ ფორბსმა და მამაჩემმა განიხილეს. როგორც მახსოვს, ეს ტელეფონით მოხდა.

- იური, მითხარი რა გჭირდება? - იკითხა გევინმა.

- ფული, - უპასუხა იურიმ. - ფული მჭირდება. შემიძლია ანგარიში წარმოგიდგინო.

- რა თანხაზე ლაპარაკობ? - დაინტერესდა გევინი. - ოღონდ კარგად დაფიქრდი. შენ რეალურად უნდა უყურო სიტუაციას და ამავდროულად, დარწმუნებული იყო, რომ ამ ფულით შეძლებ ცხოვრებას. მე ხომ ბოსებთან უნდა წავიდე და ვაპირებ მათთვის რეკომენდაციის მიცემას - სრული მხარდაჭერა გამოუცხადონ მარიას. სურვილი მაქვს, პირველივე ჯერზე მოვაგვაროთ ყველაფერი.

იურიმ უთხრა, რომ მას დაახლოებით 50 ათასი დოლარი უნდა. მას სურდა მანქანის შეძენა, რათა ტურნირიდან ტურნირზე გვემგზავრა, ასევე ბინის ქირაობა აკადემიასთან ახლოს.

- უკვე ავარჩიე ადგილი, - თქვა იურიმ. - მე მგონი, ფასი სავსებით ადეკვატურია.

გევინმა თქვა, რომ უფრო მეტი ფული დაგვჭირდებოდა. უნდა გადაგვეხადა მწვრთნელის მომსახურება, ინვენტარის, კორტებისა და მგზავრობის თანხები, ინსტრუქტორები, სპეციალისტები და ა. შ. მოკლედ, თანხამ წელიწადში დაახლოებით 100 ათასი შეადგინა. ეს ფული IMG-ის უნდა დაებრუნებინა, როცა მე პროფესიონალებში გადავიდოდი.

(გაგრძელება იქნება)

ყოველდღიური სპორტული გაზეთი "ლელო"
13863
მკითხველის კომენტარები / 0 /
მსგავსი ამბები
რუბრიკის სხვა სიახლეები
;