[მეტოქე] პეტკოვიჩის შვეიცარია თითქმის განახევრდა. სენტ გალენში ანშლაგი იქნება

შვეიცარიის ნაკრების მწვრთნელმა ვლადიმირ პეტკოვიჩმა დაასახელა ის ფეხბურთელები, რომლებიც 15 ნოემბერს საქართველოსთან, ხოლო 19-ში გიბრალტართან დასკვნითი ევროშესარჩევი მატჩებისთვის მოემზადებიან:

მეკარეები - იან ზომერი (გლადბახი, გერმანია), იონას ომლინი (ბაზელი), ივონ მვოგო (ლაიპციგი, გერმანია);

მცველები - მანუელ აკანჯი (დორტმუნდი, გერმანია), ლორის ბენიტო (ბორდო, საფრანგეთი), ირაი კომერტი (ბაზელი), ნიკო ელვედი (გლადბახი, გერმანია), მიხაელ ლანგი (ვერდერი, გერმანია), შტეფან ლიხტშტაინერი (აუგსბურგი, გერმანია), კევინ მბაბუ (ვოლფსბურგი, გერმანია), ფრანსის მუბანჯე (დინამო ზ, ხორვატია), რიკარდო როდრიგესი (მილანი, იტალია);

ნახევარმცველები - კრისტიან ფასნახტი (იანგ ბოიზი), ედმილსონ ფერნანდესი (მაინცი, გერმანია), რემო ფროილერი (ატალანტა, იტალია), ჯიბრილ სოვი (აინტრახტი, გერმანია), რენატო შტეფენი (ვოლფსბურგი, გერმანია), რუბერნ ვარგასი (აუგსბურგი, გერმანია), გრანიტ ჯაკა (არსენალი, ინგლისი), დენის ზაკარია (გლადბახი, გერმანია);

თავდამსხმელები - იოსიპ დრმიჩი (ნორვიჩი, ინგლისი), ალბატ აიეტი (ვესტ ჰემი, ინგლისი), ჰარის სეფეროვიჩი (ბენფიკა, პორტუგალია).

სიის დასახელების შემდეგ პეტკოვიჩმა, ვისაც შვეიცარიული მედია და ქომაგები, დიდი ავტორიტეტის გამო, ერთხმად უწოდებენ "მისტერს", მიმდინარე სანაკრებო ამბებზე ილაპარაკა.

შვეიცარიას რამდენიმე, ძალიან მნიშვნელოვანი ფეხბურთელი აკლია. თამამად შეიძლება იმის თქმა, რომ საქართველოსთან მატჩში გუნდი პრაქტიკულად განახევრებული შემადგენლობით ითამაშებს. სხვადასხვა მიზეზების გამო პეტკოვიჩის ლაშქარს დააკლდებიან ფაბიან შერი, ბრაილ ემბოლო, სტივენ ცუბერი და, რაც მთავარია, გუნდის ლიდერი - ჯერდან შაჩირი, რაზედაც "ლელომ" უკვე მოგაწოდათ ინფორმაცია.

"მე ველაპარაკე შაჩირის. მას უნდა, რომ ბოლომდე ჩვენთან ერთად იყოს. ის მზად გახლდათ, რომ ჩამოსულიყო შეკრებაზე, მაგრამ ეს არის რისკი და ჩვენ არ ვაპირებთ გავრისკოთ. შაჩირი ჯერაც ვერ ვარჯიშობს "ლივერპულთან" ერთად და როცა ფეხბურთელი ბოლომდე არ არის მზად, რისკი უნდა გამორიცხო", - ამბობს პეტკოვიჩმა.

მან გრანიტ ჯაკას თაობაზეც ილაპარაკა. მოგეხსენებათ, შვეიცარიის ნაკრების ლიდერს რთული პერიოდი უდგას "არსენალში" და რეალურია, რომ ამ ზამთარს "მეთოფეები" დატოვოს კიდეც.

"ჩვენ მის გვერდით ვდგავართ და მან ეს ძალიან კარგად იცის. ჯაკას უნდა ჰქონდეს ჩვენი იმედი", - განაცხადა პეტკოვიჩმა და იქვე უახლოესი ორი მატჩის მნიშვნელობაზეც ილაპარაკა:

"ეს ორი მატჩი უმნიშვნელოვანესია. ჩვენი მიზანი ევროპის ჩემპიონატზე გასვლაა და საამისოდ გამარჯვებები გვჭირდება. მჯერა, შევძლებთ ქომაგის გახარებას".

შვეიცარიული მედიის ცნობით, საქართველოსთან მატჩზე დასასწრები ყველა ბილეთი უკვე გაიყიდა. ასე რომ, მასპინძლებს სენტ გალენის "კიბუნპარკზე" მხურვალე მხარდაჭერა გარანტირებული აქვთ.

401
მკითხველის კომენტარები / 0 /
მსგავსი ამბები
რუბრიკის სხვა სიახლეები
;