მარიო მანჯუკიჩი: თუ წავაგებთ, ვერავინ დაგვადანაშაულებს!

ხორვატიის ნაკრების მარჯვენა მცველი შიმე ვრსალკო მსოფლიოს ჩემპიონატის ნახევარფინალში ვერ ითამაშებს. 11 ივლისს ბალკანელები ინგლისს ეთამაშებიან.

ვრსალკო რუსეთთან თერთმეტმეტრიანებით მოგებულ შეხვედრაში დაშავდა და დამატებით დროში, 97-ე წუთზე შესაცვლელი გახდა. ვრსალკოს მუხლი აწუხებს.
ამასობაში, ინგლისთან მატჩის წინ კომენტარი გააკეთა ხორვატიის ნაკრების ფორვარდმა მარიო მანჯუკიჩმა:

"ინგლისთან ნახევარფინალს მეც და ჩემი პარტნიორებიც მოუთმენლად ველით. დაგვრჩა თუ არა ძალები ამ მატჩისთვის? რა თქმა უნდა, დაგვრჩა. თქვენ მეკითხებით, საიდან ამდენი ძალა და ენერგია? ჩემი პასუხია - არ ვიცი, მაგრამ ფაქტია, რომ ძალები გვაქვს. ეს ალბათ განსაკუთრებული შემთხვევაა.

ჩვენ ბევრი გავაკეთეთ და კიდევ ბევრის მიღწევა გვსურს, მაგრამ თუ წავაგეთ, ალბათ, არავინ გაგვკიცხავს... რაც შემეხება მე, მუნდიალის დაწყების წინ წავიკითხე ერთი ექსპერტის მოსაზრება იმის თაობაზე, რომ ვეღარ ვნახავდით ძველ მარიო მანჯუკიჩს.

მგონი, ჩემი თამაშით ვამტკიცებ, რომ ეს არის სრულიად ახალი მარიო მანჯუკიჩი, რომელსაც შერჩა ბევრი ენერგია და მოტივაცია. ჩვენი გულშემატკივრები ჩვენთან ერთად არიან და ეს გვაძლიერებს", - თქვა ხორვატიის ნაკრებისა და "იუვენტუსის" 32 წლის შემტევმა.

ყოველდღიური სპორტული გაზეთი "ლელო"
873
მკითხველის კომენტარები / 0 /
;