მასწავლებელი, მოსწავლე და ახალბედა. ერთი ოქრო და სამი შანსი საქართველოს ჩემპიონობისთვის

საქართველოს ეროვნული ჩემპიონატი გადამწყვეტ ფაზაში შედის. დარჩენილია მხოლოდ ოთხი ტური. ქართულ ოქროზე პრეტენზიას სამი გუნდი აცხადება - ბათუმის "დინამო", თბილისის "დინამო" და "საბურთალო".

ამ წერილის მიზანია, განვიხილოთ ამ სამი გუნდის შანსი. დავიწყოთ ბათუმის "დინამოთი", რომელიც ამჟამად პირველ ადგილზეა...

მზადება ისტორიის დასაწერად

აჭარულ კლუბს დიდი ტრადიციები აქვს. ამის მიუხედავად, ის არასოდეს ყოფილა საქართველოს ჩემპიონი. ახლა კი "დინამოს" მართლაც რომ ისტორიული შანსი აქვს, გატეხოს ეს ნავსი.

ბათუმური კლუბი ამ სეზონიდა დაუბრუნდა ქართულ საფეხბურთო ელიტას და, რა თქმა უნდა, პირველი ადგილი მართლაც განსაკუთრებული შედეგი იქნება. ეს, უპირველეს ყოვლისა, გუნდის მთავარი მწვრთნელის, გია გეგუჩაძის დამსახურება გვგონია, ვისაც ქართული ტიტულების მოგება ნამდვილად არ ესწავლება.

როგორ გინდა, არ აღნიშნო კლუბის ხელმძღვანელობის უდიდესი ძალისხმევა და ფეხბურთელების თავდადება. ახლა განვიხილოთ "დინამოს" დარჩენილი მატჩების კალენდარი.

1 ნოემბერი
ჩიხურა-დინამო (ბთ)

8 ნოემბერი
დინამო (ბთ)-სიონი

24 ნოემბერი
დინამო (ბთ)-რუსთავი

1 დეკემბერი
ლოკომოტივი-დინამო (ბთ)

საქართველოს ჩემპიონატში გუნდების დონე იმდენად გათანაბრდა, ხელაღებით ვერაფერს დაგეგმავ. რა თქმა უნდა, ბათუმურ კლუბს შეუძლია, უდანაკარგოდ ჩაათამაშოს ეს ოთხი ტური, მაგრამ მოშვება არ შეიძლება. ყველას კარგად გვახსოვს, რა დაემართათ ზღვისპირელებს "ვიტ ჯორჯიასთან" საშინაო შეხვედრაში - პირველობის უპირობო აუტსაიდერთან 2 ძვირფასი ქულა დაკარგეს.

ოთხი თამაშიდან ყველაზე რთული ჩანს ორი მატჩი - გასვლები "ჩიხურასა" და "ლოკომოტივთან", მაგრამ არც ორი საშინაო თამაში უნდა იყოს მარტივი - "ჩიხურა" და "რუსთავი" პლეი აუტის გარეშე უმაღლეს ლიგაში დასარჩენად იბრძვიან.

დაიბრუნებს ტიტულს ფლაგმანი?

ქართული საკლუბო ფეხბურთის ფლაგმანი ჩემპიონობის დასაბრუნებლად იბრძვის. თბილისის "დინამომ" არაერთი კარგი თამაში ჩაატარა, მაგრამ ასევე არაერთ მატჩში დააკლდა სტაბილურობა.

"დინამოს" სამწვრთნელო შტაბში მთავარი კაცი ჩისკო მუნიოსია - დამოუკიდებელი ქართული საკლუბო ფეხბურთის ისტორიაში ერთ-ერთი საუკეთესო ლეგიონერი, ვისთვისაც "დინამო" პირველი სამწვრთნელო გამოწვევაა.

"დინამომ" ყველა თამაში უნდა მოიგოს და ამასთან, იმედი უნდა ჰქონდეს, რომ ბათუმის "დინამო" ერთხელ მაინც წაიფორხილებს. გადავხედოთ თბილისელთა დარჩენილ განრიგს:

3 ნოემბერი
დინამო (თბ)-ტორპედო

9 ნოემბერი
რუსთავი-დინამო (თბ)

24 ნოემბერი
დილა-დინამო (თბ)

1 დეკემბერი
დინამო (თბ)-ვიტ ჯორჯია

"დინამოს" კალენდარსაც ნაკლებად ეთქმის იდეალური. თბილისურ კლუბს დარჩენილი აქვს ორი ძალიან რთული შეხვედრა რუსთავსა და გორში. რა თქმა უნდა, შექმნილი ვითარების გამოისობით "ტორპედო" ძალიანაა დასუსტებული, მაგრამ საფიქრებელია, რომ ქუთათურები თბილისში იოლად არაფერს დათმობენ.

"რუსთავი" და "დილა" გააფთრებით იბრძვიან საიმისოდ, რომ პლეი აუტში თამაშს აარიდონ თავი. რაც შეეხება დინამოელთა ბოლო მეტოქე "ვიტ ჯორჯიას", ეს გუნდი კარგა ხანია, ლიდერთა გამწარებას მიეჩვია...

ოქროს შესანარჩუნებლად

"საბუთალო" საქართველოს მოქმედი ჩემპიონია და ჯერ კიდევ აქვს ტიტულის შენარჩუნების შანსი, უფრო კარგი, ვიდრე ორი-სამი ტურის წინ ჰქონდა. ეგაა, საამისოდ ორივე "დინამომ" ერთხელ მაინც უნდა წაიფორხილოს. ეს გამორიცხული ნამდვილად არ არის. თავის მხრივ, თბილისურ კლუბს ყველა თამაშის მოგება მართებს.

გია გეგუჩაძის ყოფილი ასისტენტის ("ზესტაფონში") გიორგი ჭიაბრიშვილის გაწვრთნილი "საბურთალო" თამაშის ხარისხით საუკეთესო თუ არა, ერთ-ერთი საუკეთესო ნამდვილად არის ჩვენს პირველობაზე და იმის მიუხედავად, რომ ევროპულ ასპარეზზე ძალიან გვატკინა გული, ვერ ვიტყვით, რომ ქართულ ოქროს რომელიმე კონკურენტზე ნაკლებად იმსახურებს.

აქვე, "საბურთალოს" დარჩენილი მატჩების კალენდარიც:

3 ნოემბერი
დილა-საბურთალო

8 ნოემბერი
საბურთალო-ვიტ ჯორჯია

24 ნოემბერი
ჩიხურა-საბურთალო

1 დეკემბერი
საბურთალო - სიონი

რა თქმა უნდა, კალენდარი რთულია. გორში და საჩხერეში გუნდს დიდი წინააღმდეგობა შეხვდება და არც დანარჩენ ორ შეხვედრაში უნდა იყოს იოლი. ეგაა, გვრჩება შთაბეჭდილება, რომ გია ჭიაბრიშვილის მიერ გაწვრთნილი გუნდი კონკურენტებთან შედარებით უკეთეს ფორმაშია კონკრეტულ მომენტში...

1581
მკითხველის კომენტარები / 0 /
მსგავსი ამბები
რუბრიკის სხვა სიახლეები
;