მაურისიო პოჩეტინოს ხუმრობამ რეალი აღაშფოთა

ახლოვდება ჩემპიონთა ლიგის ფინალი. 1 ივნისს მადრიდის "ვანდა მეტროპოლიტანოზე" ევროსაკლუბო ფეხბურთის დასკვნითი დაპირისპირებაა. შესაბამისად, "ლივერპულისა" და "ტოტენჰემის" მიმართ ინტერესი გაათმაგებულია. მწვრთნელებისა თუ ფეხბურთელების თითოეულ კომენტარს მედია ლუპის ქვეშ ატარებს, და არა მხოლოდ მედია - მაურისიო პოჩეტინოს კომენტარმა იმასთან დაკავშირებით, თუ სად ივარჯიშებს და დაბინავდება მისი გუნდი მადრიდული ფინალის წინ, "რეალის" ხელმძღვანელობის აღშფოთება გამოიწვია. 

"ჩვენ ვივარჯიშებთ ვალდებებასში ("რეალის" ტექნიკური ცენტრში - რედ), მაგრამ ვიცხოვრებთ იქვე ახლოს სასტუმროში. ფლორენტინო პერესს ვთხოვე, სავარჯიშო ცენტრშივე მოეცა დაძინების უფლება, მაგრამ მან მითხრა - ამის უფლებას მაშინ მოგცემ, როცა "რეალის" მწვრთნელი გახდებიო".

პოჩეტინომ გაიცინა და იქვე დასძინა, რომ ეს ხუმრობა იყო, თუმცა მადრიდში სხვანაირად გაიგეს. "რეალის" ხელმძღვანელობამ, კონკრეტულად კი ფლორენტინო პერესმა, ეტყობა უხერხულობა იგრძნო ზინედინ ზიდანის მიმართ და სპეციალურ განცხადებაში პოჩეტინოსთან მსგავსი შინაარსის საუბარი კატეგორიულად უარყო. 

"ეს არის ტყუილი! ასეთი მოლაპარაკება არ ყოფილა. "რეალი" მზად არის, ფინალისტებთან მიმართებაში უეფას ყველა მოთხოვნა დააკმაყოფილოს. ლაპარაკი იყო მხოლოდ "სიუდად-რეალის" ბაზისა და მისი გასახდელების გამოყენებაზე და არაფერ სხვაზე", - წერია "რეალის" განმარტებაში.

1520
მკითხველის კომენტარები / 0 /
მსგავსი ამბები
რუბრიკის სხვა სიახლეები
;