მასობრივი ფეხბურთი: ეს აუცილებელია!

ორიოდე დღის წინ გორში დიდი სტუმრიანობა იყო. თენგიზ ბურჯანაძის სახელობის სტადიონზე, ადგილობრივი ფეხბურთელებისა და მწვრთნელების, ომარ რევაზიშვილისა და კობა თურაზაშვილის ხსოვნის ტურნირში გამარჯვებულები გამოავლინეს, შესაბამისად - ხაშურის "ივერია" და გორის "გორი".

ტურნირი იმით იყო აღსანიშნავი, რომ მასში საქართველოს ფეხბურთის ფედერაციის, შიდა ქართლის რეგიონული ფეხბურთის ფედერაციისა და კომპანია "სოკარის" გარდა, ფეხბურთის განვითარების ფონდიც იყო ჩართული.

დახურვის ცერემონიალს დაესწრნენ შიდა ქართლის რეგიონის გუბერნატორი კახა სამხარაძე და თბილისის "დინამოს" ვეტერანი ფეხბურთელები - ოთარ გაბელია, თენგიზ სულაქველიძე, ნოდარ ხიზანიშვილი, დავით მუჯირი და ვახტანგ ქორიძე, ასევე, საქართველოს ფეხბურთის ფედერაციის პირველი ვიცე-პრეზიდენტი კახა ჭუმბურიძე, რომელმაც გამარჯვებულ გუნდებს თასები და მედლები გადასცა.

"ფეხბურთის ფედერაციასთან თანადგომით, წლეულს შიდა ქართლის რეგიონში საკმაოდ ბევრი ტურნირი ჩავატარეთ. მასობრიობა აუცილებელია, რადგან აქედან გამოჩნდა ბევრი ცნობილი მოთამაშე, რომლებმაც საქართველო ასახელეს. ჩვენ ამდენ ღონისძიებას სწორედ ფეხბურთის პოპულარიზაციისა და ნიჭიერი ბავშვების აღმოსაჩენად ვატარებთ. უკვე ბევრი საინტერესო მოთამაშე გამოჩნდა და ეს გვაიმედებს, რომ შიდა ქართლი საქართველოს ახალ საფეხბურთო ტალანტებს შემატებს", - ამბობს შიდა ქართლის რეგიონული ფედერაციის პრეზიდენტი გიორგი რევაზიშვილი.

ყოველდღიური სპორტული გაზეთი "ლელო"
419
მკითხველის კომენტარები / 0 /
მსგავსი ამბები