მერანი თბილისი. ეროვნული ლიგის დებიუტანტი სპონსორის მოლოდინში. სტადიონიც შენდება...

  • ირაკლი შენგელია

თბილისის "მერანი" 2020 წლის საფეხბურთო სეზონში ქვეყნის 10 საუკეთესო გუნდს შორის იასპარეზებს. ავთანდილ შენგელიას გაწვრთნილებმა გასული ეროვნული ლიგა 2-ის 33-ე ტურში "შევარდენი" 4:0 დაამარცხეს და ფინიშამდე 3 ტურით ადრე ელიტის საგზური მოიპოვეს.

ეროვნული ლიგა მარტში განახლდება და საინტერესოა, რა გეგმებით ხვდება "მერანი" ეროვნულ ლიგაში სადებიუტო სეზონს. ცნობილია, რომ კლუბმა ორი მიმართულებით მუშაობა უკვე დაიწყო: "ნორჩი დინამო მერანი", რომლის ბაზაზეც თბილისის "მერანი" შეიქმნა, 2020 წლიდან  "ნორჩი დინამოს" ბავშვთა აკადემიის გაძლიერებას ცდილობს და დირექტორად ამ სკოლის აღზრდილი, საქართველოს ნაკრების ყოფილი თავდამსხმელი გიორგი დემეტრაძე მიიწვიეა.

ამავე დროს, დემეტრაძე აქტიურად ითანამშრომლებს ინფრასტრუქტურული პროექტების მიმართულებით, რომელიც კლუბმა დაგეგმა - საკუთარი ხარჯებით ლილოს დასახლებაში სტადიონის მშენებლობა დაიწყო, მანამდე კი გუნდი "მიხელ მესხი 2-ზე" ითამაშებს.

"მერანის" სპორტულმა დირექტორმა ირაკლი შენგელიამ "ლელოსთან" გუნდის მოსამზადებელ გეგმებზე ილაპარაკა.

"გუნდში ჯერ უმნიშვნელო საკადრო ცვლილებებია. "მერანი" მცველმა გიგა სამხარაძემ დატოვა. მოსულებში ჯერ მხოლოდ საჩხერის "ჩიხურას" თავდამსხმელი მიხეილ სარდალიშვილია. მოლაპარაკება კიდევ სამ მოთამაშესთან გვაქვს. ჯერ სხვა სიახლე არ არის. რაც შეეხება შეკრებებს, ჯერ გუნდს ვარჯიში არ დაუწყია. 15 იანვარს თბილისში შევიკრიბებით და ნაძალადევში მდებარე ჩვენს სტადიონზე, "შრომით რეზერვებზე" დავიწყებთ ვარჯიშს. 15 თებერვლიდან კი მეორე შეკრების მოწყობა უცხოეთში გვსურს. მაგრამ სად, ჯერ არ დაგვიზუსტებია", - ამბობს შენგელია.

მისი თქმით, არ არის გამორიცხული, "მერანს" მალე ახალი სპონსორი გამოუჩნდეს: "ჯერ ამაზე ვერ დავკონკრეტდები, მაგრამ იმედი არის, რომ სპონსორი გვეყოლება. ამავე დროს, სტადიონის მშენებლობა მიმდინარეობს და საძირკველი ჩაყრილია. გვინდა, მშენებლობა მაქსიმალურად სწრაფად დავასრულოთ. ლილოს სტადიონზე ერთი ბუნებრივი და ერთიც ხელოვნურსაფარიანი მოედანი დაიგება, მთავარ არენასთან 3000 მაყურებელზე გათვლილი ტრიბუნა აშენდება. ფეხბურთის ფედერაციის პრეზიდენტი დახმარებას გვპირდება. ლევან კობიაშვილმა გვითხრა - როგორც კი მთავარ სამუშაოებს დაასრულებთ, მოედნის საფარს დავაგებთო. ეს კლუბისთვის ძალიან მნიშვნელოვანი და ღირებული დახმარება იქნება, რადგან  სტადიონის მშენებლობა მნიშვნელოვნად შეუწყობს ხელს "მერანის" განვითარებას".

2104
მკითხველის კომენტარები / 0 /
მსგავსი ამბები
რუბრიკის სხვა სიახლეები
;