მარკოიშვილი, ტყორცნა და... რეჯო ემილიას პირველი გამარჯვება

მიმდინარე სეზონში მანუჩარ მარკოიშვილის "რეჯო ემილია" იტალიის ჩემპიონატშიც წარუმატებლად ასპარეზობდა და ევროთასზეც. გუშინ ნავსი გატყდა, თანაც ვისთან? - "გალათასარაისთან", რომელიც იტალიაში 74:71 დაამარცხა.

წარმატებაში ლომის წვლილი იტალიის ნაკრების წევრ ამადეო დელა ვალეს მიუძღვის, ერთ-ერთი მთავარი შემოქმედი კი მანუჩარ მარკოიშვილია, რომელმაც ბოლო წუთებზე თანაგუნდელებს მნიშვნელოვანი ქულები მოუტანა (მის სანაქებო დაცვაზე აღარაფერს დავწერთ):

იგი მოედანზე საფინალო სირენამდე 5 წუთით ადრე დაბრუნდა, 4 წუთით ადრე შორეული სამქულიანით სხვაობა 2 ქულამდე შეამცირა - 64:66. გამარჯვების მომტანი ტყორცნა კი, მანუმ სირენამდე 31 წამით ადრე შეასრულა - საშუალო დისტანციიდან ორქულიანი ჩააგდო და სხვაობას ისეთი სახე მისცა, "გალათასარაი" დარჩენილ დროში ვერ აღმოფხვრიდა - 74:69...

..ასეც მოხდა და მარკოიშვილმა სეზონის პირველი გამარჯვება თავის ყოფილ კლუბთან მოიპოვა. მისი მონაგარი ასეთი იყო: 25 წუთი, 7 ქულა (4-დან 2 ორქულიანი, 3-დან 1 სამიანი), 2 პასი, 1 მოხსნა. დელა ვალე 27 ქულამდე ავიდა.

ევროთასზე "რეჯო ემილიას" ორი ტურის შემდეგ თითო მოგება-წაგება აქვს.

1097
მკითხველის კომენტარები / 0 /
მსგავსი ამბები
რუბრიკის სხვა სიახლეები