[მეტოქე] ბობანის ბიძაშვილი, არშემდგარი პილოტი და სხვა ახალწვეულები. შერიფის მწვრთნელი საბურთალოსთან მატჩისწინა სამზადისზე

ტირასპოლის "შერიფის" ხორვატმა მთავარმა მწვრთნელმა ზორან ზეკიჩმა ჩემპიონთა ლიგის საკვალიფიკაციო ეტაპზე "საბურთალოსთან" დაპირისპირებაზე, მზადებასა და გუნდის ახალწვეულებზე ილაპარაკა:

"ჩემპიონთა ლიგისთვის მოსამზადებლად ცოტა დრო გვაქვს. ჩვენ მეტოქის სრულ ანალიზს გავაკეთებთ და მშვიდად ვიმუშავებთ. ჯერჯერობით, მეტოქის მხოლოდ ორი მატჩი ვნახეთ. "საბურთალოსთან" თამაშისთვის მზადება ორშაბათს დავიწყეთ. ორი დღე ფეხბურთელები გაძლიერებულ დატვირთვაზე გვეყოლება - რა თქმა უნდა, ეს ტაქტიკური დავალებების ფონზე მოხდება. პარასკევს მოლდოვის თასის მატჩს ჩავატარებთ. ვიცით, რომ მოწინააღმდეგე ძალიან ძლიერი არ არის, მაგრამ ეს მატჩი ტონუსის შესანარჩუნებლად დაგვჭირდება. "საბურთალოს" ორი თამაში ვნახეთ. ამ საკითხზე მოთამაშეებთან ჯერ არ გვილაპარაკია. ჩემპიონატის თამაში გვქონდა. ჩვენ უნდა მოვამზადოთ მშვიდად და გავაკეთოთ ანალიზი, რათა გავიგოთ, თუ როგორ უნდა ვითამაშოთ და სხვადასხვა ვითარებებში რა რეაგირება უნდა მოვახდინოთ. პირველ თამაშში მეტი გულშემატკივარი გვინდა, რადგან ჩვენთვის მათი მხარდაჭერა ძალიან მნიშვნელოვანი იქნება. ძნელია ფეხბურთის თამაში, როცა ტრიბუნაზე ცოტა ხალხია. მაგრამ მე მჯერა, რომ ჩვენ წარმატებას მივაღწევთ", - ამბობს ზორან ზეკიჩი.

"საბურთალოსთან" მატჩამდე "შერიფმა" 5 ახალი მოთამაშე დაიმატა და ერთს შეელია. პირველი ახალწვეული არტიომ გორდიენკოა - უკრაინის 19-წლამდელთა ნაკრებისა და ლუგანსკის "ზორიას" ნახევარმცველი, რომელმაც ამ გუნდის მაისურით ევროპალიგის ჯგუფურ ეტაპზე 9 თამაში ჩაატარა.

მოლდოვურმა კლუბმა თურქეთის მეორე ლიგის ბინადარ "ოსმანლისფორიდამ" უსმან ნდიაიე დაცვის გასაძლიერებლად აიყვანა - საფრანგეთის მოქალაქეობის მქონე 27 წლის სენეგალელი საინტერესო ისტორიის მქონე ფეხბურთელია. ის სამხედრო მფრინავობაზე ოცნებობდა. საფეხბურთო კარიერა საავიაციო სასწავლებლის დასრულების შემდეგ დაიწყო და "ლიონში" ვარჯიშობდა...

"საბურთალოს" წინააღმდეგ სათამაშოდ ხორვატული ფეხბურთის ლეგენდის, ზვონიმირ ბობანის ბიძაშვილი - გაბრიელ ბობანიც ემზადება. 29 წლის თავდამსხმელი ტირასპოლელებმა ხორვატული "ოსიეკადან" დაიმატეს, სადაც ადრე ზეკიჩის ხელმძღვანელობით თამაშობდა, თუმცა ცოტა გოლი გააქვს.

"შერიფმა" 26 წლის მცველი მატეი პალჩიჩიც დაიმატა, რომელმაც კარიერა სლოვენიურ "მარიბორში" დაიწყო, სლოვენიის ყველა ასაკობრივი ნაკრების წევრი იყო და ეროვნულ გუნდშიც უთამაშია, ბოლოს კი კრაკოვის "ვისლაში" გამოდიოდა.

ასევე საკუთარი ქვეყნის ყველა ასაკობრივი ნაკრების წვერი იყო ლივიდონ ლატიფიც. 25 წლის ალბანელმა ნახევარმცველმა 2017 წელს ეროვნული ნაკრების ფორმაც მოირგო - სულ კი შკიპერიელთა ნაკრებში 5 შეხვედრა ჩაატარა.

გუნდს სერბი ცენტრალური მცველი ვლადიმირ კოვაჩევიჩი დაემშვიდობა. მისი ტრანსფერი ბელგიურ "კორტრაიკს" ეკუთვნოდა და იჯარის ვადა ამოეწურა. არადა, ის "შერიფის" ერთ-ერთი ლიდერი იყო.

ამ ტრანსფერებით გუნდი ყველა რგოლში დაკომპლექტდა? ზეკიჩმა ამ კითხვასაც უპასუხა: "სამწუხაროდ, ჩემპიონატში ჯერ ამ ფეხბურთელების დამატების საშუალება არ გვქონდა. თითოეული მათგანი ცდილობს, საკუთარი შესაძლებლობები აჩვენოს. მიმაჩნია, რომ ისინი გუნდს დაეხმარებიან. კიდევ ერთი თავდამსხმელი და საყრდენი ნახევარმცველი გვინდა და მხოლოდ ამის მერე ვიტყვი, რომ საკადრო ამოცანები გადავჭერით".

აქვე ვიტყვით, რომ მოლდოვას დუბლების ჩემპიონატში შესვენებაა გამოცხადებული, პირველი ნახევარი კი ტირასპოლელთა ახალგაზრდულმა გუნდმა მოიგო, რომელსაც შოთა მახარაძე ავარჯიშებს...

ყოველდღიური სპორტული გაზეთი "ლელო"
714
მკითხველის კომენტარები / 0 /
მსგავსი ამბები
რუბრიკის სხვა სიახლეები
;