მეოთხე ცდაზე პირველად: თსუ-მ დადიანის თასი მოიგო

9 ოქტომბერი
ფინალი
თსუ-ბათუმი 87:69
18:18, 24:8, 24:20, 21:23
თსუ: ანდერსონი (20ქ, 6მ, 6პ), ს. სანაძე (7ქ, 4პ), ბერუაშვილი (3ქ, 3პ), მილოსავლევიჩი (2ქ, 6მ), ზაქრაძე (11ქ), ტურძელაძე (4ქ, 6მ), კორსანტია (20ქ, 10მ), პატაშური (2ქ, 5ნ), მედისონი (18ქ), ჯაფარიძე.
ბათუმი: მალკოლმი (9ქ, 8მ), ფევაძე (3ქ, 10მ), ლ. რევაზაშვილი (9ქ), ჩაჩანიძე (5ქ), მასხულია (4ქ), ელიაძე (11ქ, 8მ), ვუიოვიჩი (10ქ, 5მ), ბექაია (3ქ), პროველი (15ქ).
მსაჯები: მ. კუპატაძე, დ. ბერეკაშვილი, დ. გაფრინდაშვილი

დუდუ დადიანის თასის მფლობელი თბილისის სახელმწიფო უნივერსიტეტის გუნდი გახდა. ლექსო ლაფანაშვილის გაწვრთნილმა თსუ-მ სეზონის პირველი ტურნირი ერთი ამოსუნთქვით მოიგო. მემორიალური შეჯიბრების ოთხივე შეხვედრაში თსუ-მ ისე იმარჯვა, მეტოქეებისთვის მცირედი შანსიც არ მიუცია, რაც დამსახურებულად დაფასდა თასით, რომლის მოგებაც ნებისმიერი გუნდისთვის მეტად პრესტიჟულია.

ფინალურ მატჩში თსუ-ელებმა არანაკლებ ძლიერი "ბათუმი" 87:69 დაამარცხეს. თანაბარი მხოლოდ პირველი პერიოდი გამოდგა, რომელიც 18:18 დასრულდა. მეორე მეოთხედში თამაში გიორგი კორსანტიას მშვენიერი გარჯის ხარჯზე გაიხსნა, რომელმაც სამწამიან ზონასა და მის მისადგომებთან მეურვეები დაჯაბნა და თსუ-ს წინ გაჭრის საშუალება მისცა. უნივერსიტეტელებმა ათწუთეული 24:8 მოიგეს და დიდ შესვენებაზე 16-ქულიანი ლიდერობით გავიდნენ - 42:26.

მატჩის ბედიც ფაქტობრივად აქ გადაწყდა. მეორე ნახევარში თსუ-მ მეტი აქცენტი დაცვაზე გადაიტანა, რითაც მეტოქეს ქულების მოპოვების საუალება მაქსიმალურად შეუზღუდა, ამასობაში მიზანი გაეხსნა სტუდენტების ამერიკელ ლეგიონერ რიკი მედისონს, რომელმაც სნაიპერული თვისებები გამოავლინა და მეორე მეოთხედში პირად ანგარიშზე 16 ქულა ჩაიწერა. ძალიან სარგებლიანი იყო კრისტოფერ ანდერსონი, რომელიც ბურთსაც გონივრულად ათამაშებდა და შეტევაშიც ყოჩაღობდა. ყველაფერმა ამან ის შედეგი გამოიღო, რომ ბათუმელებმა დარჩენილ დროში ვერაფერი შეცვალეს. თსუ მშვიდად მივიდა გამარჯვებამდე და დუდუ დადიანის თასიც ღირსეულად მოიგო.

მატჩის საუკეთესო მოთამაშე გახდა გიორგი კორსანტია, რომელმაც ტურნირის MVP-ის ტიტულიც დაიმსახურა. მის ანგარიშზე 20 ქულა და 10 მოხსნა დაგროვდა. 20 ქულა, 6 მოხსნა და 6 პასი მიითვალა კრის ანდერსონმა, ხოლო რიკი მედისონმა პირად ანგარიშზე 18 ქულა ჩაიწერა. ბათუმელთაგან 15 ქულით ჯუნიუს პროველი გამოირჩა, 11 ქულა და 8 მოხსნა ლევან ელიაძის ანგარიშზეა.

მატჩის შემდეგ გაიმართა დაჯილდოვების ცერემონიალი, რომელსაც დამსახურებული სპორტული კომენტატორი ჯამლეტ ხუხაშვილი გაუძღვა. ტურნირის საუკეთესო მოთამაშის პრიზი გიორგი კორსანტიას დუდუ დადიანის ძმისშვილებმა – სანდრომ და ანდრიამ გადასცეს. თსუ-ელთა კაპიტანმა, გიორგი კორსანტიამ ჩაიბარა დუდუ დადიანის თასიც, რომელიც უნივერსიტეტელებისთვის პირველია. მემორიალის ფინალში თსუ აქამდე სამჯერ იყო, თუმცა 2002, 2005 და 2009 წლებში სტუდენტურმა გუნდმა ტიტულის მოგება ვერ შეძლო. მეოთხე ცდაზე, ლექსო ლაფანაშვილისა და ირაკლი ძიძიგურის წინამძღოლობით, თსუ დუდუ დადიანის თასს პირველად დაეპატრონა.

- მოხარული ვარ, რომ სეზონის პირველი შეჯიბრება წარმატებულად დავასრულეთ. თსუ გამარჯვებას იმსახურებდა და მოხარული ვარ, რომ წარმატებაში წვლილი მეც მიმიძღვის. მადლობა ჩვენს გულშემატკივარს, რომელმაც დიდი როლი ითამაშა გამარჯვებაში. თსუ-ს კიდევ აქვს მომატების პერსპექტივა, - განაცხადა შეჯიბრების საუკეთესო კალათბურთელმა გიორგი კორსანტიამ.

ყოველდღიური სპორტული გაზეთი "ლელო"
539
მკითხველის კომენტარები / 0 /
მსგავსი ამბები
რუბრიკის სხვა სიახლეები
;