მეტოქის ბანაკში. მიქსუ კრიტიკულია: არ შეიძლება ხარისხში ამხელა სხვაობა

აზერბაიჯანის ნაკრებმა რიგაში ამხანაგური მატჩი მოუგო (3:1) ერთა ლიგაში საქართველოს ნაკრების მეტოქე ლატვიას.

ჩვენი მეზობლები მთელი შეხვედრის განმავლობაში ბევრად უკეთ გამოიყურებოდნენ და ეს მედვედევის, იმამვერდიევისა და მახმუდოვის გოლებში აისახა. ლატვიელებმა კი ერთადერთი გოლი მაშინღა შეაგდეს, როცა მსაჯის საფინალო სასტვენამდე წამები რჩებოდა - ულდრიკისის დარტყმამ ბალტიისპირელებს მხოლოდ ნამუსი მოწმინდა.

ლატვია: ნერუგალი, დუბრა, ტარასოვი, გაბოვი, ვ. იკანუნიეკსი, ფერტოვი (75. ხმიზი), ტორესი (46. კამასი), ი. იკანუნიეკსი, რუგინი (46. კლუსკინი/89. სავალნიეკსი), კარასაუსკასი (69. ვიშნიაკოვი), შაბალა (69. ულდრიკისი).

"ჩვენ წარმატებით ვითამაშეთ ლიტვასა და ესტონეთთან. ამდენად, იმედი გვქონდა, რომ შეკრებას დადებითი შედეგით დავასრულებდით. მიგვაჩნდა, რომ ბოლომდე შევძლებდით ბრძოლას აზერბაიჯანის ნაკრებთან, მაგრამ... ამ შემთხვევაში ეს არ გამოვიდა. ჩვენ გავარჩიეთ მეტოქის თამაში და ძალიან კარგად ვიცოდით, რომ მათ შემადგენლობაში არიან საშიში ფეხბურთელები. არ ვიცი, რამ გამოიწვია ეს ჩავარდნა, მაგრამ ჩვენი შესაძლებლობების ნახევარიც ვერ ვაჩვენეთ.

მეტოქე უკეთესი იყო ფსიქოლოგიური და ფიზიკური თვალსაზრისით, ჩვენზე ხშირად იგებდა ორთაბრძოლებს, ჩვენს შემტევებს კი არ ჰქონიათ ბევრი შანსი.

პირველ რიგში, ფსიქოლოგიურად გაგვიჭირდა. ერთა ლიგაში გაცილებით უკეთესი თამაში გვმართებს. ასე ვერაფერს მივაღწევთ. არადა, ჩვენი მიზანია, ლატვიელი გულშემატკივრები გავახაროთ.

დადასტურდა, რომ თამაში შეგვიძლია. უბრალოდ, მაქსიმალურად უნდა გამოვრიცხოთ არასტაბილურობა. არ შეიძლება, ორ-სამ თამაშს შორის ხარისხში ამხელა სხვაობა იყოს.

ლატვიას ჰყავს კონკურენტუნარიანი შემადგენლობა და შეგვიძლია, მაღალი მიზნები დავისახოთ ერთა ლიგაში. ეს შანსია ჩვენი გუნდისთვის და ამ შანსს გამოყენება სჭირდება.

ვმუშაობთ იმაზე, რომ რაც შეიძლება ბევრი ახალგაზრდა მოთამაშე დაწინაურდეს და შეაღოს დიდი ფეხბურთის კარი. სასიამოვნოა ამ ბიჭებთან მუშაობა. მათ იციან, როგორ უნდა მიაღწიონ პროგრესს. ერთი ჩავარდნა არაფერია. მთავარია, მას კიდევ არ მოჰყვეს ჩავარდნები", - თქვა ლატვიელთა ფინელმა თავკაცმა მიქსუ პაატელაინენმა.

ყოველდღიური სპორტული გაზეთი "ლელო"
1386
მკითხველის კომენტარები / 0 /
მსგავსი ამბები
რუბრიკის სხვა სიახლეები
;