[მეტოქე] ირლანდიურმა მედიამ ნაკრების სავარაუდო შემადგენლობა დაასახელა... მაკარტის აგრესიული ფეხბურთელები სჭირდება

ირლანდიურ სპორტულ მედიაში ფეხბურთი ძალიან კარგად შუქდება. ბევრი იწერება იმ თამაშზეც, რომელიც სულ მალე თბილისში უნდა გაიმართოს და რომელშიც ერთმანეთს საქართველოსა და ირლანდიის ეროვნული გუნდები ერთმანეთს ევრო 2020-ის საკვალიფიკაციო ეტაპის ეგიდით დაუპირისპირდებიან...

"იმ შეხვედრაში, რომელშიც ირლანდიის ეროვნული ნაკრები საქართველოს შეხვედება, ძალიან ბევრი რამ გადაწყდება, - წერს balls.ie, - აქედან გამომდინარე, მატჩს უდიდესი მნიშვნელობა აქვს ირლანდიის ნაკრებისთვის...

მიკ მაკარტიმ უკვე განაცხადა, რომ თბილისში 4-3-3 სქემით ითამაშებს. ირლანდიის ნაკრების სავარაუდო შემადგენლობა, რამდენიმე ფაქტორზე დაყრდნობით, ასეთი უნდა იყოს:

დარენ რენდოლფი - ამ შემთხვევაში დიდი დებატები ნამდვილად არ გვჭირდება. რენდოლფი ირლანდიის ნაკრების ნომერ პირველი მეკარეა. მას სათამაშო დრო არ აკლია "მიდლსბროში". აქედან გამომდინარე, თუ განსაკუთრებული რამ არ მოხდა, თბილისში კარი სწორედ მან უნდა დაიცვას.

სიმუს კოულმენი - ფლანგზე შეუცვლელი ფეხბურთელია ირლანდიის ნაკრებისთვის. მართალია, ამ უქმეებზე წითელი ბარათი მიიღო, მაგრამ ეს ნებისმიერი ფეხბურთელის კარიერაში შეიძლება მოხდეს.

კევინ ლონგი - ეს არ არის იდეალური არჩევანი მიკ მაკარტისთვის, მაგრამ შეინ დაფისა და რიჩარდ კეოს ტრავმამ მწვრთნელს არჩევანის საშუალება წაართვა. ბოლო ორი წელია, ამ ადგილას დაფი თამაშობდა, მაგრამ ახლა ის დაშავებულია და მიუხედავად იმისა, რომ ამბობს - მზად ვარო, მაღალი ალბათობით ის საქართველოს ნაკრებთან შეხვედრას გამოტოვებს.

ჯონ იგანი - "შეფილდ იუნაიტედის" მცველი ძირითადში თამაშს ალბათ თავადაც არ ელოდებოდა, მაგრამ ვითარება მას შემდეგ შეიცვალა, რაც კეო და დაფი დაშავდნენ. იგანს მნიშვნელოვანი გამოცდის ჩაბარება მოუწევს.

მეტ დოჰერტი - დიდი ალბათობით, თბილისში მისთვის უცხო, მარცხენა მცველის პოზიციაზე ითამაშებს. ირლანდიას ამ პოზიციაზე პრობლემები მას შემდეგ შეექმნა, რაც ენდა სტივენსი დაშავდა. მაკარტი მიიჩნევს, რომ დოჰერტის დიდი გამოცდილება შეეშველება ახალი როლის კარგად მორგებაში.

ჯოშ კულენი - საქმეს ისეთი პირი უჩანს, ვერ ითამაშებს გლენ ველანიც. ამ გამოცდილი ცენტრალური ნახევარმცველის შემცვლელად მაკარტის სწორედ კულენი ესახება. ამ უკანასკნელს ნაკრებში დებიუტი ბულგარეთის ნაკრებთან შეხვედრაში ჰქონდა და კარგადაც გაისარჯა.

კონორ ჰურიჰანი - "ასტონ ვილას" შემადგენლობაში უბრალოდ ბრწყინვალე იყო "ნორვიჩთან" შეხვედრაში - გაიტანა გოლი, მოიპოვა 11-მეტრიანი და გააკეთა საგოლე პასი. წესით და რიგით, თბილისში მთავარი კაცი უნდა იყოს.

ჯეფ ჰენდრიკი - ამ დროისთვის ძალიან კარგ ფორმაშია. ჰენდრიკის თამაშზე დიდწილადაა დამოკიდებული ირლანდიელთა გარჯის ხარისხი. ის გამოცდილი ფეხბურთელი და ნაკრების ერთ-ერთი ლიდერია.

კალუმ რობინსონი - ადვოლი შესაძლებელია, თამაში შემტევი სამეულის შუაში დაიწყოს, თუმცა ამ დროისთვის მისი გამოჩენა უფრო მარჯვენა ფლანგზეა მოსალოდნელი. შუაში კი რობინსონი იმ შემთხვევაში ითამაშებს, თუ შონ მაგუაირი ვერ გამოჯანმრთელდება, ხოლო დევიდ მაკგოლდრიკი ისედაც ვერ ითამაშებს.

აარონ კონოლი - ვნახოთ, სად დააყენებენ. ჩვენი ვარაუდით, ის უფრო შეტევის ფლანგიდან დაიწყებს თამაშს. შესანიშნავ ფორმაშია, რადგან ორი გოლი გაუტანა "ტოტენჰემს". ცოტა ხნის წინ მის შესახებ მაკარტიმ ძალიან თბილად ილაპარაკა.

ჯეიმს კოლინზი - ალბათ, სწორედ ამ  ფეხბურთელს არჩევს მიკ მაკარტი შონ მაგუაირს. რაც სეზონი დაიწყო, კოლინზი უფრო დამაჯერებლად გამოიყურება. ის კონკურენტზე უფრო მასიურიცაა.

მიკ მაკარტი: აგრესიული ფეხბურთელები მჭირდება

rte.ie-სთან საუბარში მიკ მაკარტიმ განაცხადა, რომ ძალიან კმაყოფილია ახალგაზრდა აარონ კონოლის თამაშით. "ის ძალიან აგრესიული ფეხბურთელია და მე ეს უზომოდ მომწონს. რა თქმა უნდა, სამუშაო ჯერ კიდევ ძალიან ბევრი აქვს, მაგრამ ეს ბიჭი ჩვენი ფეხბურთის მომაალია", - აღნიშნა მაკარტიმ.

ამასობაში ირლანდიურ მედიაში გამოქვეყნდა ნაკრების ვეტერანის, კევინ კილბეინის კომენტარი, რომელმაც თავის დროზე საქართველოს ნაკრებსაც გაუტანა. ის ეროვნული გუნდის სამწვრთნელო შტაბს მოუწოდებს, ბოლომდე დატვირთოს კონოლი, რადგან ის შესანიშნავ ფორმაშია.

ყოველდღიური სპორტული გაზეთი "ლელო"
1123
მკითხველის კომენტარები / 0 /
მსგავსი ამბები
რუბრიკის სხვა სიახლეები
;