მასზე მთელი  კატალონია  ლოცულობდა... ხავი სიმონსს ბარსელონას ლეგენდის სახელი  დაარქვეს, მაგრამ... ის პარიზში გადავიდა

ბარსელონა” უკვე დიდი ხანია აღარ ცდილობს შემადგენლობის დიდი ნაწილის საკუთარი აღზრდილებით დაკომპლექტებას.

ძვირად ღირებულმა და ვარსკვლავურმა მოთამაშეებმა ჩაანაცვლეს ახალგაზრდა ნიჭიერი მოთამაშეები. შესაბამისად, ადგილობრივ ფეხბურთელებს არ უტოვებენ სხვა შანსს გარდა იმისა, რომ დატოვონ მშობლიური კლუბი. ძველი “ბარსელონასგან” თითქმის არაფერი დარჩა. მაგრამ ხავი სიმონსი - ის ბიჭია, რომელზეც მთელი კატალონია ლოცულობდა.

თუმცა, “ბარსელონას” პირველ გუნდში, როგორც ჩანს, არც მსოფლიოს ერთ-ერთი ყველაზე გაპიარებული ფეხბურთელი ითამაშებს. რამდენიმე თვის წინ, სიმონსს 16 წელი შეუსრულდა - და მაშინვე გადავიდა “პარი სენ-ჟერმენში”. კონტრაქტი 2022 წლის ზაფხულამდეა მოქმედი.

ჰოლანდიელს  ბარსას ლეგენდის საპატივცემულოდ  ხავი ჰქვია

სიმონსი - ჰოლანდიელია, დაიბადა 2003 წელს ამსტერდამში. მისი მამა - რეჯილიო სიმონსი, ყოფილი ფეხბურთელია, აგრეთვე, “ბარსელონასა” და ხავი ერნანდესის ძველი გულშემატკივარია. სწორედ “ბარსას” ლეგენდის საპატივცემულოდ დაარქვეს მშობლებმა ბიჭს ეს სახელი. კარიერის დასრულების შემდეგ, რეჯილიომ ოჯახი ესპანეთში გადაიყვანა. ასე რომ, ფეხბურთის თამაში ხავიმ სწორედ იქ დაიწყო და არა მშობლიურ ჰოლანდიაში.

ტენდერას “დეპორტივო” პირველი კლუბი გახდა უმცროსი სიმონსისთვის. აკადემიის ხელმძღვანელობა იმდენად მოიხიბლა მისი თამაშით, რომ მალე ხავის დებიუტი ჰქონდა გუნდში, რომელშიც მასზე სამი წლით უფროსები თამაშობდნენ. რაც უნდა ნიჭიერი იყოს ფეხბურთელი, იუნიორთა დონეზე ფიზიკურად უფრო ძლიერი მოთამაშეების წინააღმდეგ მოქმედება რთულია, რადგან პირდაპირ ფეხებში გირტყამენ და ბურთიდან იოლად გიცილებენ.

ისინი შენს ასაკს ვარჯიშების დროსაც კი არ ითვალისწინებენ. მამას ეს არ მოეწონა, ამიტომაც შვიდი წლის ხავი ლა მასიაში გადავიდა, მით უმეტეს, “ბარსელონას” სკაუტებს უკვე დიდი ხანია შემჩნეული და ჩანიშნული ჰყავდათ ეს ბიჭი. არადა, ჰოლანდიელი ვუნდერკინდი კინაღამ “ჩელსის” აკადემიაში გადავიდა.

ხავი “ბარსას” ერთ-ერთი იუნიორთა გუნდისა (2003 წელს დაბადებულები) და ჰოლანდიის 16-წლამდელთა ნაკრების კაპიტანი იყო. მისი თამაში ყოველწლიურად უფრო შთამბეჭდავი და დამაჯერებელი ხდებოდა. წინა ჯერზე, “ბარსელონას” აკადემიაში ასეთ იმედებს 10 წლის წინ ისააკ კუენკაზე ამყარებდნენ, რომლის კარიერა დაღმავალი გზით 2012 წელს, “ჩელსისთან” ჩემპიონთა ლიგის ჩავარდნილი ნახევარფინალის შემდეგ წავიდა.

რამდენიმე წლის შემდეგ, ხავი სიმონსი შეიძლებოდა გამხდარიყო გამონაკლისი იმ წესიდან, რომლის მიხედვითაც ბოლო წლებში “ბარსელონას” აღზრდილთა უმრავლესობა ვერ ახერხებს ძირითად შემადგენლობაში დამკვიდრებას. ჰოლანდიელი ამ სიაში სულ სხვა მიზეზით შევიდა.

ვუნდერკინდის აგენტი - ყველაზე გავლენიანი მსოფლიოში

2018 წლის ოქტომბერში ხავი სიმონსი გადაიბირა სკანდალურმა სპორტულმა აგენტმა მინო რაიოლამ, რომელიც ბევრი საფეხბურთო ვარსკვლავის ინტერესებს წარმოადგენს. სრულიად ახალგაზრდა და გამოუცდელი ფეხბურთელი შეიძლებოდა გამხდარიყო ვარსკვლავური აგენტის მძევალი, რომელიც ცნობილია ბინძური მეთოდებით საკუთარი კლიენტების მიმართაც კი. აპრილში ხავის 16 წელი შეუსრულდა და მაშინვე აღმოჩნდა “პარი სენ-ჟერმენში”, სადაც თამაშობს მარკო ვერატი, რომელთანაც ასევე მუშაობს რაიოლა.

ხავი სიმონსი ყველაზე პოპულარული თინეიჯერი ფეხბურთელია მსოფლიოში. მას აქვს ძალიან მაგარი “ინსტაგრამი” 1.6 მილიონი ხელმომწერით. 15 წლის ასაკში სიმონსი “ნაიკის” ელჩი გახდა, ასე რომ, ხელფასის უქონლობის პირობებშიც, ის დიდ ფულს გამოიმუშავებს.

მოზარდი ჰოლანდიიდან, ალბათ, ერთადერთი ფეხბურთელია იუნიორთა “პარი სენ-ჟერმენიდან”, რომლის ტრანსფერიც სოციალურ ქსელში გაშუქდა.

სიმონსი რომც ვერ ათამაშდეს პარიზში, კლუბმა უკვე მოუგო მარკეტინგული ომი სხვა ტოპკლუბებს. “ბარსელონას” ბოლო წლების მთავარი იმედის წაყვანით, “პარი სენ-ჟერმენმა” გამოაცხადა: “ყველაზე მაგრები ვართ, ჩვენთან ყოფნა პრესტიჟია”.

სიმონსი ვარსკვლავი გახდება

უკვე ზედიზედ მრავალი წელია, ხავი სიმონსი ყველაზე პერსპექტიული იუნიორია პლანეტაზე. იუნიორებს შორის ოთხი “ოქროს ბურთი” ამის დადასტურებაა. ყველა მწვრთნელი, რომელიც ხავისთან მუშაობდა, მის უნიკალურობას ასე ხსნის:

“15 წლის ასაკში ის ვეტერანივით თამაშობს”. თინეიჯერს ახასიათებს დაუჯერებელი აკურატულობა და მზრუნველობა ბურთთან მუშაობაში. ის ჯადოსნურად აკონტროლებს მას, თითქმის არასოდეს კარგავს. ხავის იოლად შეუძია რამდენიმე მოწინააღმდეგის მოტყუება და კარში დარტყმა, მაგრამ მაინც ურჩევნია ბურთის პარტნიორებთან გათამაშება, გუნდზე თამაში.

საჭირო არ არის ლაპარაკი მოედნის ხედვაზე და მისი გადაცემების სიზუსტეზე იმის გათვალისწინებით, რომ ბიჭს შვიდი წელი ზრდიდნენ “ბარსელონაში”.
რთული მისახვედრი არ არის, ვის აღმერთებს სიმონსი - ეს არის მისი სეხნია ხავი ერნანდესი და ანდრეს ინიესტა. მაგრამ თინეიჯერს აქვს ის, რაც ამ ლეგენდებსაც კი არ ჰქონიათ. პატარა ფეხბურთელს უფრო მეტი ინტენსიური და აგრესიული აზროვნება აქვს. ის მოედნის ნებისმიერ წერტილში იჭრება ბურთისთვის ბრძოლაში, ხანდახან ტრავმის ფასადაც კი, რითაც სხვა ჰოლანდიელს ედგარ დავიდსს გვახსენებს.

კოსტა-ბრავაზე პრესტიჟულ საერთაშორისო ტურნირის ფინალში ხავიმ წააგო მადრიდის “რეალთან”. სიმონსი ტურნირის საუკეთესო მოთამაშედ აღიარეს, მაგრამ მისი წვლილიც არ ეყო კატალონელებს მოგებისთვის. აი, რა თქვა იმ წაგების შემდეგ:

“ჩვენ კარგად ვთამაშობდით, ბევრს ვფლობდით ბურთს, მაგრამ მან არ მოისურვა კარში შესვლა. ჩვენ დღეს უკეთესი გუნდი ვიყავით - უკეთ ვთამაშობდით, ვიდრე მეტოქე. უბრალოდ, არ გაგვიმართლა. ვნერვიულობდი მატჩის წინ, მაგრამ, როცა ბურთი მივიღე, მღელვაება დამავიწყდა”.

რი-სამი წლის შემდეგ, მას დებიუტი ექნება “პარი სენ-ჟერმენის” პირველ გუნდში. და სულ სხვა გუნდის ლიდერი გახდება.

ყოველდღიური სპორტული გაზეთი "ლელო"
717
მკითხველის კომენტარები / 0 /
მსგავსი ამბები
რუბრიკის სხვა სიახლეები
;