მესი პიკეს ინტერვიუთი გაკვირვებულია: მან იცის, როგორც წყდება ჩვენთან ასეთი საკითხები... და აღიარება: ბარსელონადან მივდიოდი...

"ელ მუნდო დეპორტივოსთან" კომენტარში ლიონელ მესიმ ილაპარაკა ჟერარდ პიკეს ამასწინანდელ ინტერვიუზე, რომელშიც "ბარსელონას" მცველი ამბობდა - კლუბის ხელმძღვანელობა ჟურნალისტებს ფეხბურთელებზე კრიტიკულ წერილებს უკვეთავსო.

"მე არ ვიცი, ეს საიდან მოდის, პიკეს ჩვენთან ამ თემაზე არ ულაპარაკია. ამიტომაც გაკვირვებული ვარ. ის დიდი ხანია "ბარსელონას" ფეხბურთელია და ძალიან კარგად იცის, როგორ წყდება გუნდში ასეთი საკითხები.

სიმართლე გითხრათ, მე ასე არ მოვიქცეოდი. როცა გუნდში რთული პერიოდია, ასეთ თემებზე ლაპარაკი არა მგონია, გამართლებული იყოს. ეს არ უწყობს ხელს გუნდში ჯანსაღი კლიმატის არსებობას", - ამბობს მესი და იქვე აღიარებს, რომ ერთიხანობა "ბარსელონადან" წასვლაზეც ფიქრობდა:

"როგორც კი გაჩნდა საგადასახადო პრობლემები, მაშინვე დავფიქრდი "ბარსადან" აბარგებაზე, და არა მხოლოდ "ბარსადან", საერთოდ, ესპანეთის დატოვება მსურდა. ვიგრძენი, რომ ცუდად მეპყრობდნენ და აღარ მინდოდა დარჩენა. ეს იყო 2017 წელს...

მაგრამ საქმე ის იყო, რომ სხვა კლუბებისგან არასოდეს მიმიღია ოფიციალური წინადადება, რადგან საჯაროდ არაერთხელ მქონდა ნათქვამი, რომ "ბარსელონაში" კარიერის ბოლომდე მსურდა დარჩენა".

შემდეგ მესიმ კომენტარი გააკეთა ნეიმარის ყბადაღებულ არშემდგარ ტრანსფერზე: "მე ვიცოდი, რომ მას პსჟ-დან წასვლა სურდა და ამაზე პირადადაც მელაპარაკა. ამიტომ, როცა "ბარსელონაში" მისი დაბრუნება არ გამოვიდა, მეგონა, ფლორენტინო პერესი ყველა ღონეს იხმარდა "რეალში" მის გადასაყვანად. გამიკვირდა, ასე რომ არ მოხდა".

740
მკითხველის კომენტარები / 0 /
მსგავსი ამბები
რუბრიკის სხვა სიახლეები
;