მერაბ ბაზაძე: მსოფლიოზე მედლისთვის ვიბრძოლებთ

ამას წინათ სერბულმა ნოვი სადმა მოფარიკავეთა ევროპის ჩემპიონატს უმასპინძლა.

ჩვენმა მოხმალავე სანდრო ბაზაძემ, როგორც შარშან თბილისში, ბრინჯაოს მედალი დაიმსახურა, ხოლო მოხმალავეთა ნაკრები მერვე ადგილზე გავიდა.

ევროპაზე საასპარეზოდ ვერ ჩამოვიდა ხმალში კონტინენტის შარშანდელი ჩემპიონი თეოდორა კახიანი, რომელიც ამერიკაში ცხოვრობს და სავიზო პრობლემა ვერ მოაგვარა.

სერბულ ბატალიებსა და სამომავლო გეგმებზე გვესაუბრება საქართველოს მოფარიკავეთა ნაკრების მთავარი მწვრთნელი მერაბ ბაზაძე.

-კონტინენტის პირველობისთვის საფუძვლიანად მოვემზადეთ, - გვითხრა მან. - განსაკუთრებით მნიშვნელოვანი იყო მსოფლიოს საუკეთესო მოხმალავეებთან ერთად რუსეთის დედაქალქში ერთობლივი შეკრება მოსკოვის გრან პრის წინ, შემდეგ ესპანეთში მსოფლიოს თასზე გადავინაცვლეთ.

ორივე შეჯიბრებაში ქართველმა მუშკეტერებმა ნორმალური შედეგები აჩვენეს, რაც იმის თქმის საბაბს გვაძლევდა, რომ ნოვი სადში მედალს მოვიპოვებდით.

მართლაც, მოხმალავე სანდრო ბაზაძემ 2017 წლის შედეგი გაიმეორა, არადა, უფრო დიდ წარმატებასთანაც ძალიან ახლოს იყო. სანდრომ ჯგუფში ხუთი მეტოქე დაჯაბნა - სერბი იოვანოვიჩი, ბრიტანელი ჰონეიბონი, ბელარუსი კირპიჩოუ, რუმინელი დრაგომირი, პოლონელი ლადემანი და მხოლოდ ერთი შეხვედრა დათმო გერმანელ მაქს ჰარტუნგთან, რომელიც მსოფლიოს ჩემპიონატების ერთი ოქროს და ორი ბრინჯაოს, მედლის მფლობელია.

ალემანმა შარშან თბილისში ევროპის ჩემპიონატის ნახევარფინალში მოუგო სანდროს და მერე ევროპის ჩემპიონობაც მოიპოვა. სერბეთში ჯგუფური ეტაპის მერე ფორტუნამ გერმანელი და ქართველი ნახევარფინალშიც შეახვედრა ერთმანეთს.

მანამდე პლეი ოფში ქართველმა მოხმალავემ ამჟამინდელი რეიტინგით მეთერთმეტე ადგილზე მყოფი ფრანგი ბოლად აპიტი, ლონდონის ოლიმპიადის ბრინჯაოს პრიზიორი, მსოფლიოს და ევროპის რუმინელი ჩემპიონი ტიბერიუ დოლნეჩეანუ, იტალიელი მსოფლიოს ჩემპიონი და ბრინჯაოს პრიზიორი, კონტინენტის პირველობების ორი ვერცხლისა და ერთი ბრინჯაოს მფლობელი ლუკა კურატოლი დაამარცხა.

ნახევარფინალში, როგორც ვთქვით, ჰარტუნგს დაუპირისპირდა. ორთაბრძოლა დაძაბულად და დრამატულად წარიმართა. მართალია, ფინიშის სწორზე სანდრო 14:12 დაწინაურდა, მაგრამ გამოცდილებით გერმანელმა აჯობა და ჩემპიონობა შეინარჩუნა.

- სხვა მოფარიკავეებზე რას იტყვით?

- მართალია, მედალს ვერ მიუახლოვდნენ, მაგრამ მოხმალავეებს - ლიკა ჯიჯეიშვილს, ბექა ბაზაძეს, მიხეილ მარდალეიშვილს, ნიკა შენგელიას, რაპირისტ ლუკა ღაღანიძეს და დაშნით მოფარიკავე მაია გუჩმაზოვას ცუდი შთაბეჭდილება არ დაუტოვებიათ, ამიტომაც ამ შვიდეულიდან ექვსი მოფარიკავე 19 ივლისს ჩინეთში მსოფლიოს ჩემპიონატზე გაემგზავრება.

მოხმალავეთა გუნდში შენგელიას საკმაოდ პერსპექტიული ახალგაზრდა სპორტსმენი ვაჟა რეჭია შეცვლის. მსოფლიოზე ვერ წავა თეოდორა კახიანი, რადგან წლეულს ლიკა ჯიჯეიშვილმა, იმის მიუხედავად, რომ ის მხოლოდ 18 წლისაა, საერთაშორისო სარბიელზე კარგი შედეგები აჩვენა და ახლა მსოფლიოს კლასიფიკაციით 87-ეა, ხოლო კახიანი 268-ე ადგილზე იმყოფება. ლიკას ყოველგვარი მონაცემები აქვს საიმისოდ, რომ ტოკიოს თამაშების საგზური მოიპოვოს.

- მსოფლიოსთვის მხოლოდ თბილისში მოემზადებით?

- უკვე გადავერთეთ აზიურ დროზე - წვრთნას დილის შვიდ საათზე ვიწყებთ, რომ შემდეგ ჩინეთში აკლიმატიზაცია გაგვიადვილდეს. ორჯერადი ვარჯიშები გვაქვს. 7 ივლისს ჰონკონგში გავემგზავრებით - იქაურმა ფარიკაობის ფედერაციამ საკუთარი სახსრებით მიგვიწვია მსოფლიომდე ერთობლივი საწვრთნელი შეკრებისთვის.

ვფიქრობ, წარმატების მიღწევაში ესეც დაგვეხმარება - გამიზნული გვაქვს, ჩინეთში ერთი მედალი მოვიპოვოთ და მოხმალავეთა გუნდი მეოთხედფინალში მოხვდეს. სარეიტინგო ქულები გვჭირდება. 2020 წლის ოლიმპიადისთვის რვა საუკეთესოში თუ ვიქნებით, თამაშებზე გუნდურშიც ვიბრძოლებთ მედლებისთვის. ამჟამად 168 ქულით მე-12 ადგილზე ვართ.

- სალიცენზიო ტურნირები როდის დაიწყება?

- გაისად. წლეულს რამდენიმე მნიშვნელოვანი შეჯიბრება გამოვტოვეთ, რადგან ჩვენი ბიუჯეტი ყველაფერს ვერ გასწვდება. სულ 450.000 ლარი გამოგვიყვეს, რაც სამ ასაკობრივ კატეგორიაზე გადავანაწილეთ.

არადა, უცხოელი მოფარიკავეები ამაზე მეტ თანხას წელიწადში ერთ სპორტსმენზე ხარჯავენ. კიდევ კარგი, რომ რამდენიმე წელიწადია, ბანკი "ქართუ" აქტიურად გვეხმარება, თორემ ბოლოდროინდელი წარმატებების მიღწევა გაგვჭირდებოდა. ტოკიოს ლიცენზიების მოსაპოვებლად 2019 წელს შეჯიბრება არ უნდა ჩავაგდოთ, ამიტომ ხარჯიც საგრძნობლად გაიზრდება. აქტიური თანადგომის შემთხვევაში, ქართველი მოფარიკავეებიც გვასახელებენ.

ყოველდღიური სპორტული გაზეთი "ლელო"
1381
მკითხველის კომენტარები / 0 /
მსგავსი ამბები
რუბრიკის სხვა სიახლეები
;