მარტვილის რაიონში სამეგრელოს რეგიონის საფეხბურთო აკადემია გაიხსნა

"არტვილის რაიონის სოფელ სერგიეთში იყო ერთი ძველი შენობა, რომელიც გასულ საუკუნეში სოფლის კოლმეურნეობას ეკუთვნოდა, ბოლო წლებში კი სოფლის კლუბის ფუნქციას ასრულებდა.

სამი წლის წინ, ჯესი სურმავამ, რომელიც მარტვილში ფეხბურთის განვითარებისთვის ბევრს აკეთებს, სპორტისა და ახალგაზრდობის საქმეთა სამინისტროს ხელმძღვანელებს ამ მიტოვებული შენობისა და მიმდებარე ტერიტორიის საფეხბურთო კომპლექსად გარდაქმნის იდეა შესთავაზა...

გავიდა სამი წელი და ეს ჩანაფიქრი რეალობად იქცა: გუშინ მარტვილის რაიონში სამეგრელოს რეგიონის საფეხბურთო აკადემიის გახსნის საზეიმო ღონისძიება გაიმართა.

სერგიეთში ხალხმრავლობა იყო - ვეტერანი ფეხბურთელები, კულტურისა და სპორტის მინისტრის მოადგილე შალვა გოგოლაძე, მუნიციპალური განვითარების ფონდის დირექტორი გაგი ბუაძე, ფეხბურთის ფედერაციის პრეზიდენტი ლევან კობიაშვილი და გენერალური მდივანი დავით მუჯირი, თბილისის "დინამოს" პრეზიდენტი რომან ფიფია, ადგილობრივი ხელისუფალნი...

მარტვილის ბავშვთა საფეხბურთო აკადემია სპორტისა და ინფრასტრუქტურის სამინისტროების, ფეხბურთის ფედერაციისა და ადგილობრივი მუნიციპალიტეტის ერთობლივი პროექტია.

ინფრასტრუქტურული სამუშაოები მუნიციპალური განვითარების ფონდისა და ევროპის საინვესტიციო ბანკის დაფინანსებით განხორციელდა: ადგილობრივი მუნიციპალიტეტიდან 183 ათასი ლარი დაიხარჯა, შენობის რეაბილიტაცია 728 ათასი დაჯდა, ხოლო მოედნების დაგება - 1,300 მილიონი.

2018 წელს აკადემიაში 180 ბავშვი ივარჯიშებს. მასთან თანამშრომლობით უკვე დაინტერესდა თბილისის "დინამო", აკადემიასთან ხელშეკრულება გააფორმა და წლეულს 5 ასაკობრივი ჯგუფის გუნდებზე 110 ათასი ლარის ინვესტიციას განახორციელებს.

ამაში გათვალისწინებული იქნება კვება, ბავშვების სოფლებიდან ჩამოყვანა და სპორტული ეკიპირებით უზრუნველყოფა, მწვრთნელებისთვის სახელფასო დანამატი და საწევრო გადასახადი.

ამას გარდა, "დინამო" მარტვილის აკადემიის კეთილმოწყობისთვის დამატებით 56 ათას ლარს გამოყოფს. რაც შეეხება "დინამოს" ბენეფიტს - პერსპექტიულ ბავშვებს კლუბი თბილისის აკადემიაში გადაიყვანს.

მარტვილიდან ფეხბურთის ფედერაციის პრეზიდენტმა ლევან კობიაშვილმა ქუთაისში გადაინაცვლა. ნიკეას ქუჩაზე, "აია არენასთან" ახალი პროექტი ხორციელდება.

გემახსოვრებათ, შარშან სპორტისა და ახალგაზრდობის სამინისტრომ გამოაცხადა, რომ 10-10 მოედანს დააგებდა ფეხბურთისა და რაგბისთვის.

საფეხბურთო პროექტები ფეხბურთის ფედერაციასთან ერთად ხორციელდება. ქუთაისში სამი მოედანი კეთდება - ერთი ბუნებრივსაფრიანი იქნება, სადაც მოეწყობა გასახდელები, განათების სისტემა და 300 მაყურებელზე გათვლილი ტრიბუნები. დანარჩენი ორი მოედანი ხელოვნური იქნება და რაგბს მოემსახურება.

აქვე ვიტყვით, რომ 7 მოედნის მშენებლობა გრძელდება დიღომშიც, საიდანაც 4 - ფეხბურთისთვისაა განკუთვნილი, სამიც - რაგბისთვის. ჩვენი ინფორმაციით, მოედნები მალე მზად იქნება და ორივე სახეობის სპორტსმენები ისარგებლებენ.

ყოველდღიური სპორტული გაზეთი "ლელო"
1393
მკითხველის კომენტარები / 0 /
მსგავსი ამბები
რუბრიკის სხვა სიახლეები
;