მენოტისთვის ნათელია:  არგენტინას კრუიფი და  გვარდიოლაც ვერ უშველიდნენ

არგენტინის ნაკრების ყოფილმა მთავარმა მწვრთნელმა ლუის სესარ მენოტიმ კომენტარი გაუკეთა “ალბისელესტეში” შექმნილ სიტუაციას.

“ვერც კრუიფი და ვერც გვარდიოლა დღეს ვერ შეძლებდნენ სიტუაციის შეცვლას არგენტინის ნაკრებში. ეს გამოწვეულია იმ სირთულეებით, რომელსაც ამჟამად გუნდი განიცდის. მიუხედავად ამისა, სკალონის მუშაობას შეფასება სჭირდება - დღეს ფაქტობრივად ყველაფერს აფასებენ.

დიდი შეცდომა იქნება ლოკალური ანალიზის ჩატარება - სიტუაცია გლობალურად უნდა შევაფასოთ. გუნდს არ აქვს შეთამაშების საშუალება, ამის გამო, მისი სუსტი წერტილები მკაფიოდ ჩანს მატჩების დროს. ნაკრებში არ არსებობს მუშაობის კონკრეტული გეგმა, ერთიანი პროექტი”, - მოჰყავს მსოფლიოს 1978 წლის ჩემპიონის სიტყვები გაზეთ AS-ს.

პარალელურად, ლეგენდარულ არგენტინელ ფორვარდს, მენოტის გუნდის ბომბარდირს მარიო კემპესს მიაჩნია, რომ არგენტინის ნაკრებისთვის სასარგებლო იქნება ლიონელ მესის გარეშე თამაში.

“მესიზე დამოკიდებულება - ეს პრობლემაა. გუნდი გრძნობს, რომ საჭიროა მუდმივად მისთვის ბურთის მიწოდება. ეს მკაფიოდ ადასტურებს იმას, რომ გუნდს ხასიათი არ გააჩნია.

შესაძლოა, ნაკრებმა უნდა დაისვენოს მესისგან. ამაში ცუდს ვერაფერს ვხედავ. რა შეიძლება მოხდეს ლეოს გარეშე გუნდში? შეიძლება, უბრალოდ, შეწყვიტონ მისი გამოძახება ნაკრებში და დააკვირდნენ ახალგაზრდა ფეხბურთელებს”, - განაცხადა კემპესმა პორტუგალიურ A Bola-სთან ინტერვიუში.

ყოველდღიური სპორტული გაზეთი "ლელო"
462
მკითხველის კომენტარები / 0 /
მსგავსი ამბები
რუბრიკის სხვა სიახლეები
;