მესი და ინგლისელები: 18 გოლი 27 მატჩში

ისტორიის კუთვნილება გახდა ჩემპიონთა ლიგის 1/8 ფინალის პირველი ორი შეხვედრა. "ჩელსი" შინ დაუზავდა (1:1) "ბარსელონას", "ბაიერნმა" კი საშინაო შეხვედრაში 5:0 გაანადგურა "ბეშიქთაში".

მიუნხენურმა მატჩმა საბოლოოდ, თუმცა ჯერ არაოფიციალურად, გადაწყვიტა ორრაუნდიანი დაპირისპირების ბედი, ამიტომ, უფრო საინტერესოა, რა ითქვა ლონდონური ჯახის შემდეგ:

ანტონიო კონტე ("ჩელსის" მთავარი მწვრთნელი): "ჩვენ ძალიან ახლოს ვიყავით იდეალურ თამაშთან, მაგრამ, საბოლოო ჯამში, ეს არ გამოვიდა. როცა შეცდომას უშვებ ისეთი გუნდის წინააღმდეგ, როგორიც "ბარსელონაა", აუცილებლად დაისჯები ამ შეცდომის გამო.

მესი და ინიესტა ამას არავითარ შემთხვევაში არ გაპატიებენ... გული მწყდება, მაგრამ, ამავე დროს, ძალიან ამაყი ვარ ჩემი ფეხბურთელებით. მათ გააკეთეს ყველაფერი, რაც შეეძლოთ.

ზუსტად შეასრულეს ის გეგმა, რომელიც დავსახეთ. უბრალოდ, ცოტა არ გაგვიმართლა. არადა, ძალიან კარგად მოვემზადეთ ამ შეხვედრისთვის. ფეხბურთელებმა მინდორზე ბევრი იმუშავეს. შეიძლება, მეტსაც ვიმსახურებდით".

ერნესტო ვალვერდე ("ბარსელონას" მთავარი მწვრთნელი): "შედეგს ჩვენი გუნდისთვის პოზიტიურად ვაფასებ. ეს იყო ორი სხვადასხვა საფეხბურთო სტილის დაპირისპირება.

ჩვენ გვინდოდა ბურთი და თამაშის კონტროლი, მათ კი - სწრაფი კონტრშეტევები. ჩვენ ვდომინირებდით, მაგრამ არ გვყოფნიდა მომენტები. კარგია, წნეხი რომ გავაგრძელეთ და მეტოქეს შეცდომა დავაშვებინეთ.

ჩვენ შევძელით გატანა და ეს უმნიშვნელოვანესია. "ჩელსის" არ აწყობდა ასეთი შედეგი. ყველაფერი მეორე შეხვედრაში გაირკვევა".

ფაქტები

* არსებობის ისტორიაში "ბარსელონა" 7-ჯერ ეწვია "სტემფორდ ბრიჯს". კატალონიელთა ანგარიშზეა 1 მოგება, 2 ფრე და 4 წაგება. "ბლაუგრანამ" ლონდონში 2006 წლის თებერვალში მოიგო (2:1).

* იმ თამაშის შემდეგ "ჩელსის" ესპანურ კლუბებთან არ წაუგია ბოლო 8 დაპირისპირებაში (2 მოგება, 6 ფრე).

* ჩემპიონთა ლიგაში გატანილი 9 გოლიდან ვილიანმა 6 - საჯარიმოს გარედან შეაგდო.

* ვილიანის გარდა, 6 გოლი საჯარიმოს გარედან მხოლოდ კრიშტიანო რონალდოს აქვს გატანილი. ნეიმარმა თავი 5-ჯერ გამოიჩინა.

* ლიონელ მესი 27-ჯერ დაუპირისპირდა ინგლისურ კლუბებს და ამ თამაშებში 18 გოლი შეაგდო.

* მესიმ ბოლო 8 შეხვედრაში პირველად აიღო "ჩელსის" კარი.

* "ჩელსი" გახდა 71-ე კლუბი, რომელსაც მესიმ გაუტანა. მას მხოლოდ 11 გუნდისთვის არ გაუტანია.

* 881 წუთია, ლუის სუარესს ჩემპიონთა ლიგაში გოლი არ გაუტანია. მან ბოლოს თავი გამოიჩინა 2017 წლის მარტში, როცა "ბარსელონამ" "პარი სენ-ჟერმენის" წინააღმდეგ ითამაშა.

ყოველდღიური სპორტული გაზეთი "ლელო"
825
მკითხველის კომენტარები / 0 /
მსგავსი ამბები
რუბრიკის სხვა სიახლეები