მეტოქე. ყაზახები სუსტ წერტილებს ეძებენ

ყაზახური მედია ბევრს წერს ერთა ლიგის კარსმომდგარი გათამაშების შესახებ. რა გასაკვირია, რომ მათი ნააზრევი ჩვენს მკითხველსაც აინტერესებდეს.

კერძოდ, ყაზახები მიიჩნევენ, რომ მათ გარკვეული პრობლემები აქვთ დაცვის მარჯვენა ფლანგზე და თავდასხმაში. ამასთან დაკავშირებით, ყაზახთა ბულგარელმა დამრიგებელმა სტანიმირ სტოილოვმა შემდეგი თქვა:

"რაც შეეხება პრობლემურ პოზიციებს ყაზახეთის ნაკრებში, არ შეიძლება ითქვას, რომ ეს არის ერთი ან ორი პოზიცია. უნგრეთსა და ბულგარეთთან შეხვედრებში მარჯვენა მცველის ადგილზე ბაისებეკოვს ცუდად არ უთამაშია.

ეს არის ფეხბურთელი, რომელსაც აქვს ევროთასებზე ასპარეზობის გამოცდილება. არიან სხვებიც, რომლებიც, შეიძლება, ამ პოზიციაზე განვიხილოთ - ლუნინი, ახმეტოვი, მიროშნიჩენკო, ესიმოვი... რაც შეეხება თავდამსხმელს, მთელი მსოფლიო ეძებს დღეს ძლიერ ფორვარდს.

ჩვენს ნაკრებს ბევრი პრობლემა აქვს. დღეს და ხვალ მათი ერთიანად გადაწყვეტა შეუძლებელია. ძალიან მნიშვნელოვანი იქნება ის, თუ როგორ წარმოაჩენენ თავს ფეხბურთელები ევროთასებზე" , - თქვა სტანიმირ სტოილოვმა.

ყაზახთა დამრიგებელი ერთ-ერთ ადგილობრივ ტელეარხს ეწვია და ჩვენთვის საინტერესო საკითხებზეც ილაპარაკა:

"კარგად ვიცნობ აქაური ფეხბურთელების შესაძლებლობებს, მათ ძლიერ და სუსტ მხარეებს... ვიცი, რომ ის ადგილი რეიტინგში, რომელიც დღეს უჭირავს ყაზახეთის ნაკრებს, არ შეესაბამება მის რეალურ ძალას...

როცა მილოცავდნენ "ასტანას" წარმატებულ თამაშს, იქვე მეკითხებოდნენ - რას ვფიქრობდი ნაკრების თაობაზე? ფული? ვერ ვიტყვი, რომ ცუდად მიხდიან. ბევრგან მიმუშავია და მითამაშია. მთავარი ისაა, ხალხს სიხარული მოუტანო... კაპიტანი ლიდერის თვისებებით უნდა იყოს დაჯილდოებული.

ჩვენ აღარ გვყავს სამატ სმაკოვის დარი ფეხბურთელი, რომელმაც ძალიან ბევრი მატჩი ჩაატარა ეროვნულ გუნდში. შეიძლება, მუჟიკოვიც იყოს კაპიტანი... თუ ვიპოვით ყაზახური ფესვების მქონე ფეხბურთელებს, რომლებიც არიან რუსეთის ჩემპიონატის ან ბუნდესლიგის დონის, დიდად მოხარული ვიქნები...

ფეხბურთელი ცოტაა, მეტი კონკურენციაა საჭირო. რაც შეეხება მიზნებს, ვთქვი, რომ მემკვიდრეს დავუტოვებ გუნდს, რომელიც რამდენიმე წლის განმავლობაში ითამაშებს მაღალ დონეზე", - ბრძანა ყაზახთა დამრიგებელმა.

ქართველები ყაზახეთში

კვეკვესკირი და კანკავა ევროპალიგაზე, მაგრამ ჯიღაური...

ფინანსური დარღვევების გამო უეფამ ყაზახური "ორდაბასი" ევროპალიგიდან მოკვეთა. ამ გუნდს კონტინენტის რანგით მეორე საკლუბო ტურნირზე "ტობოლი" ჩაანაცვლებს, რაც იმას ნიშნავს, რომ მომავალ სეზონში ევროპალიგაში ორ ჩვენებურს, ჯაბა კანკავას და ნიკა კვეკვესკირს ვიხილავთ.

ოღონდ, ამ ამბავში ცუდი ის არის, რომ "ორდაბასისაც" ჰყავს საქართველოს ნაკრების ფეხბურთელი. როგორც იცით, ამ გუნდის ღირსებას ჯაბა ჯიღაური იცავს.

ყოველდღიური სპორტული გაზეთი "ლელო"
1209
მკითხველის კომენტარები / 0 /
მსგავსი ამბები
რუბრიკის სხვა სიახლეები
;