[VIDEO] 'მეგა' ბითაძე "მეგა ბიმაქსის" წინააღმდეგ - 22 ქულა და გამარჯვება

ადრიატიკის ლიგაზე მორიგი მატჩი მოიგო ლიგის მოქმედმა ჩემპიონმა "ბუდუჩნოსტმა". მონტენეგროელები, რომელთა ღირსებას გოგა ბითაძე იცავს, გოგას ყოფილ კლუბ "მეგა ბიმაქსს" ესტუმრნენ და 77:70 დაამარცხეს.

წარმატებაში დიდი წვლილი შეიტანა ქართველმა ცენტრმა, რომლისთვისაც "მეგას" დარბაზი უკვე მშობლიურია და შინაურ ფარშიც 22 ქულა მშვიდად ჩააგდო, რასაც 8 მოხსნა, 3 დაფარება და 1 ჩაჭრა მიამატა. 27 წუთში ბითაძემ 1-დან 1 სამქულიანი, 12-დან 8 ორქულიანი და 4-დან 3 საჯარიმო გამოიყენა. იგი მატჩის ბომბარდირიც გახდა და მარგი ქმედების კოეფიციენტითაც საუკეთესო იყო - 31.

ადრიატიკის ლიგის ოფიციალურ საიტზე მატჩის MVP-ისთვის განკუთვნილ საპატიო ადგილას სწორედ გოგა ბითაძის ფოტოა.

"ბუდუჩნოსტს" 15 მოგება და 6 წაგება აქვს, მეორე-მესამე ადგილებს "ცედევიტასთან" ინაწილებს. რაც შეეხება გოგას ყოფილ კლუბ "მეგას" 10 გამარჯვება (11 წაგება) აქვს და მეხუთეა. ადრიატიკის ლიგაზე ბითაძე მორიგ მატჩს 17 მარტს "ციბონას" წინააღმდეგ გამართავს.

779
მკითხველის კომენტარები / 0 /
მსგავსი ამბები
რუბრიკის სხვა სიახლეები
;