[მეტოქე, VIDEO] ბელარუსი 1-0 უზბეკეთი. ეს ის დავალებებია, რაც ფეხბურთელებს საქართველოსთან მატჩისთვის მივეცით. მდუმარე გოლიათი და კმაყოფილი მარხელი

ბელარუსის ეროვნულმა ნაკრებმა საქართველოსთან მატჩის წინ გასამართი ორი ამხანაგური მატჩიდან ერთი მოითავა. მიხაილ მარხელის მიერ გაწვრთნილმა გუნდმა დუბაიში 1:0 დაამარცხა უზბეკეთის საკმაოდ ძლიერი ნაკრები. ერთხელაც დამტკიცდა, რაოდენ სერიოზულ მეტოქესთან გვიწევს დაპირისპირება 26 მარტს და საამისოდ სრული მზაობა გვმართებს...

...საგოლე შანსები ორივე კართან იყო. ერთადერთი გოლი პაველ ნეხაიჩიკმა შეაგდო იგორ სტასევიჩის გადაცემით. ბოლო დროის სკანდალის მიუხედავად, სახელმწიფოს ჩარევის შემდეგ ბატე-ს, "შახტიორსა" და ბრესტის "დინამოს" მაინც მოუწიათ წამყვან ფეხბურთელებთან შელევამ.

ანგარიშში სხვაობა უფრო სოლიდური იქნებოდა, სტანისლავ დრაგუნს 11-მეტრიანისას რომ ეყოჩაღა. 26-ე წუთზე გატანილი გოლით ბელარუსი უკვე იგებდა, როცა მათ ლიდერს უზბეკთა კარის დარაჯმა ელდორბეკ სუიუნოვმა პენალტის ნიშნულიდან არ გაატანინა.

ბელარუსი: პავლიუჩენკო - მატვეიჩიკი, პოლიტევიჩი, პავლოვეცი, ბურკო (90. შვეცოვი) - კორზუნი (67. ლისაკოვიჩი), კენდიში - ნეხაიჩიკი (90. კარპოვიჩი), დრაგუნი, სტასევიჩი - ლაპტევი (78. პოდსტრელოვი).

ბელარუსთა შემადგენლობაში არ უთამაშიათ რუსეთსა და ყაზახეთში მოასპარეზე ლეგიონერებს. 26 თებერვალს მიხაილ მარხელის გუნდი კიდევ ერთ სპარინგს გამართავს - სოფიაში ბულგარეთს შეხვდება.

* * *

ამ შეხვედრას საინტერესო წერილი მიუძღვნა ბელარუსულმა გამოცემა "პრესბოლმა" და მიხაილ მარხელის პატარა ინტერვიუც გვაახლა. ჯერ ანალიტიკურ მასალას გავეცნოთ, მთავარი მწვრთნელის ნააზრევი კი ბოლოსთვის მოვიტოვოთ:

"ბელარუსის ნაკრებმა გადალახა არაერთი სირთულე - ქვეყნის წამყვანი კლუბების წინააღმდეგობა, ათასობით კილომეტრი და მაინც ითამაშა დუბაიში ამხანაგური შეხვედრა უზბეკეთთან, რომელიც 1:0 მოიგო. ეს გასაგებია, მაგრამ რა შეიძლება კიდევ ითქვას? რით იყო ყოველივე ეს სასარგებლო ქვეყნის უმთავრესი გუნდისთვის?

 ამის შემდეგ მოდის ბულგარული შეკრება და თამაში იქაურ ნაკრებთან. ამდენად, ჩვენ გთავაზობთ, შეკრების "პირველ ტაიმად" განვიხილოთ დუბაის მატჩის პერიპეტიები, სადაც ნაკრები ვერ ითამაშებდა, რომ არა სპორტის მინისტრის დიდი ძალისხმევა. კარგია, რომ მარხელის გუნდი საქართველომდე ორ ამხანაგურ შეხვედრას ჩაატარებს. ბულგარული "მეორე ტაიმიც" ერთობ წაგვადგება...

საიდანაც არ უნდა შეხედო, ეს შეკრება ძალიან საჭიროა ბელარუსის ნაკრებისთვის. ხუმრობა საქმე ხომ არ არის - ნაკრების მთავარმა მწვრთნელმა საქმეში ნახა ძირითადი შემადგენლობის, ალბათ, ნახევარი მაინც და ეს მისასალმებელია. აქვე უნდა აღვნიშნოთ ისიც, რომ საქართველოს ნაკრებს ასეთი შესაძლებლობა არ აქვს...

ამ შეკრებაზე რამდენიმე, ძალზე მნიშვნელოვანი ნიუანსის ნახვის საშუალება გვეძლევა. მაგალითად იმის, თუ როგორ აპირებს მარხელი დრაგუნის გამოყენებას შეტევის ხაზთან უფრო ახლოს. ეს სავსებით ლოგიკურია. თუ ბოლო წლებში ნაკრების თამაშებს დავაკვირდებით, ვნახავთ, რომ დრაგუნი ყველაზე მეტადაა დაჯილდოვებული ბომბარდირული თვისებებით. გუნდში კი აშკარაა გოლის გამტანის პრობლემა. რატომ არ უნდა მიეცეს მას შანსი ლაპტევთან (გოლიათი ბრესტიდან, რომელსაც ეროვნულ გუნდში 26 მატჩი აქვს ჩატარებული და ჯერ გოლი არ გაუტანია) ერთად, ან მის გარეშე? საინტერესოა, როდემდე გაგრძელდება გოლიათის დუმილი?

უზბეკეთთან მატჩში ლაპტევმა მიიღო დიდი სათამაშო დრო. გარდა ამისა, მოწინააღმდეგის დაცვა ვერ იყო მოწოდების სიმაღლეზე, მაგრამ... ნუთუ, ეს არ არის საკმარისი მიზეზი იმისთვის, რომ, ბოლოს და ბოლოს, შანსი მიეცეს ილია შკურინს?

მივადექით ბელარუსის ნაკრების კიდევ ერთ დიდ პრობლემას, რომელიც არც დღეს დაწყებულა და არც გუშინ. ესაა საგოლე მომენტების რეალიზაციის დაბალი პროცენტი. ამის თაობაზე ძალიან ბევრს საუბრობდა თავის ლეგენდარულ გამოსვლებში ნაკრების ყოფილი თავკაცი გიორგი კონდრატიევი...

თუნდაც უზბეკეთთან თამაში რომ ავიღოთ, იყო რამდენიმე გონივრულად გათამაშებული კომბინაცია, იყო კარგი მომენტები, მაგრამ არ იყო სიზუსტე დამაგვირგვინებელ ფაზაში, თავი რომ დავანებოთ გამოუყენებელ 11-მეტრიანს. მეორე მხრივ, სასიამოვნოა ის, რომ ბელარუსის ნაკრების მთავარი მწვრთნელი აქცენტს შემოქმედებით ფეხბურთზე აკეთებს...

წამყვანი მეკარეების ტრავმებმა საშუალება მოგვცა, შეგვეფასებინა ახალგაზრდა პავლიუჩენკოს პროგრესი. ბრესტის "დინამოს" კარის დარაჯი უმოკლეს ხანში გახდა ნაკრებში ნომერი პირველი და, როგორც ჩანს, ის სავსებით მომზადებული შეხვდა ამ გამოწვევას. ნაკრების სამწვრთნელო შტაბი, ალბათ, საბოლოოდ დარწმუნდა, რომ პავლიუჩენკოს შეუძლია კონკურენცია გაუწიოს დანარჩენ მეკარეებს.

თუ მარტინოვიჩის ტრავმას გავითვალისწინებთ, რომელმაც შეიძლება თბილისური შეხვედრა გამოტოვოს, ხომ არ არის შესაძლებელი, რომ ის შემადგენლობა, რომელმაც უზბეკეთთან ითამაშა, ძალიან ახლოს დგას იმასთან, რასაც საქართველოს დედაქალაქში ვიხილავთ?".

* * *

ახლა ვნახოთ, რა თქვა უზბეკეთთან გამარჯვების შემდეგ ბელარუსის ნაკრების მთავარმა მწვრთნელმა მიხაილ მარხელმა:

- ყოველთვის სასიამოვნოა, როცა იგებ. ჩვენ დიდი ხანია, არ მოგვიგია და გამარჯვება ამ მხრივაც მნიშვნელოვანი იყო. ამხანაგური შეხვედრის მიუხედავად, ამ შედეგს გარკვეული დატვირთვა და ფასი აქვს. ეს იყო გამარჯვება, რომელიც, უპირველეს ყოვლისა, ფსიქოლოგიური სიმტკიცისთვის გვჭირდებოდა. მიმაჩნია, რომ კარგი თამაში გამოგვივიდა.

- ტრიბუნიდან ასე ჩანდა: რაც უფრო ახლოვდებოდა თამაშის დასასრული, ბელარუსის ნაკრები უფრო და უფრო უმატებდა...

- დიდი დრო გავიდა მას შემდეგ, რაც გუნდმა ბოლო შეკრება ჩაატარა. ამის გათვალისწინებით, ძალიან გვჭირდებოდა ეს შეკრება, ამხანაგური თამაშები... ამას თუ გავითვალისწინებთ, თამაში ჩვენთვის აშკარად შედგა. გაგვახარეს მათ, ვინც 90 წუთი ითამაშა და მათაც, ვინც შეცვლაზე შევიდა.

- რა იყო მთავარი მიზანი ამ სპარინგში - გამარჯვება თუ სხვადასხვა კომპონენტების დახვეწა-დამუშავება?

- როცა საქმე ნაკრებს ეხება, შედეგი მუდამ მთავარია და ის თავში დგას. ჩვენ ვცდილობდით, დადებითი შედეგით დაგვესრულებინა მატჩი და, ამავე დროს, ვცდილობდით იმასაც, რომ დაგვემუშავებინა სხვადასხვა აუცილებელი კომპონენტი. ეს ის დავალებებია, რომელთაც ჩვენ მივცემთ ფეხბურთელებს საქართველოს ნაკრებთან თამაშის წინ.

1724
მკითხველის კომენტარები / 0 /
მსგავსი ამბები
რუბრიკის სხვა სიახლეები
;