მერაბ მეტრეველი: ჩვენი მიზანი ჩემპიონობის შენარჩუნებაა

სასპორტო კომპლექს "არენაში" გუშინ საქართველოს ხელბურთელ ვაჟთა ეროვნული ჩემპიონატის პირველი წრის შეხვედრები დაასრულეს აღმოსავლეთის რეგიონის გუნდებმა. "პეგასის" ახალგაზრდულმა გუნდმა გორელებს სძლია და მესამე ადგილზე გადაინაცვლა, რითაც ფინალურ ოთხეულში ადგილი განიმტკიცა.

პეგასი-გორი  42:31

"პეგასმა" წლევანდელ ჩემპიონატში ერთ-ერთი წამყვანი ხელბურთელი ცხოვრებაძე მოისაკლისა. შეგახსენებთ, რომ იგი "მონპელიეში" გადავიდა. ამიტომ ლიდერობა დიხამინჯიამ იტვირთა.

სწორედ მისი აქტიური თამაშის შედეგი იყო, რომ მასპინძლებმა გუშინდელი შეხვედრა თერთმეტბურთიანი უპირატესობით მოიგეს. არადა, სტუმრებმა პირველი ტაიმი მხოლოდ ერთი ბურთის სხვაობით დათმეს - 15:16.

შესვენების შემდეგ გორელებმა სწორედ დიხამინჯიას შეჩერება ვერ შეძლეს, რომელმაც 13 გოლი მიითვალა. გორელთაგან 11 ბურთით საუკეთესო იყო გაგლოშვილი. მატჩში სულ შვიდი შვიდმეტრიანი დაინიშნა. "პეგასმა" 4-დან ორის, ხოლო "გორმა" სამიდან ერთი პენალტის რეალიზება შეძლო. საბოლოოდ თბილისელებმა 42:31 გაიმარჯვეს.

იმედი-სტუ 29:28

ამ შეხვედრაში ფავორიტად ქვეყნის ჩემპიონი თელავის "იმედი" მიიჩნეოდა, რომელიც ამჟამად გათამაშების ცხრილს უდგას სათავეში. თუმცა საქართველოს მრავალგზის ჩემპიონ სტუ-"ქარიშხალასაც" უკან დასახევი გზა არ ჰქონდა, რადგან განვლილ ექვს ტურში განცდილი ოთხი მარცხის შემდეგ კიდევ ერთი წაგება მათს ფინალურ ოთხეულში მოხვედრას თითქმის შეუძლებელს ხდიდა.

ამიტომაც მატჩი დაძაბულად და დრამატულად წარიმართა. პირველი ტაიმი გარდამავალი უპირატესობით მიმდინარეობდა და გუნდები შესვენებაზე რომ წავიდნენ, ტაბლოზე თანაბარი რიცხვები ეწერა - 16:16.

პაექრობის მეორე ნახევარში ორთაბრძოლის სცენარი, ფაქტობრივად, არ შეცვლილა, მაგრამ საფინალო სასტვენამდე 6 წუთით ადრე თელაველებმა მოახერხეს 4 ბურთით წინ გასვლა. მასპინძლებმა ხუთწუთიან მონაკვეთში შეძლეს სამი ბურთის გაქვითვა.

დრამატული გამოდგა ფინიში: როცა ანგარიში გახდა 28:27 "იმედის" სასარგებლოდ, მოქმედი ჩემპიონის კარში შვიდმეტრიანი დაინიშნა. გიორგი კობახიძის დარტყმული ბურთი ძელს მოხვდა (წაგების ერთ-ერთი მიზეზი, ალბათ, ესეც იყო - სტუ-მ შვიდიდან მხოლოდ სამი პენალტი გაიტანა) და თელაველთა კონტრეტევა გივი გიორგაძემ გოლით დააგვირგვინა.

ბოლო წამზე "ქარიშხალამ" ანგარიშში სხვაობა ერთ ბურთამდე შეამცირა და მატჩიც ასე დამთავრდა - 29:28 გაიმარჯვა "იმედმა" და 12 ქულით პირველ ადგილზეა.

-ძალიან დაძაბული მატჩი იყო, იმის მიუხედავად, რომ ორივე გუნდი მოედანზე შესუსტებული შემადგენლობით გავიდა, - გვითხრა შეხვედრის შემდეგ თელავის "იმედის" მთავარმა მწვრთნელმა მერაბ მეტრეველმა.

 "ქარიშხალა" ახალი სეზონისთვის რამდენიმე წამყვანმა ხელბურთელმა დატოვა, ამ ორთაბრძოლაში ჩვენც დაგვაკლდნენ ტრავმირებული იობაშვილი და აბაშიძე, ასევე, უცხოურ კლუბში გასინჯვაზე მყოფი ალანია. გუნდის სხვა წევრებს კი მეორე ტაიმში დაღლილობა დაეტყოთ.

ამიტომაც საფინალო სასტვენამდე ორიოდე წუთით ადრე ოთხბურთიანი უპირატესობა გავანიავეთ და კინაღამ წავაგეთ. საბედნიეროდ, ყველაფერი ჩვენდა სასიკეთოდ დასრულდა.

ახლა, გაზაფხულამდე, სანამ მეორე წრის პაექრობები დაიწყება, უკეთ მომზადების საშუალება გვექნება, დაგვიბრუნდებიან ტრავმირებული ხელბურთელები. შევსებაც გვყავს - კალათბურთიდან ორმეტრიანი 20-21 წლის სამი ბიჭი დავიმატეთ. გაისად სავარჯიშო პირობებიც უკეთესი გვექნება.

- რას გეგმავთ საგაზაფხულო ეტაპისთვის?

- მარტის დასაწყისამდე თელავში მწყობრში ჩადგება ხელბურთის სასახლე ორი მოედნითა და მაყურებლებისთვის ტრიბუნებით. ეროვნული ჩემპიონატის მეორე წრე თუ მიმოსვლით ჩატარდება, მეტოქეებს უპრობლემოდ მივიღებთ.

ჩვენი უპირველესი მიზანია ფინალურ ოთხეულში მოხვედრა, იქ კი ჩემპიონობის შესანარჩუნებლად ვიბრძოლებთ. უმთავრესი კონკურენტები არიან ბათუმის "შავი ზღვის ბიჭები" და ქუთაისი. არ არის გამორიცხული, მეორე წრეში "პეგასის" ახალგაზრდულმა გუნდმა სიურპრიზები შემოგვთავაზოს.

თ მ ფ წ ბ ქ
იმედი         7 6 0 1 224-199 12
ბათუმი       4 4 0 0 149-108 8
პეგასი         7 4 0 3 262-228 8
ქუთაისი      4 3 0 1 146-110 6
გორი           7 3 0 4 233-255 6
სტუ            7 2 0 5 206-217 4
წყალტუბო   4 0 0 4 121-164 0
სამტრედია   4 0 0 4 90-140 0

20-22 დეკემბერს ქუთაისში პირველ წრეს დაასრულებს დასავლეთის ოთხი გუნდი - ბათუმის "შავი ზღვის ბიჭები", "ქუთაისი", "წყალტუბო" და "სამტრედია".

ყოველდღიური სპორტული გაზეთი "ლელო"
976
მკითხველის კომენტარები / 0 /
მსგავსი ამბები
რუბრიკის სხვა სიახლეები
;