[მეტოქე] პეტკოვიჩი, როგორც ვაისი: უთამაშებლობა და ტრავმები

sport.ch აქვეყნებს ჩვენთვის მეტად საინტერესო წერილს, რომელიც შვეიცარიის ნაკრებს ეხება. საქართველოს ნაკრების მომავალ მეტოქესთან დაკავშირებით აქ ბევრი რამ შეიძლება გაიგოთ და ის უდავოდ საინტერესო იქნება ჩვენი მკითხველისთვის. თქვენ ნახავთ, რომ შვეიცარიის ნაკრებსაც აწუხებს ისეთივე პრობლემები, როგორიც საქართველოს ეროვნულ გუნდს, თუმცა ჩვენს შემთხვევაში ეს პრობლემები გაცილებით მძიმეა...

"შვეიცარიის ნაკრების მთავარი მწვრთნელის, ვლადიმირ პეტკოვიჩის წინაშე კონკრეტული და, ერთი შეხედვით, არცთუ ძნელი ამოცანა დგას. საქართველოსა და გიბრალტარის ნაკრებებთან გამარჯვებით მას შეუძლია, ევროპის ჩემპიონატის ფინალური ეტაპის საგზური მოიპოვოს და ნაკრებში მუშაობაც გააგრძელოს.

ეგ არის, რომ ამ დროისთვის შვეიცარიის ნაკრების რამდენიმე ფეხბურთელს ძალიან უჭირს თავის კლუბში და ვეჭვობთ, ეს უსათუოდ აისახება ეროვნული გუნდის თამაშზე...

რიკარდო როდრიგესი

შვეიცარიის ნაკრების ერთ-ერთი ყველაზე ვარსკვლავური ფეხბურთელი. "ვოლფსბურგში" გატარებული ნაყოფიერი პერიოდის შემდეგ რიკარდო როდრიგესი "მილანში" გადავიდა, თუმცა კარგად დაწყებული საქმე ასევე ვეღარ გააგრძელა. მიმდინარე სეზონში ვერ უძლებს კონკურენციას ტეო ერნანდესთან. სპალ-თან მოგებულ ბოლოსწინა შეხვედრაში ერნანდესი კვლავ საუკეთესო იყო დაცვის მარცხენა ფლანგზე.

როდრიგესმა სწრაფად უნდა მოძებნოს ახალი კლუბი. წინააღმდეგ შემთხვევაში, მას ძალიან გაუჭირდება "როსონერის" ძირითად შემადგენლობაში დაბრუნება. მეტიც, ამ ეტაპზე ეს წარმოუდგენლად მოსჩანს.

კევინ მბაბუ

ამ მცველმა ძალიან სწრაფი პროგრესი განიცადა. "იანგ ბოიზთან" ერთად ქვეყნის ჩემპიონი იყო და გუნდის ერთ-ერთი ლიდერიც გახლდათ. "ვოლფსბურგში" მისი გადასვლის შემდეგ კი რეგრესი ცხადად ჩანს. კევინ მბაბუ სულ რამდენჯერმე გამოჩნდა "მგლების" ძირითად შემადგენლობაში და ვეღარც ძველებური დამაჯერებლობით თამაშობს.

მბაბუს პრობლემა ის არის, რომ "ვოლფსბურგის" შემადგენლობაში შესანიშნავად თამაშობს ბრაზილიელი მცველი ილიამი. ეს შვეიცარიელის შანსებს მნიშვნელოვნად ამცირებს.

გრანიტ ჯაკა

შვეიცარიის ნაკრების გამოკვეთილ ლიდერს კლუბში სათამაშო პრაქტიკა არ აკლია, მაგრამ სასიამოვნო დღეები ნამდვილად არ უდგას. უკვე ბევრი დაიწერა იმ სკანდალზე, რომელიც გრანიტ ჯაკას "არსენალის" ქომაგებთან მოუვიდა მას შემდეგ, რაც "კრისტალ პალასთან" მატჩის დროს შეცვალეს.

კლუბის გულშემატკივართა უმრავლესობა გუნდიდან მის გაშვებას, ან უკიდურეს შემთხვევაში ბოდიშის მოხდას ითხოვს. ასეთ ვითარებაში კი ძალიან რთულია, გახვიდე მინდორზე და შენი შესაძლებლობები ბოლომდე გამოავლინო.

ჯერდან შაჩირი

ნაკრებიდან თითქოს წავიდა, მაგრამ მერე დაბრუნების გადაწყვეტილება მიიღო. ამ დროისთვის მისი მდგომარეობა იოლი არ არის. ჯერდან შაჩირი სექტემბრის ბოლოდან ებრძვის ტრავმას. წესით, საქართველოსა და გიბრალტართან ვერ უნდა ითამაშოს.

და მაინც, იმედი არის. შაჩირის აქვს უდიდესი გამოცდილება. ის დიდ გუნდში თამაშობს და ტიტულების მოგებაც არ ესწავლება.

სტივენ ცუბერი

რაც სეზონი დაიწყო, მას ძალიან უჭირს. თითქოს, კარიერული წინსვლა უნდა ჰქონდა მას შემდეგ, რაც "ჰოფენჰაიმიდან" "შტუტგარტში" გაანათხოვრეს, მაგრამ ტრავმები არა და არ ასვენებს. სექტემბერში სტივენ ცუბერს ფეხზე ოპერაცია გაუკეთეს.

მან უკვე დაიწყო ვარჯიში, მაგრამ უცნობია, როდის დაუბრუნდება მოედანს. დიდი ალბათობით, ვლადიმირ პეტკოვიჩი ვერ გარისკავს ნაკრებში მის გამოძახებას.

იოსიპ დრმიჩი

იყო დრო, შვეიცარიელი ბუნდესლიგაში ბრწყინავდა. 2013-14 წლების სეზონში 17 გოლი შეაგდო და "ნიურნბერგის" საუკეთესო ბომბარდირი გახდა, მერე ითამაშა "ლევერკუზენში", "გლადბახში"... ახლა "ნორვიჩშია" და ძირითადად შეცვლებზე შედის. გუნდის ძირითადი ფორვარდი ფინელი ტეემუ კუკია.

თანაც, დრმიჩის გუნდი ცუდად თამაშობს პრემიერლიგაში - ესეც კიდევ ერთი მიზეზი იმისთვის, რომ კარგ ხასიათზე ვერ იყოს საქართველოს ნაკრებთან მოახლოვებული მატჩის წინ.

376
მკითხველის კომენტარები / 0 /
მსგავსი ამბები
რუბრიკის სხვა სიახლეები
;