მატიის დე ლიგტი: შესაძლოა, ბარსაში  გადასვლა ჯერ ადრეა... უნდა შევაფასო ყველაფერი

ამსტერდამის “აიაქსის” ცენტრალურმა მცველმა მატიის დე ლიგტმა გამოცემა Mundo Deportivo-სთან ილაპარაკა საკუთარი მომავალი კარიერის შესახებ.

“ეს მეტად საინტერესო და დამაინტრიგებელი სეზონი იყო - როგორც ჩემთვის, ასევე “აიაქსისა” და ჰოლანდიის ნაკრებისთვის, - ამბობს დე ლიგტი. - ჯერ კიდევ არ ვიცი, რას მეუბნება გული. არდადეგების დროს დავფიქრდები მომავალზე და მივიღებ გადაწყვეტილებას. ჩემთვის მთავარია - დარწმუნებული ვიყო, რომ ახალ გუნდში ბევრ სათამაშო დროს მივიღებ. არ ვიცი, როდის გადაწყდება ეს საკითხი, მაგრამ აჩქარებას არ ვაპირებ.

კრიშტიანო რონალდო “იუვენტუსში” მეძახის, დე იონგი კი “ბარსელონაში”? არავის არ ვაქცევ ყურადღებას, თავად უნდა ავირჩიო ჩემი გზა. რა თქმა უნდა, შესანიშნავი იქნება ფრენკისთან და მესისთან ერთად თამაში, მაგრამ უნდა გადავწყვიტო, რა იქნება უკეთესი ჩემთვის. მათ შესანიშნავი დაცვა ჰყავთ, თუმცა მე არ მეშინია კონკურენციის. ლოგიკური და სწორია, რომ ასეთ შესანიშნავ გუნდში კონკურენცია არსებობს.

“ბარსელონაში” გადასვლა რთულდება ფინანსების გამო? არა, საქმე ფულში არ არის. შესაძლოა, ჯერ არ მოსულა დრო. უნდა შევაფასო ყველაფერი და გადაწყვეტილება სეზონებს შორის შესვენებისას მივიღო”.

2018-19 წლების სეზონში დე ლიგტმა 55 ოფიციალური მატჩი ჩაატარა. მის ანგარიშზეა შვიდი გოლი და ოთხი შედეგიანი პასი. 19 წლის ფეხბურთელმა “აიაქსთან” ერთად დუბლი შეასრულა.

ყოველდღიური სპორტული გაზეთი "ლელო"
447
მკითხველის კომენტარები / 0 /
მსგავსი ამბები
რუბრიკის სხვა სიახლეები
;