'მას სიკვდილმისჯილის პერანგი უნდა ეცვას'... - რაც ჟოზე მოურინიოზე უთქვამთ

შეიძლება, ჟოზე მოურინიოს სამწვრთნელო სტილი მოგწონდეს ან მისი კატეგორიული მოწინააღმდეგე იყო, მაგრამ ფაქტი ერთია: პორტუგალიელ სპეციალისტს აშკარად გამორჩეული ადგილი უჭირავს მსოფლიოს სამწვრთნელო კოჰორტაში.

დღეს ის უგუნდოდაა, თუმცა, ალბათ, შორს არ არის ის დღე, როცა ის ახალ ფურცელს გადაშლის თავის კარიერაში. მანამდე კი გავიხსენოთ, რა უთქვამთ პორტუგალიელის თაობაზე საფეხბურთო (და არა მარტო) საზოგადოების ცნობილ სახეებს...

სტივ მაკმანამანი (ინგლისის ნაკრებისა და “ლივერპულის” ყოფილი შემტევი): “არის მომენტები, როცა შენ ვერ იგებ, როგორ მოიგო ამ კაცმა თამაში. თითქოს, არც უტევს და არც არაფერი, მაგრამ შედეგი სახეზეა: ხედავ, რომ მისმა გუნდმა მოიგო”.

ნევილ საუთჰოლი (უელსის ნაკრების ყოფილი მეკარე): “ფაქტია, მოურინიო ძალიან მოუხდა პრემიერლიგას. მან სულ სხვანაირი მუხტი შემოიტანა ინგლისურ საკლუბო ფეხბურთში. ბუნებრივია, ყველას არ მოსწონს მისი ფეხბურთი, მაგრამ არ არსებობს ორი ერთნაირი გემოვნების ადამიანი და ჩვენ ეს უნდა გავითვალისწინოთ”.

ჯიმი რენდალი (ინგლისის ნაკრების ყოფილი ნახევარმცველი): “როგორც ჩანს, მოურინიო გადაწყვეტილებებს მას შემდეგ იღებს, რაც თავს სარეცხის მანქანაში ჰყოფს. ის ძალიან ხშირად იქცევა დაუფიქრებლად”.

რობი კინი (ირლანდიის ნაკრების ყოფილი ფორვარდი): “მე შემიძლია ვთქვა, რომ ის იღბლიან ვარსკვლავზეა დაბადებული. მას სწყალობს ფორტუნა, თუმცა, რა თქმა უნდა, იმასაც, რომ ის ყოველივე ამაში დებს უდიდეს შრომას. მისთვის ფეხბურთი ყველაფერია. ეს ნათლად ჩანს მისი გამომეტყველებიდან”.

ბერნდ შუსტერი (“რეალის” ექსმწვრთნელი): “მე თვალებს არ დავუჯერე, როცა შემადგენლობა ვნახე. მოურინიომ პეპე ნახევარდაცვის ცენტრში დააყენა. “რეალს” მოგება შეეძლო, ახლა კი საუკეთესო გამოსავალი მსაჯების დადანაშაულებაა”.

ალფონს გოდალი (“ბარსელონას” ყოფილი ვიცე-პრეზიდენტი): “მოურინიო ნაღდი გიჟია. ის ისე ზეიმობს გოლებს ისე, თითქოს, თავად თამაშობს. როგორც ჩანს, ის დღესაც ოცნებობს ფეხბურთელობაზე, რაც არარეალურია”.

მარიო ბალოტელი (“ინტერის” ყოფილი თავდამსხმელი): “მოურინიო საუკეთესოა მსოფლიოში. უბრალოდ, მან კარგი მანერები უნდა ისწავლოს”.

იოჰან კრუიფი (ჰოლანდიური და მსოფლიო ფეხბურთის ლეგენდა): “დიახ, ის განსაკუთრებულია. განსაკუთრებული გიჟი, რომელიც მოითხოვს, რომ “განსაკუთრებული” დაუძახონ. ისეთებს, როგორიც მოურინიოა, სიკვდილმისჯილის პერანგი უნდა ეცვათ”.

უნაი ემერი (“არსენალის” მწვრთნელი): “შეიძლება, იყო კარგი მწვრთნელი, მაგრამ ამასთან ერთად კარგი ადამიანიც უნდა იყო. ოპონენტს საბურავის ქვეშ ლურსმნებიანი ჯოხი არ უნდა დაუდო. მე მას მსაჯის სასტვენის შემდეგ ხელი გავუწოდე, თუმცა ვერანაირი პატივისცემა ვერ ვიგრძენი ამ ჟესტის მიმართ. ეს მოხდა “სანტიაგო ბერნაბეუზე”.

ერიკ კანტონა (საფრანგეთის ნაკრების ყოფილი თავდამსხმელი): “მე არცთუ ძალიან მომწონს მოურინიოს მიერ გაწვრთნილი გუნდების სათამაშო სტილი, მაგრამ თავად ჟოზე ფანტასტიკური პიროვნებაა. ჭკვიანია, აქვს განსაკუთებული ქარიზმა. მას აქვს თავისი გამოკვეთილი აზრი იმის თაობაზე, თუ როგორ უნდა მართოს გუნდი. ერთხელ მან თქვა - მწვრთნელი მსახიობი უნდა იყოსო. ბოლომდე ვეთანხმები”.

ჩავი (“ბარსელონას” ყოფილი ნახევარმცველი): “მოურინიო ბარსელონაში” არ იყო მხოლოდ ლუი ვან გაალის ასისტენტი. იყო ხოლმე შემთხვევები, როცა ის მეორე გუნდის ფეხბურთელებს ინდივიდუალურად ავარჯიშებდა. მას ესმოდა “ბარსას” ფილოსოფია და უყვარდა ის. გაოცებული ვარ, ჟოზეს ახლა სხვა სათამაშო სტილის მიმდევრად რომ იცნობენ. ჩვენთან ის არ იყო დაცვითი ფეხბურთის აპოლოგეტი”.

ალექს ფერგიუსონი (“მანჩესტერ იუნაიტედის” ყოფილი მწვრთნელი): “ის გამოჩნდა და თქვა, რომ ნომერ პირველი მწვრთნელია მსოფლიოში. მაშინ ჩვენ ვიფიქრეთ - ვინ არის ეს კაცი? საიდან მოვიდა? ეს იყო და, მისმა გუნდმა გამარჯვებები დაიწყო”.

მანიშე (“პორტუს”ყოფილი ნახევარმცველი): “მოურინიომ მე ყველაფერი მომცა საფეხბურთო თვალსაზრისით და არა მხოლოდ. მე მასთან ერთად ვიზრდებოდი, როგორც ადამიანი. ის ყოველთვის გამარჯვებაზე ფიქრობს. უნდა, რომ საუკეთესო იყოს. ჩვენი გუნდის ფეხბურთელები მაგალითს მისგან ვიღებდით. შეხედავდი და მიზანდასახულობა, მოტივაცია გემატებოდა”.

ხრისტო სტოიჩკოვი (“ბარსელონას” ყოფილი თავდამსხმელი): “დიდხანს ვთამაშობდი კატალონიურ კლუბში და, წესით, “რეალის” მთავარ მწვრთნელს უნდა ვაკრიტიკებდე, მაგრამ... მე აღტაცებული ვარ მისით. მოურინიო ყველა კლუბში იგებს ჯილდოებს და ამას აკეთებს თავისი განსაკუთრებული ხასიათის გამო”.

მანუელ სერჟიო (პორტუგალიელი პოლიტიკოსი, ფილოსოფოსი, პროფესორი): “მოურინიო არის გენიოსი! ის ფეხბურთელებს მხოლოდ ფეხბურთზე არ ელაპარაკება. ის ავითარებს მოთამაშეებს ადამიანური თვალსაზრისითაც. ის თითოეული ფეხბურთელის შინაგან სამყაროში “ძვრება”. რა თქმა უნდა, მოურინიოს ჰყავს მტრები და კრიტიკოსები, მაგრამ ჩვენ ყველამ ვიცით, რომ გენიოსებს ძალიან ხშირად აკრიტიკებენ. ბოლოს და ბოლოს, არსებობს პროფესიული შური სხვა მწვრთნელების მხრიდან”.

დიდიე დროგბა (“ჩელსის” ყოფილი თავდამსხმელი): “როცა ის “ჩელსიდან” წავიდა, ამით ძალიან დიდი ეპოქა დასრულდა. ის უძლიერესი მწვრთნელია იმათგან, ვისთანაც მიმუშავია. მოურინიომ ჩემში გამარჯვებებისადმი ლტოლვა გააასმაგა”.

ვიტორ ბაია (“პორტუს” ყოფილი მეკარე): “როცა ჟოზეს გაწვრთნილ გუნდში თამაშობ, ყოველთვის გაქვს შეგრძნება, რომ მინდორზე ერთი ფეხბურთელით მეტი ხარ. შენ იცი, რომ გამარჯვება ნებისმიერ ფასად უნდა მოიპოვო, იცი, რომ უკანდასახევი გზა მოჭრილია”.

არსენ ვენგერი (“არსენალის” ყოფილი მწვრთნელი): “მე უბრალოდ არ მესმის მისი ფეხბურთი. სხვას არაფერს ვიტყვი. რა თქმა უნდა, პატივს ვცემ მას, მაგრამ რასაც ვფიქრობ, ღიად ვამბობ”.

ჯონ ობი მიკელი (“ჩელსის” ნახევარმცველი): “ის ყველაზე ძლიერი ადამიანია, ვინც კი ცხოვრებაში მინახავს. მასთან ერთად გაქვს შეგრძნება, რომ ყველაფერს მიაღწევ, რომ დაუპყრობელი მწვერვალი არ არსებობს”.

ლუის ვან გაალი (“ბარსელონას” ყოფილი მთავარი მწვრთნელი): “მე მას ადრევე ვატყობდი, რომ დიდი მწვრთნელი დადგებოდა. ჩვენ ამას თავიდანვე ჩავუყარეთ საფუძველი. მან ბევრი რამ ისწავლა ჩემგან და ამით ძალიან ვამაყობ”.

ლუიშ ფიგუ (პორტუგალიის ნაკრების ყოფილი ფეხბურთელი): “პორტუგალიას ჰყავდა და ჰყავს არაერთი შესანიშნავი მწვრთნელი, მაგრამ, ჩემი აზრით, მოურინიო საუკეთესოა მათ შორის. რა მომწონს ყველაზე მეტად მასში? რა თქმა უნდა, ის, რომ ძალიან რთულად ეგუება მარცხს. ეს შესანიშნავი თვისებაა”.

პატრიკ ვიეირა (“არსენალის” ყოფილი ნახევარმცველი): “მოგწონს თუ არა მისი სათამაშო სტილი, ეს გემოვნების ამბავია. ჟოზე ნებისმიერ შემთხვევაში დიდ პატივისცემას იმსახურებს.”

მარსელ დესაი (საფრანგეთის ნაკრების ყოფილი მცველი): “მოურინიომ შესანიშნავად იცის დაცვის დალაგება და ამის უარყოფა შეუძლებელია. ის ყველანაირი ხერხით მიილტვის გამარჯვებისკენ. მან იცის, რომ ერთადერთი მიზანი, რომელიც შეიძლება ფეხბურთში დაისახო, არის მხოლოდ მოგება. მისთვის დიდი მნიშვნელობა არ აქვს, როგორ მივა ამ მიზნამდე”.

ყოველდღიური სპორტული გაზეთი "ლელო"
751
მკითხველის კომენტარები / 0 /
მსგავსი ამბები
რუბრიკის სხვა სიახლეები
;