მაურისიო პოჩეტინო: მე მიყვარს ლა ლიგა... და ბარსელონა?

ფეხბურთში ვითარება მართლაც რომ კალეიდოსკოპური სისწრაფით იცვლება. სულ ცოტა ხნის წინ მაურისიო პოჩეტინო ნამდვილი გმირი იყო. მან "ტოტენჰემთან" ერთად ჩემპიონთა ლიგის ფინალში გასვლა მოახერხა და ეს მართლაც ეპოქალური მიღწევა იყო ამ ლონდონური კლუბისთვის...

ამდენად, ვერავინ წარმოიდგენდა, რომ დაახლოებით ხუთ თვეში "მამლების" ხელმძღვანელობა კარისკენ მიუთითებდა არგენტინელ სპეციალისტს, ვინც გუნდისთვის მართლაც რომ ბევრი გააკეთა და "ტოტენჰემი" ევროპული ფეხბურთის ერთ-ერთ გრანდად აქცია...

სხვათა შორის, ბევრი ექსპერტი "ტოტენჰემის" გადაწყვეტილებას, პირდაპირ თუ შეფარვით, უსამართლოდ მიიჩნევს. ისინი ამბობენ, რომ პოჩეტინო ასეთ მოპყრობას არ იმსახურებდა. მისი დათხოვნის მიზეზი გახდა არადამაკმაყოფილებელი შედეგი. ამ დროისთვის "ტოტენჰემს" პრემიერლიგის სატურნირო ცხრილში მისთვის შეუფერებელი მე-14 ადგილი უჭირავს.

ექსპერტები ვახსენეთ. დიახაც, მათი უმრავლესობა პოჩეტინოს მხარესაა. მაგალითად, წარსულში ინგლისის ნაკრების შემტევმა იან რაიტმა თქვა, რომ არგენტინელმა ძალიან ბევრი გააკეთა "დეზებისთვის" და რომ ის მეტი ნდობის ღირსი იყო. მანვე, პოჩეტინოს მადლობა გადაუხადა იმისთვის, რაც მან არა მხოლოდ "ტოტენჰემისთვის", არამედ, ინგლისური ფეხბურთისთვის გააკეთა.

კლუბის პრეზიდენტმა დენიელ ლევიმ კი ასე ახსნა არგენტინელთან განშორება: "რა თქმა უნდა, მან გუნდისთვის ძალიან ბევრი გააკეთა. ჩვენ ეს ვიცით და ჩვენ მის საქმეებს ვაფასებთ. ყველა კარგად ხედავს, რომ "ტოტენჰემი" მისი ხელმძღვანელობით გავიდა სრულიად ახალ დონეზე და ამით თამასა ძალიან მაღლა ავწიეთ. ეს არის ის სიმაღლე, რასაც სჭირდება მოფრთხილება... ასე რომ, პოჩეტინოს მადლობა! ყველა ხედავს, რომ კლუბში საგანგებო მდგომარეობაა და სიტუაციას სასწრაფოდ სჭირდება გამოსწორება. ის "ტოტენჰემის" დიდი ისტორიის გამორჩეულ ნაწილად რჩება", - თქვა ლევიმ.

თავად პოჩეტინომ კი ძალიან საინტერესოდ ილაპარაკა: "თუ რამ მიყვარს ფეხბურთში, ეს არის ეს გუნდი, ეს ქალაქი და ლა ლიგა. ჩვენ ლათინოსები ვართ და ხშირად გადაწყვეტილებას გულის კარნახით ვიღებთ. არის ასეთი ანდაზა - "არასოდეს თქვა არასოდეს". ამიტომ, მე 100 პროცენტით არ ვარ დარწმუნებული, რომ აქ არასოდეს დავბრუნდები", - თქვა მან.

რაო, ლა ლიგაო? ალბათ, ყურები ცქვიტეს ჩვენმა კოლეგებმა. ფაქტია, პოჩეტინო ახალგაზრდა, ამბიციური სპეციალისტია და ის დიდი ხნის განმავლობაში უქმობას არ აპირებს. ეს მიუხედავად იმისა, რომ მას "ტოტენჰემისგან" საკმაოდ სერიოზული კომპენსაცია - 12,5 მილიონი ფუნტი ეკუთვნის ნაადრევად შეწყვეტილი კონტრაქტისთვის.

რაც შეეხება ლა ლიგას. ესპანეთში პოჩეტინოს საკუთარი თავის პოვნა ნამდვილად არ გაუჭირდება. ეგაა, ის არ მივა ისეთ კლუბში, რომელიც მიზნად არ ისახავს მწვერვალების დაპყრობას. "ვალენსიას" უყვარს არგენტინელები და პირიქით, მაგრამ კლუბში ბევრი პრობლემაა, პირველ რიგში - ფინანსური.

"ატლეტიკოში" დიეგო სიმეონეა და ის, ჯერჯერობით, მყარადაა. "სევილია" თავისი გზით მიდის, "რეალში" კი ზინედინ ზიდანის პოზიციები დღეს გაცილებით მტკიცეა, ვიდრე, თუნდაც, რამდენიმე კვირის წინ იყო.

და რაღა რჩება? მართალი ხართ - "ბარსელონა". კლუბს სჭირდება ახალი სისხლი სამწვრთნელო ამბავში და პოჩეტინო ამისთვის სწორედ რომ ზედგამოჭრილია. მან იცის, როგორ შეატევინოს გუნდს და ეს არ იცის ერნესტო ვალვერდემ. ამბობენ, ვალვერდეს ლიონელ მესი იცავსო, მაგრამ დაუსრულებელი არაფერია...

903
მკითხველის კომენტარები / 0 /
მსგავსი ამბები
რუბრიკის სხვა სიახლეები
;