მასშტაბური პროექტი ძიუდოში

საქართველოს ძიუდოს ფედერაციამ კიდევ ერთი მასშტაბური პროექტი წამოიწყო - ჭაბუკთა და ახალგაზრდული გუნდებიდან ყველაზე წარმატებულები გააერთიანა და მათ საგანგებო რეჟიმით ავარჯიშებს. ეს პირველი პრეცედენტია ძიუდოში, თუმცა არა მხოლოდ აქ, როცა განსაკუთრებით ნიჭიერებს საგანგებოდ ავარჯიშებენ.

გაერთიანებულმა გუნდმა უკვე დაიწყო პირველი შეკრება, მწვრთნელებად კი ასაკობრივი გუნდების ახლანდელი დამრიგებლები, ლაშა გუჯეჯიანი და გიორგი ყიზილაშვილი მუშაობენ. ამ ახალი ტიპის ნაკრების შესახებ გუჯეჯიანს ვთხოვეთ კომენტარი:

- ამ გუნდში გაერთიანდნენ ჭაბუკთა და ახალგაზრდული ნაკრებების ის წევრები, რომლებმაც წლეულს ევროპისა და მსოფლიოს ჩემპიონატებზე მედლები მოიპოვეს. თუმცა ნაკრების კარი არც სხვებისთვის არაა დაკეტილი - უმედლოდ დარჩენილებიდან ვინც თავს გამოიჩენს და რამდენად აგვყვება ვარჯიშში, იმდენად დაიმსახურებენ ნაკრებში მოხვედრას.

ადამიანს განსაკუთრებულ მონდომებას თუ შევამჩნევთ, მასაც შევიყვანთ გუნდში, ოღონდ სამომავლოდ შედეგიც უნდა გვაჩვენოს სადმე, რომელიმე ტურნირში, თორემ მარტო მონდომების გამო ვერ ავიყვანთ.

ამ გუნდს თავისი სავარჯიშო გეგმა აქვს, ხოლო აბიტურიენტებისთვის ცალკე პროგრამაა შემუშავებული. ვფიქრობ, ეს ყველაფერი სტიმულია მოზარდებისთვის, თუმცა დიდ ყურადღებას ვაქცევთ დისციპლინას:

ყველამ იცის, რომ რეჟიმის ერთი დარღვევის შემთხვევაშიც კი დატოვებს შეკრებას. ვერ დავეთანხმები მოსაზრებას, რომ ეს ბიჭები ცალკე ვარჯიშობენ. პირიქით, ჩვენთან სავარჯიშოდ ხშირად მოდიან ნაკრების სხვა წევრები, ასაკობრივი გუნდების ფალავნები. აქ გაზრდილია ინტენსივობა და დატვირთვები დიდ სიმაღლეზეა აყვანილი.

ამჟამად შეკრებაზე მხოლოდ ბიჭები არიან, გოგოებს ი ცალკე პროგრამა აქვთ. ფედერაციას გოგოებთან დაკავშირებით კონკრეტული გეგმები აქვს, მაგრამ ამის შესახებ საქმის კურსში არა ვარ და ვერაფერს გეტყვით.

შარშან ვინც ჭაბუკებში იყო, ისინი ახალგაზრდებში გადმოვიდნენ, ახალგაზრდების ნაწილი კი ეროვნულ გუნდში გადავიდა. გაისად ისინი უფროსებში ევროპის ღია თასზე გამოვლენ. გაერთიანებული გუნდისთვის სავარჯიშო გეგმა უკვე გაწერილია მაისამდე, ვიდრე ახალგაზრდებში საქართველოს ჩემპიონატი ჩატარდება, ის კი 5-6 მაისსა დანიშნული.

მას შემდეგ ამ გუნდში ახალი წევრები შემოვლენ, რადგან ადგილი გარანტირებული არავის არა აქვს. მე იმას ვუყურებ, ვინაა მებრძოლი, მონდომებული და სულით სპორტსმენი. მირჩევნია სტაბილური სპორტსმენი, ვიდრე ისეთი, ერთ ტურნირზე ბრინჯაოს რომ მოიპოვებს და მერე პრეტენზიები აქვს. შეიძლება, კაცს ახლა არ ჰქონდეს შედეგი, მაგრამ, ვფიქრობ, სტაბილური სპორტსმენი მაინც უფრო შედეგიანია.

749
მკითხველის კომენტარები / 0 /
მსგავსი ამბები
რუბრიკის სხვა სიახლეები