მაურიციო სარი და გოლოვინი 'ჩელსიში'?

"დეილი მეილის" ინფორმაციით, ამ კვირაში მაურიციო სარი "ჩელსის" ახალი მწვრთნელი გახდება, და ეს მაშინ, როცა ანტონიო კონტე ჯერაც ოფიციალურად რჩება თანამდებობაზე და ამ დღეებში მომავალი სეზონის გეგმებზეც ლაპარაკობდა.

ცხადია, კონტე თავისით არ წავა, ეს კი იმას ნიშნავს, რომ რომან აბრამოვიჩს მისთვის კომპენსაციის გადახდა მოუწევს, ისევე, როგორც "ნაპოლისთვის", ვისთანაც სარის კიდევ ორწლიანი ხელშეკრულება აკავშირებდა.

ასეა თუ ისე, "ჩელსის" ბოსი მზად არის, ყველაფერი გაიღოს იმისთვის, რათა სარის "სტემფორდ ბრიჯის" კარი გაუხსნას. ისღა დაგვრჩენია, დაველოდოთ ამ კვირის ამბებს.

რაც შეეხება ალექსანდრ გოლოვინს, საქმეს ისეთი პირი უჩანს, რუსეთის ნაკრების ვარსკვლავი "ჩელსის" პირველი შენაძენი იქნება ზაფხულის სატრანსფერო ბაზარზე, რომელიც, ახალი რეგულაციების თანახმად, 11 აგვისტოს (პრემიერლიგის დაწყების დღეს) დაიხურება.

ასე რომ, ახალ მწვრთნელს ბევრი დრო არ ექნება ახალი გუნდის თავისი გემოვნებით დასაკომპლექტებლად. ამიტომაც ჩქარობს აბრამოვიჩი. გასაგები მიზეზების გამო, ის უფრო იოლად მონახავს საერთო ენას ცსკა-სთან, გოლოვინში 27 მილიონ ფუნტს გადაიხდის და გვერდზე გასწევს "იუვენტუსს", რომელიც მუნდიალის დაწყებამდე 22 წლის რუსი ფეხბურთელის ახალ ნავსაყუდლად დასახელდა.

ყოველდღიური სპორტული გაზეთი "ლელო"
411
მკითხველის კომენტარები / 0 /
მსგავსი ამბები
რუბრიკის სხვა სიახლეები