მეფე ტახტს არ თმობს - ზიდანის ზედიზედ მესამე და ფიესტა მადრიდში [VIDEO]

მადრიდის "რეალი" ზედიზედ მესამედ გახდა ევროპის საუკეთესო კლუბი და ეს მას შემდეგ, რაც ჩემპიონთა ლიგის ფინალში დამაჯერებლად დაამარცხა "ლივერპული".

შეიძლება, მოგწონდეს ან არ მოგწონდეს "სამეფო კლუბის" თამაში, მაგრამ უნდა აღიარო, რომ ჩემპიონთა ლიგას ღირსეული გამარჯვებული ჰყავს...

თამაში ისე დაიწყო, ბევრი რომ ვერც წარმოიდგენდა. საწყის მონაკვეთში ინგლისელები უფრო მწვავედ უტევდნენ მოწინააღმდეგის კარს და მართალია, ასპროცენტიან საგოლე მომენტამდე საქმე არ მისულა, მაგრამ ესპანური გრანდის მცველებმა ძალიან კი ინერვიულეს.

თამაშის სურათი შეიცვალა ნახევარი საათის თავზე. მოჰამედ სალაჰისთვის საბედისწერო აღმოჩნდა სერხიო რამოსთან კონტაქტი. ამ ეპიზოდს მსოფლიო საფეხბურთო სამყაროში დიდი სჯა-ბაასი მოჰყვა და ამაზე სიტყვას აღარ გავაგრძელებთ და ბევრი ერთმნიშვნელოვნად მადრიდელს ადანაშაულებს (კარგად ჩანს ფოტოზე) იმაში, რომ მსოფლიოს ერთ-ერთმა საუკეთესო მეგოლემ, მხრის ტრავმის გამო, შეიძლება, მუნდიალი გამოტოვოს და ეს ძალიან ცუდი იქნება იმ დიდი საფეხბურთო ფორუმისთვის, რომელსაც ასე მოუთმენლად ველით...

ასე იყო თუ ისე, ფაქტია - "ლივერპულის" შეტევებს ძალიან მოაკლდა მარილი მას შემდეგ, რაც ეგვიპტელმა ვარსკვლავმა თვალცრემლიანმა დატოვა მინდორი. "რეალის" უკანა ხაზმა აშკარად ამოისუნთქა და ზინედინ ზიდანის გუნდი უფრო თამამად წავიდა შეტევაში.

თამაშიდან სალაჰის გასვლის შემდეგ სადიო მანესა და რობერტო ფირმინოს შორის კავშირიც მოიშალა, რადგან ეგვიპტელის ნაცვლად შესული ადამ ლალანა (ხანგრძლივი ტრავმის შემდეგ ვერა და ვერ აღიდგინა ფორმა) ვერ აღმოჩნდა ის რგოლი, რომელიც ამ კავშირს უზრუნველყოფდა.

...პირველ ტაიმში ასევე ვნახეთ ქარიმ ბენზემას მირ გატანილი და გაუქმებული გოლი. მთავარი მოვლენები კი მეორე ტაიმში განვითარდა. "რეალმა" ანგარიში გახსნა კურიოზული გოლით, რომლის დარიც, ალბათ, ჩემპიონთა ლიგის ფინალურ შეხვედრებში არც არასოდეს გასულა.

ინგლისური კლუბის გერმანელი მეკარე ლორის კარიუსი უპატიებლად შეცდა. ის თანაგუნდელს ხელით აწვდიდა პასს, რომელიც ბენზემამ ჩაჭრა და მშვიდად შეაგორა ბურთი კარში. თამამად შეიძლება ითქვას, რომ კარიუსმა "რეალს" გოლი "აჩუქა".

"ლივერპულმა" ყურები არ ჩამოყარა და მალევე აღადგინა წონასწორობა. ჯეიმს მილნერის კუთხურის შემდეგ დეიან ლოვრენმა თავით გააგრძელა შეტევა და კარის წინ ჩასაფრებულმა მანემ შანსი ხელიდან არ გაუშვა - 1:1.

მერე დაიწყო გარეთ ბეილის შოუ, რომლის შინაარსის გადმოცემაც შეუძლებელია. ეს იყო საფეხბურთო ოსტატობის აპოთეოზი. მსგავსი სილამაზის გოლი ფეხბურთის ისტორიაში ბევრი ნამდვილად არ არის. ბეილის "მაკრატელა" იყო ის, რამაც კიდევ უფრო გაალამაზა ისედაც დაუვიწყარი საღამო.

შევაქოთ ზიდანიც, რომელმაც ზუსტად შეაფასა ის მომენტი, როცა შეტევა უნდა გაეძლიერებინა. ჩანდა, რომ "ლივერპულს" რეზერვი აღარ ჰქონდა. საერთოდაც, იურგენ კლოპის გუნდი მთელი სეზონის განმავლობაში სწორედაც შეზღუდული რეზერვით თამაშობდა.

მერსისაიდელთა შემადგენლობას აშკარად აკლდა ის სიღრმე და კლასი (მეტადრე დაცვასა და მეკარეს), რაც ასეთი ტიპის მატჩების მოსაგებადაა აუცილებელი და ცხადია, კლოპი მომავლისთვის ამას გაითვალისწინებს. მაგრამ მეორეცაა - არავინ იცის, როგორი ფინალი ექნებოდა თამაშს, სალაჰი მოედანზე რომ დარჩენილიყო...

ბეილის დუბლი კი კარიუსის სინდისზეა. გერმანელმა მეკარემ, ალბათ, დღესაც არ იცის, როგორ გაუშვა ბურთი უელსელის 40-მეტრიანი დარტყმის შემდეგ, რომლის აღებაც (თუნდაც მოგერიება), წესით, არ უნდა გასჭირვებოდა.

საბოლოოდ, "რეალი" დამსახურებულად გამეფდა ზედიზედ მესამედ, ხოლო "ლივერპულისთვის" ფინალში გასვლაც, ასე თუ ისე, წარმატებად უნდა ჩაითვალოს. ცალკეულ რგოლებს თუ გააძლიერებს, კლოპი გუნდს კიდევ უფრო შორს წაიყვანს...

ფაქტები

* "ბაიერნის" შემდეგ (1974-76) "რეალი" გახდა პირველი გუნდი, რომელმაც ზედიზედ მესამედ მოიგო ჩემპიონთა თასი/ლიგა.

* ინგლისურმა კლუბებმა ესპანელებთან ბოლო 7 ევროფინალი წააგეს: 4 - ჩემპიონთა ლიგაში, 3 - უეფას თასზე/ევროპალიგაში.

* ზინედინ ზიდანი პირველი მწვრთნელია ბობ პეისლისა და კარლო ანჩელოტის შემდეგ, რომელმაც სამჯერ მოიგო ჩემპიონთა თასის/ლიგის ფინალი, ხოლო პირველი მწვრთნელია, ვინც ეს ზედიზედ 3-ჯერ მოახერხა.

* იურგენ კლოპმა, როგორც მწვრთნელმა, ბოლო 7 ფინალიდან 6 წააგო. ერთადერთი გამარჯვება მან 2012 წელს, გერმანიის თასის ფინალში მოიპოვა.

* გუშინწინდელ ფინალში "რეალის" სასტარტო შემადგენლობა ანალოგიური იყო ერთი წლის წინანდელი ფინალისა (2016/17, "იუვენტუსთან"), რაც პირველი შემთხვევაა ჩემპიონთა თასის/ლიგის ისტორიაში.

* გარეთ ბეილმა გოლი გაიტანა მოედანზე შესვლიდან 2 წუთსა და 2 წამში. ეს არის მეორე უსწრაფესი გოლი ჩემპიონთა თასის/ლიგის ფინალების ისტორიაში - შეცვლაზე შესული ფეხბურთელისთვის, ლარს რიკენის ("დორტმუნდი"-"იუვენტუსი", 1997) შემდეგ.

* ბობი ჩალტონის შემდეგ (1968, "მანჩესტერ იუნაიტედი") გარეთ ბეილი მეორე ბრიტანელი ფეხბურთელია, ვინც ჩემპიონთა თასის/ლიგის ფინალში დუბლი შეასრულა.

* ქარიმ ბენზემამ, დიდიე დროგბასთან ("ჩელსი") ერთად, "ლივერპულს" ჩემპიონთა ლიგაში ყველაზე მეტი, 4 გოლი გაუტანა.

* "ლივერპული" გახდა პირველი გუნდი ჩემპიონთა თასის/ლიგის ისტორიაში, რომლის სამმა ფეხბურთელმა (მოჰამედ სალაჰი, სადიო მანე, რობერტო ფირმინო) ერთ ტურნირში 10-10 (და მეტი) გოლი გაიტანა.

* რაბაჰ მაჯერის (ალჟირი, "პორტუ", 1987), სამუელ ეტო"ოსა (კამერუნი, "ბარსელონა", 2006 და 2009) და დიდიე დროგბას (კოტ დ"ივუარი, "ჩელსი", 2012) შემდეგ სადიო მანე მეოთხე აფრიკელი ფეხბურთელია, ვინც ჩემპიონთა თასის/ლიგის ფინალში გოლი გაიტანა.

მატჩის შემდეგ

ზინედინ ზიდანი: "რთულია, აღწერო ის, რაც დღეს მოხდა. ჩვენი გუნდის ფეხბურთელები მხოლოდ საუკეთესოს იმსახურებენ. ჩვენ ძალიან ბევრი ვიშრომეთ და ეს მიღწევა შემთხვევით არ მოსულა... რაც შეეხება გარეთ ბეილს, ის დიდი ფეხბურთელია. შეცვლაზე შევიდა და გააკეთა ის, რაც უნდა გაეკეთებინა. რაც შეეხება კრიშტიანო რონალდოს შესაძლო წასვლას. შეიძლება, ახლა არ არის ამის გარკვევის დრო, მაგრამ ვფიქრობ, მას არ უნდა "რეალიდან" წასვლა".

იურგენ კლოპი: "დღეს ჩვენ არ გაგვიმართლა. მიმაჩნია, რომ ორი გადამწყვეტი ფაქტორი იყო - პირველი, ესაა მოჰამედ სალაჰის ტრავმა, მეორე კი გარეთ ბეილის გამოსვლა.

ბეილმა, უბრალოდ, დიდებულად ითამაშა. რაც შეეხება კარიუსს, ყველამ ვიცით, რომ შეცდომა დაუშვა და ამ შეფასებებში ვერც მე ვიქნები ორიგინალური. მაგრამ არ მინდა, რომ ვინმე ისეთ მდგომარეობაში მყოფი ვნახო, როგორშიც ახლა კარიუსია. უნდა გავაგრძელოთ მუშაობა სრულყოფისთვის. ეს არის ჩვენი დასკვნა ფინალის შემდეგ".

გარეთ ბეილი: "ვგრძნობდი, რომ შემეძლო სასტარტო შემადგენლობაში მეთამაშა და გუნდისთვის სარგებელი მომეტანა... შევედი მინდორზე და ყველაფერი გავაკეთე გუნდის წარმატებისთვის. თამამად შემიძლია ვთქვა, რომ ეს გოლი საუკეთესო იყო ჩემს კარიერაში. ჩვენ ძალიან კარგად ვითამაშეთ და გამარჯვება დავიმსახურეთ".

კრიშტიანო რონალდო: "დღეს შესანიშნავი დღეა. ჩვენმა დიდმა შრომამ შედეგი გამოიღო. უახლოესი ორი დღის განმავლობაში საბოლოო პასუხს ვეტყვი ჩემს გულშემატკივრებს იმასთან დაკავშირებით, თუ როგორი იქნება ჩემი მომავალი. დღეს მთავარი "რეალის" მოგებაა და არა ის, თუ როგორი იქნება ჩემი მომავალი. ყველამ ვიცით, ვინ არის ჩემპიონთა ლიგის ბომბარდირი, ვინ მოიგო ყველაზე მეტი ტიტული და ვინ შეაგდო ყველაზე მეტი გოლი".

სერხიო რამოსი: "ფეხბურთი ისეთი სპორტია, რომელსაც თან სდევს იმედგაცრუებები და სიხარული. მინდა, მალე გამოჯანმრთელება ვუსურვო სალაჰს. მას დიდი მომავალი აქვს".

მატჩის გმირი

აპელირება იმაზე, რომ გარეთ ბეილის მეორე გოლზე "ლივერპულის" მეკარემ უპატიებელი შეცდომა დაუშვა, რომ მაინცდამაინც ეს იყო "წითლების" მარცხის მთავარი მიზეზი, უსამართლობა იქნებოდა, რადგან უელსელის პირველ გოლს მოჰყვა სწორედ გარდამტეხი მომენტი და ეს გოლი იმ დონის შედევრი იყო, ბარე სამს ერთად გადაწონიდა...

ბეილი არ იყო "რეალის" მთავარი ფიგურა ამ სეზონში, ის ხშირად ძირითადი შემადგენლობის მიღმაც რჩებოდა და არ არის გასაკვირი, რომ გუნდიდან მის წასვლაზე ბოლო დროს ბევრს ლაპარაკობდნენ, თითქოსდა, ის ზიდანს აღარ სჭირდებოდა...

ვერ გეტყვით, შეიცვალა თუ არა ზიდანის დამოკიდებულება მის მიმართ, მაგრამ ფაქტია - ამ ერთმა ფინალმა ძალიან ასწია ბეილის ფასი და თუ მაინც წავა "რეალიდან", უკვე შეუძლია, ეს თავაწეულმა გააკეთოს...

ყოველდღიური სპორტული გაზეთი "ლელო"
1083
მკითხველის კომენტარები / 0 /
მსგავსი ამბები
რუბრიკის სხვა სიახლეები
;