მერაბ შარიქაძე: გულშემატკივარს ჩვენი სჯერა

მერაბ შარიქაძემ კვირის დასაწყისში ვარჯიში გამოტოვა, თუმცა ახლა თავს კარგად გრძნობს და ფიქრობს, რომ უელსთან ჯახს გუნდიც კარგ ფორმაში ხვდება:

"ექიმებმა კარგად მიმკურნალეს და ახლა ყველაფერი რიგზეა. გუნდიც ბრწყინვალე ფორმაშია და იმედია ჩვენი შესაძლებლობების მაქსიმუმს ვაჩვენებთ. 2015 წლის მსოფლიო თასზე ამ სტადიონმა ძალიან კარგი მოგონებები დაგვიტოვა და იმედია, ეს გამოცდილება უელსთან მატჩშიც დაგვეხმარება".

კაპიტანი ფიქრობს, მეტოქის უპირატესობა სწრაფი თამაში იქნება, კანადასთან 54:22 მოგების შემდეგ კი, ქართველი გულშემატკივარი ძლიერ მეტოქესთან კარგი თამაშის მოლოდინშია:

"უელსის მთავარი სიძლიერე სწრაფი თამაშია. ისინი ნახავდნენ ჩვენი და კანადის შეხვედრას, ეცდებიან ბურთი სწრაფად გაათამაშონ და უპირატესობა ამის ხარჯზე მოიპოვონ.

ქართველი ქომაგი რაგბში ძალიან კარგადაა გათვითცნობიერებული და ზუსტად იციან რა სიძლიერის გუნდთან მოგვიწევს შეხვედრა, თუმცა კანადასთან კარგი თამაშისა და გამარჯვების შემდეგ, მათ ბევრად მეტი უნდათ. მათ ჩვენი სჯერათ და გამარჯვების მოლოდინში არიან".

შარიქაძეს პრესკონფერენციაზე ჰართპურიში გატარებულ წლებზე და უელსისა და გლოსთერის ფლანკერ როს მორიარტიზეც კითხეს:

"ეს ჩემთვის დიდი გამოცდილების ორი საოცარი წელიწადი იყო. იქ ძალიან ბევრი რამ ვისწავლე, რაც კარიერაში გამომადგა და ამისათვის ჰართპური კოლეჯის მადლობელი ვარ.

მორიარტი ჩემი მეგობარია, ჩვენ ჰართლპურიში ერთად ვსწავლობდით და ვთამაშობდით. სამწუხაროდ, ახლა ის ტრავმირებულია და მას გამოჯანმრთელებას ვუსურვებ".

rugby.ge

2582
მკითხველის კომენტარები / 0 /
მსგავსი ამბები
რუბრიკის სხვა სიახლეები
;