მე-20 გამარჯვება რეკორდული 20 ქულით

რუსეთი-საქართველო 9:29

რუსეთი: (15-9) გაისინი, ბაბაევი, ტრიშინი (ბუდიჩენკო 75), გერასიმოვი, ნეპეივოდა (მიხალცოვი 72), კუშნარიოვი, დოროფეევი (შჩერბანი 64); (1-8) სეკისოვი (პოლივალოვი 59), სელსკი (ჰასანოვი 64), პრონენკო (დავუდოვი 75), გარბუზოვი, ელგინი, გრესევი, ჰაჯიევი, (სიჩოვი 53), რუდოი (ილინი 69)
3ს: კუშნარიოვი

საქართველო: (15-9) კვირიკაშვილი, სიჭინავა (აფრასიძე 79), კაჭარავა, კვესელაძე (მალაღურაძე 72), მათიაშვილი (კოშაძე 75), ხმალაძე, ლობჟანიძე; (1-8) ნარიაშვილი (ასიეშვილი 59), მამუკაშვილი (ალხაზაშვილი 69), ფეიქრიშვილი (მელიქიძე 50), ნემსაძე,^ ჭეიშვილი (სუთიაშვილი 62), თხილაიშვილი, კოლელიშვილი, ლომიძე (გაჩეჩილაძე 56)

4ლ: ფეიქრიშვილი, ასიეშვილი, გაჩეჩილაძე, კვირიკაშვილი. 3გ, ს: მათიაშვილი
მსაჯი: ბრაიან ვუდსორპი (ინგლისი)

პირველი ტაიმი აშკარად ჩაგვივარდა. ძნელი სათქმელია, რას შეიძლება ეს დავაბრალოთ - მეტოქის დაუფასებლობას? გამარჯვების იოლად მოპოვების იმედს? ფაქტია, "ბორჯღალოსნებს" რუსებთან მატჩში, რომელიც კრასნოდარში გაიმართა, პირველ ტაიმში არაფერი გამოსდიოდათ.

ბურთის წინ ვარდნა, რაკის გვიან გაწმენდა, რამდენჯერმე დერეფანში არადამაჯერებელი თამაში. თქვენ წარმოიდგინეთ და, რუსები შერკინებაშიც კი დაგვიდგნენ. თითქმის ვერც ერთ კომპონენტში უპირატესობას ვერ მივაღწიეთ. გუნდი ერთბაშად მოშვებული, უმოტივაციო ჩანდა.

პირველ ტაიმში ერთადერთი ლელო 26-ე წუთზე გავიტანეთ. იქამდე მონაგარში არაფერი გვქონდა. ლელო კი, დერეფნიდან აგორებულ მოლს მოჰყვა.

ყველაფერი მარტივად და ჩვეულ სტილში მოხდა - დერეფანი სუფთად მოვიგეთ, მოლი შევკარით, მივაწექით და ანტონ ფეიქრიშვილმა ბურთი ლელოში დაამიწა. გარდასახვა, ამჯერად გარემარბად მოთამაშე სოსო მათიაშვილმა გაიტანა და ანგარიში 7:3 გახდა.

რუსთა მგეზავმა იური კუშნარიოვმა ტაიმის ბოლომდე კიდევ ორჯერ დაარტყა საჯარიმო ზუსტად და მატჩის პირველი ნახევარი რუსებმა 9:7 მოიგეს.

შესვენების შემდეგ მოედანზე ვითარება რადიკალურად შეიცვალა. საქართველოს ნაკრები მაქსიმალურად მობილიზებული, მოტივირებული და ოდნავ გაბრაზებულიც კი ჩანდა.

მეტოქეს მონაგრის გაზრდის მიზერული შანსიც არ მისცემია. ჩვეულად მძლავრად ამუშავდნენ მორკინალები, დალაგდა დერეფანში თამაში, რაც უფრო დრო გადიოდა, მით უფრო ვჩაგრავდით მეტოქეს შერკინებაში. თითქმის ყველა დანიშნული შერკინება რუსების დაჯარიმებით მთავრდებოდა.

საქართველოს ნაკრები ანგარიშში 49-ე წუთზე დაწინაურდა. მათიაშვილმა ხელსაყრელი პოზიციიდან გაიტანა საჯარიმო - 10:9. მომდევნო 16 წუთის განმავლობაში რუსები ბოლო ძალებით გვიწევდნენ წინააღმდეგობასა და საკუთარ ჩათვლის მოედანს კბილებით იცავდნენ. თუმცა, დასკვნით 15 წუთში "ბორჯღალოსნებმა" მაინც იმძლავრეს.

თავდაპირველად თავი შეცვლაზე შესულმა მორკინალებმა გამოიჩინეს. 68-ე წუთზე ჩვენმა მორაგბეებმა მორიგი დერეფანი მოიგეს, მოლი ააგორეს და ჩათვლის მოედანში შეაღწიეს. ბოლოს ბურთით ხელში შერკინების ბურჯი კარლენ ასიეშვილი იყო, მათიაშვილმა ზუსტად გარდასახა - 17:9.

ექვს წუთში, თითქმის იგივე კომბინაცია გათამაშდა. იმ განსხვავებით, რომ მოლი ბოლო ფაზაში დაიშალა, თუმცა მესამეხაზელმა მიხეილ გაჩეჩილაძემ ვითარება ზუსტად შეაფასა და ბურთით ხელში ლელოსკენ სვლა განაგრძო. მისი შეჩერება რუსებმა ვერ მოახერხეს. მათიაშვილმა ესეც გარდასახა - 24:9.

თამაშის დასრულებას სამი წუთი აკლდა. "ბორჯღალოსნები" 22-მეტრიანი ზონის ხაზთან უტევდნენ, ვასილ ლობჟანიძემ ბურთი ფეხით მარჯვენა ფრთაზე ლელოსკენ შეაცურა.

იქ ყველას გარემარბმა ანზორ სიჭინავამ დაასწრო, თუმცა დამიწება ვერ მოახერხა, ბურთი უკან გაუვარდა, რომელთანაც უმალ მერაბ კვირიკაშვილი გაჩნდა. გარდასახვა მანვე დაარტყა, მაგრამ ვერ გაიტანა - 29:9.

ამდენად, საქართველოს ნაკრებმა რუსეთის ეროვნული გუნდი სტუმრად აქამდე რეკორდული, 20 ქულის სხვაობით დაამარცხა.

მატჩის შემდეგ

მილტონ ჰეიგი, საქართველოს ნაკრების მწვრთნელი:
"პირველ ტაიმში ცუდი ამინდი იყო და, თანაც, მეტოქემ ღირსეული წინააღმდეგობა გაგვიწია. ამიტომ მძიმე თამაში გამოვიდა. შესვენებაზე მოთამაშეებს დავალებები მივეცი, თუ რა უნდა გაეკეთებინათ.

მათ ბრწყინვალედ გაართვეს ამოცანას თავი. წინა შეხვედრასთან შედარებით, რუსეთის ნაკრებმა უკეთ იასპარეზა, გამოასწორა ზოგიერთი კომპონენტი. ჩვენ ის მატჩი გავაანალიზეთ, კრასნოდარში თამაშის კონკრეტული გეგმით ჩამოვედით, რაც შევასრულეთ კიდეც".

მარკ მაკდერმოტი, რუსეთის ნაკრების მწვრთნელი:
"ქართველებმა შესანიშნავი მატჩი ჩაატარეს. 65 წუთის განმავლობაში ღირსეული წინააღმდეგობა გავუწიეთ, მაგრამ ბოლოს ჩვენზე ძალზე ძლიერი ზეწოლა განახორციელეს და უბრალოდ წაგვლეკეს.

უკანასკნელი ორი კვირა თავდაუზოგავად ვივარჯიშეთ. შეგირდების გარჯით კმაყოფილი ვარ. ჩვენი მთავარი პრობლემა ბურთის ფლობაა. ეს პრობლემა მოწინააღმდეგემ მეორე ტაიმში გადაწყვიტა, ჩვენ კი - ვერა.

მხოლოდ ორი კვირაა, რაც გუნდს ვუდგავარ სათავეში, მაგრამ ბიჭებს უკვე რაღაც-რაღაცები გამოსდით - საქმისადმი მიდგომა და გუნდური ურთიერთგაგება.

საქართველოს ნაკრებთან ყოველი დაპირისპირება დიდი მოვლენაა. ჩემთვის, როგორც ირლანდიელისთვის, ასეთივე მოვლენა ინგლისთან შეხვედრაა. მინდოდა მორაგბეებისთვის ამეხსნა, რომ ზეწოლაზე არ ეფიქრათ და თავიანთი სიამოვნებისთვის ეთამაშათ".

IV ტური

რუმინეთი-ბელგია 62:12
ესპანეთი-გერმანია 84:10

თ მ ფ წ ბ ქ(პ)
1. საქართველო 4 4 0 0 +144 19(3)
2. რუმინეთი 4 3 0 1 +127 14(2)
3. ესპანეთი 4 3 0 1 +80 13(1)
4. რუსეთი 4 1 0 3 +4 6(2)
5. ბელგია 4 1 0 3 -84 5(1)
6. გერმანია 4 0 0 4 -271 0(0)

V ტური

18 მარტი
საქართველო-რუმინეთი
ბელგია-ესპანეთი
გერმანია-რუსეთი

ყოველდღიური სპორტული გაზეთი "ლელო"
1311
მკითხველის კომენტარები / 0 /
მსგავსი ამბები
რუბრიკის სხვა სიახლეები
;