მეორე ევროპული თამაშები - ძიუდოისტებმა სიები დაალაგეს 

ამოიწურა მეორე ევროპულ თამაშებზე ძიუდოისტთა წარდგენის ყველანაირი ვადა და ძიუდოს ევროპულმა ფედერაციამაც წონითი კატეგორიების მიხედვით გამოაქვეყნა მონაწილე სახელობითი სიები.

ამ საბოლოოს სიებზე იყო დამოკიდებული, მოხვდებოდა თუ არა ჩვენგან რომელიმე ქალი მონაწილე ევროთამაშებზე, რადგან რჩებოდა რაღაც თეორიული შანსი, რომ იქნებ ვინმეს უარი ეთქვა მოპოვებულ ლიცენზიაზე და ამ გამოთავისუფლებული ადგილის ხარჯზე ჩვენგან ვინმე მოხვედრილიყო მონაწილეთა შორის. თუმცა ამის ყველაზე რეალური შანსიც მხოლოდ 57 კილოგრამში გვქონდა, სადაც ეთერ ლიპარტელიანს ერთი ადგილი აშორებდა საგზურამდე, თორემ სხვები შედარებით შორს იყვნენ სალიცენზიო ზონიდან.

ევროპული ფედერაცია აქამდე სწორედ ამ დასტურს ელოდებოდა ეროვნული ფედერაციებისგან, თორემ ევროთამაშების სალიცენზიო შეჯიბრებები 8 აპრილს დამთავრდა და იმ დროს არსებული რეიტინგით განისაზღვრა მონაწილეობის კანდიდატთა ვინაობა. სამწუხაროდ, ჩვენი მყიფე იმედი არ გამართლდა და გოგოებში ვერავინ მიიღო ლიცენზია. აი, ვაჟებს კი ეს პრობლემა ისედაც არ აწუხებდათ - მათ ყველა წონაში მოიპოვეს საგზური. ეგ კი არა, უმეტეს წონებში მოწინავეთა შორის არიან; მით უფრო, აქ ევროპული რეიტინგი მოქმედებს, რომელშიც არაევროპელები არ არიან, შედეგად კი ჩვენები მსოფლიოს რეიტინგთან შედარებით კიდევ უფრო უკეთეს პოზიციებზე მოხვდნენ, რაც მათ განთესილებში ყოფნას და ხელსაყრელ წილისყრას უქადის. 

აქვე გეტყვით, რომ წონების მიხედვით მონაწილეთა რაოდენობა განსხვავებულია და ზოგჯერ - მკვეთრადაც. ასე მაგალითად, ვაჟებში 60 კილოგრამში თუ მხოლოდ 28 მონაწილეა - 26 რეიტინგით, რასაც 2 კვოტაც ემატება, 66-ში 32 სპორტსმენია, მაგრამ რაოდენობის მხრივ რეკორდსმენი 73 კილოგრამია, სადაც 42 ძიუდოისტი იასპარეზებს. ბარემ აქვე გეტყვით, რომ 81 კილოგრამში 38, 90-ში 34, 100-ში 30 და მძიმეში 24 ფალავანი იჭიდავებს.

შესავალში ეროვნული ფედერაციებისთვის საბოლოო დასტურისთვის მიცემულ ვადებზე რომ ვსაუბრობდით, ამის ნათელი მაგალითი თუნდაც 60 კილოგრამია, სადაც რუსებმა დაასვენეს მსოფლიოს რეიტინგის მეორე ნომერი, ქართველი ევროპის ჩემპიონი და მსოფლიოს ფინალისტი რობერტ მშვიდობაძე და მინსკში აჭიდავებენ სხვა ქართველს - იაგო აბულაძეს. სავარაუდოდ, ისინი მშვიდობაძეს მსოფლიოს ჩემპიონატისთვის ამზადებენ, რომელიც ევროპული თამაშებიდან ზუსტად ორ თვეში - 25 აგვისტოს იწყება ტოკიოში. თუმცა რუსები არა მხოლოდ მშვიდობაძეს, არამედ ამ წონაში თავიანთ ყველა წამყვან ძიუდოისტს ასვენებენ - ევროპის მოქმედ ჩემპიონ ისლამ იაშუევს, ოლიმპიურ ჩემპიონ ბესლან მუდრანოვს, ალბერტ ოგუზოვს. სავარაუდოდ, ისინი მსოფლიოს პირველობისთვის კონკურენციაში იქნებიან ჩაბმულები. 

რაც შეეხება ჩვენს ვაჟთა ნაკრებს, მისი მთავარი მწვრთნელი ნოდარ მეტრეველი ორ წონას აორებს და მინსკში ცხრა სპორტსმენით გამოვალთ. გთავაზობთ

ჩვენი ნაკრების შემადგენლობას: 
60 კგ. ამირან პაპინაშვილი, ლუხუმ ჩხვიმიანი
66 კგ. ვაჟა მარგველაშვილი, ბაგრატ ნინიაშვილი
73 კგ. ლაშა შავდათუაშვილი
81 კგ. ლუკა მაისურაძე
90 კგ. ბექა ღვინიაშვილი
100 კგ. ვალერი ლიპარტელიანი
+100 კგ. გურამ თუშიშვილი

ყოველდღიური სპორტული გაზეთი "ლელო"
1213
მკითხველის კომენტარები / 1 /
თეიმურაზ რეხვიაშვილი
0
კარგი იქნებოდა თუ ჭრიკიშვილსაც გამოუნახავდენ
ადგილს
მსგავსი ამბები
რუბრიკის სხვა სიახლეები
;