[მატჩის ანალიზი] თამაში მხოლოდ ხელდახელ - 8 ლელო და ბელგია ავაყირავეთ! [VIDEO]

ბელგია-საქართველო 6:46
ბელგია (15-9): ჰართი, ვალრაფი (კერე 67) დე მოფარცი, მურიჩი, ჩონგე, მონტუაზი, კოკიუ, (ფერმოტი 61); (1-8): გალერი (ბერგე 54), დინსტი (იესენი 61), პინტი (ოპსომერი 61), ბილი, გიონი (მულანცი 53), ბენუა (მორტიე 71), ონონი (ტემერმანი 54), ლეკლუზი
2ს: დე მოფარცი

საქართველო (15-9): მათიაშვილი (აფციაური 61), მოდებაძე, შარიქაძე, კვესელაძე, ძნელაძე, აბჟანდაძე (ხმალაძე 65), ბეგაძე (აფრასიძე 61); (1-8): გოგიჩაშვილი (ჟვანია 52), მამუკაშვილი (კარკაძე 52), ჩილაჩავა (გიგაშვილი 52), ჭეიშვილი (სუთიაშვილი 59), ნემსაძე, თხილაიშვილი, ცუცქირიძე (საღინაძე 69), გიორგაძე
8ლ: გოგიჩაშვილი, ნემსაძე, ცუცქირიძე (2), მოდებაძე, ძნელაძე, აფრასიძე, თხილაიშვილი. 3გ: მათიაშვილი, აფრასიძე (2)
მსაჯი: ბენ ლეინი (შოტლანდია)

საქართველოს ნაკრებმა ბრიუსელში ბელგიის ეროვნული გუნდის წინააღმდეგ მატჩში დაგეგმილი გამარჯვება მოიპოვა. მატჩის წინ, ჯერ კიდევ ინგლისში ერთობლივ წვრთნებზე ყოფნისას „ბორჯღალოსნების“ თავკაცმა მილტონ ჰეიგმა თქვა - მნიშვნელოვანია არა მარტო მოვიგოთ, არამედ კარგი თამაში ვაჩვენოთ და მეტოქე ისე დავამარცხოთო.

როგორც ჩანს, ჰეიგი კარგ თამაშში ჩვენი გუნდის მუდმივად ხელდახელ ბურთაობას გულისხმობდა. „ბორჯღალოსნები“ საკუთარი 22-მეტრიანი ზონიდანაც კი ხელით თამაშით ბურთის ამოტანას და ასე შეტევის ორგანიზებას ცდილობდნენ. ხშირ შემთხვევაში გამოსდიოდათ კიდეც. სიჩქარეში შეცდომაც ბევრი იყო და არც მეტოქე იჯდა გულზე ხელდაკრეფილი

ბოლო პერიოდში ჩვენს გუნდს რატომღაც, დასჩემდა, რომ ძნელად ერთვება თამაშში. რაღაც დრო სჭირდება, რომ მოიქოქოს, მძლავრად და შეუპოვრად შეუტიოს მეტოქეს. ასე იყო ახლაც. ძალზე დიდი სათამაშო უპირატესობის მიუხედავად, ლელო მე-11 წუთზე გავიტანეთ. კარიერაში პირველი სანაკრებო ლელო შერკინების ახალგაზრდა ბურჯმა გურამ გოგიჩაშვილმა მიითვალა. ასევე პირველი ლელო გაიტანეს ეროვნულ გუნდში ქუთაისელმა გარემარბებმა მირიან მოდებაძემ და ზურაბ ძნელაძემ.

აღსანიშნავია მესამეხაზელი გიორგი ცუცქირიძის შესანიშნავი თამაში. მან ორი ლელო მიითვალა და ორივე გარემარბის პოზიციიდან.

პირველი ტაიმი საქართველოს ნაკრებმა 22:3 მოიგო. მეორეში ისევ დიდხანს მოგვიწია ლოდინმა. 64-ე წუთამდე „ბორჯღალოსნები“ მონაგარის გაზრდას ვერაფრით ახერხებდნენ. დარჩენილ 16 წუთში კი, ოთხი ლელო მიითვალეს. ერთი ეგაა, რვა ლელოდან სოსო მათიაშვილმა და გელა აფრასიძემ ჯამში მხოლოდ სამის გარდასახვა შეძლეს.

ერთი სიტყვით, ჩვენმა გუნდმა აჩვენა, რომ ინგლისელებთან ერთობლივ წვრთნას უკვალოდ არ ჩაუვლია. შედარებით უკეთ ირჯებოდნენ ჩვენი მორაგბეები დერეფანში და ხელდახელ თამაშისას. შერკინებაში კი, უპირატესობა ისედაც რომ გვექნებოდა წინდაწინვე ცნობილი იყო.

მატჩის შემდეგ

მილტონ ჰეიგი, საქართველოს ნაკრების მთავარი მწვრთნელი:
„მთლიანობაში, კმაყოფილი ვარ. იყო ეპიზოდები, როდესაც ძალიან კარგად ვთამაშობდით. თუმცა, რაქში თამაშისას რამდენჯერმე ბურთი დავკარგეთ და სამჯერ აუტში გადაგვიყვანეს. როდესაც შენზე ძლიერ მეტოქეს ეთამაშები და ბურთს მოიპოვებ, ის აუცილებლად უნდა შეინარჩუნო. კმაყოფილი ვარ, რომ პირველ ტაიმში 22 და მეორეში 24 ქულა გავაკეთეთ, თუმცა ზოგადად, დისციპლინით უკმაყოფილო ვარ.

ბელგიელები ეპიზოდებში დაცვაში ძალიან კარგად თამაშობდნენ და ხაზს სწრაფად გვიწევდნენ. თუმცა, 46:6 მაინც დიდი სხვაობაა. მიუხედავად იმისა, რომ მინდორი სპეციფიკურია, რამდენიმე კარგი ლელო გავიტანეთ. გიორგი ცუცქირიძე ძალიან კარგი მოთამაშეა და დღეს კარგი მატჩი ჰქონდა. თუმცა, ის გუნდის ნაწილია და ჩვენმა ტაქტიკამაც განაპირობა, რომ ასეთი აქტიური იყო“.

III ტური
გერმანია-რუსეთი 18:26
ესპანეთი-რუმინეთი 21:18

თ მ ფ წ ბ ქ(ს)
1. საქართველო 3 3 0 0 +63 13(1)
2. რუსეთი 3 2 0 1 +63 10(2)
3. ესპანეთი 3 2 0 1 -9 8(0)
4. რუმინეთი 3 1 0 2 +16 6(2)
5. ბელგია 3 1 0 2 -90 4(0)
6. გერმანია 2 0 0 3 -43 0(0)

IV ტური

9 მარტი
რუმინეთი-რუსეთი

10 მარტი
საქართველო-გერმანია
ესპანეთი-ბელგია

ყოველდღიური სპორტული გაზეთი "ლელო"
984
მკითხველის კომენტარები / 0 /
მსგავსი ამბები
რუბრიკის სხვა სიახლეები
;