LoveStory. მასიმილიანო ალეგრი - დიდი მექალთანე! ქორწილისთვის ყველაფერი შეკვეთილი იყო, როცა...

“არ მესმის, რატომ ენატრებათ გულშემატკივრებს ანტონიო კონტე. რატომ ხდება ეს, ძალიან რთული ასახსნელია”, - განაცხადა “იუვენტუსის” მთავარმა მწვრთნელმა, მასიმილიანო ალეგრიმ 2017 წელს. იმ დროს “ბებერი ქალბატონი” სრული სვლით მიდიოდა ზედიზედ მე-6 სკუდეტოსკენ და ჩემპიონთა ლიგის მეორე ფინალამდე. “ზოგადად, მოწყენა ჩვეულებრივი ამბავია. ბევრი ბიჭი სწუხს, როცა გოგოს ჰკარგავს”, - დაასრულა მან.

იტალიურ ფეხბურთში მასიმილიანო ალეგრი ერთ-ერთი მთავარი მექალთანეა. აქვე უნდა აღინიშნოს, რომ პირველი სწორედ ის მიდიოდა, ქალებს არასოდეს მიუტოვებიათ... ეს წერილიც სწორედ ალეგრის ამურულ თავგადასავლებს ეძღვნება...


ერიკა

1992 წელს “გაძეტა დელო სპორტი” სკანდალური სათაურით გამოვიდა: “ჩეზარინის ზონა: ფეხბურთელი საცოლეს გაექცა” - ეწერა პოპულარული გაზეთის პირველ გვერდზე. “ჩეზარინის ზონა” იტალიურ საფეხბურთო ენაზე მატჩის “უკანასკნელ წუთებს” ნიშნავს. ეს ტერმინი შემოღებულია 30-იანი წლების “იუვენტუსის” ერთ-ერთი ლიდერის, რენატო ჩეზარინის პატივსაცემად, ვისაც ბოლო წუთებზე ხშირად გაჰქონდა გოლები მოწინააღმდეგეთა კარში...

მასიმილიანო ალეგრის საქციელი მართლაც უცნაური იყო. მან მაშინ მიატოვა საცოლე, როცა ქორწილამდე ძალიან მცირე დრო, სულ რამდენიმე დღე რჩებოდა. მაშინ ის “პესკარაში” თამაშობდა...

ბაკარი სანიას LoveStory. როგორ გამოგლიჯეს ბაკარიმ და სამოდელო სააგენტოებმა ლუდივინი კალათბურთს

მათ ერთმანეთი გაიცნეს მაშინ, როცა ალეგრი 17 წლის იყო. ეს მოხდა ლივორნოში. “ძალიან კარგად მახსოვს ჩვენი გაცნობის დღე. ეს მოხდა ბარში, დისკოთეკაზე... მეგობრებთან ერთად მივედი იქ, ერიკა კი დაქალებთან ერთად დამხვდა. ის იყო ჩემი პირველი სიყვარული”, - იხსენებდა მოგვიანებით ალეგრი.

...7 წლის შემდეგ წყვილმა დაქორწინება გადაწყვიტა. “ყველაფერი შეკვეთილი გვქონდა - საქორწინო ბეჭდები, ტორტი, ცერემონიები... ჩემს ოჯახში ძალიან უყვარდათ ერიკა. ჩვენ ერთად გავიზარდეთ... უცბად გაქრა გრძნობა. ძალიან უხერხულად ვიყავი ამის გამო. ერთხელ, როცა ლიფტში ვიყავით, მე მას ვუთხარი ამის თაობაზე. იყო ბევრი ცრემლი, ერიკა დაეცა, მაგრამ მოვიდა დრო და ჩვენ ყველა შევეგუეთ ამას”.

ერთხელ, ალეგრიმ “ლა რეპუბლიკასთან” ინტერვიუში თქვა: “თუ არსებობს ვნებიანი სიყვარული, დარწმუნებული ვარ, ის სამ წელიწადზე მეტხანს არ გრძელდება. ყოველ შემთხვევაში, ჩემთვის ასეა. მაშინ ბევრი ფიქრი დამჭირდა, სანამ ამ გადაწყვეტილებას მივიღებდი, მაგრამ ეს ჩემი გულის გამოძახილი იყო”.

ჯონ ტერის LoveStory. უცნაური სასიყვარულო სამკუთხედი

ვილენა

მაქსს კაეშანი გადაატანინა 18 წლის ვილენა პასარელოს მკლავებში ნებივრობამ. ვილენა სწორედ მაშინ იწყებდა კარიერას ერთ-ერთ ტელეშოუში. მათ თებერვალში გაიცნეს ერთმანეთი. მაშინ ჯერ კიდევ არ იყო ჩაშლილი ალეგრისა და ერიკას ქორწილი.

“მე საერთოდ არ ვიცოდი, თუ ის ფეხბურთელი იყო. სასიამოვნო ბიჭის შთაბეჭდილება დატოვა, მაშინვე მითხრა, რომ ცოლის მოყვანას აპირებდა. ჩვენ რამდენიმე თვის განმავლობაში ვგიჟობდით. მერე მე სარდინიაზე წავედი დასასვენებლად. დაქალებთან ერთად. როცა დავბრუნდი, მაქსს არაფერი უთხოვნია. მან, უბრალოდ, მიიღო ის, რაც უნდოდა”, - ესაა ციტატა ვილენას ერთ-ერთი ინტერვიუდან.

გავიდა დრო და პესკარას მთავარ გაზეთში გაჩნდა შეყვარებული წყვილის ფოტო, რომელიც ზღვაში ღია იახტაზე სეირნობდა. “ჩვენ 5 წლის განმავლობაში ვიყავით ერთად. მერე ისე მოხდა, რომ დაშორებამ მოგვიწია. არაფერს ვნანობ. მე და ალეგრი დღესაც კი ვსაუბრობთ ხოლმე”, - ამბობს ვილენა.

გლორია

არ ვიცით, მართლა 5 წელიწადს გაგრძელდა თუ არა ვილენასა და ალეგრის შეხვედრები, მაგრამ ფაქტი ისაა, რომ ალეგრიმ 1994 წელს იქორწინა გლორია ჯოიზე. სამი წლის შემდეგ წყვილს შეეძინა ქალიშვილი - ვალენტინა. 1998 წელს ისინი ერთმანეთს დაშორდნენ.
გლორია ძალიან ჩაკეტილი ადამიანია. სამაგიეროდ, უზომოდ პოპულარულია იტალიაში ვალენტინა. ალეგრის ქალიშვილი ხვდება ცნობილ მომღერალ პიერო ბარონეს. ის ამბობს, რომ მშობლების დაშორებას მისთვის ცხოვრება არ გაუმრუდებია.
“16 წლის ვიყავი, როცა მამასთან გადავედი საცხოვრებლად. თავიდანვე შესანიშნავად აგვეწყო ურთიერთობა. ერთადერთი, რასაც ის ჩემგან ითხოვდა, იყო ის, რომ შინ დროულად დავბრუნებულიყავი. მასიმილიანო მოყვარული მამაა”, - ეს მისი ქალიშვილის სიტყვებია.
ვალენტინა ამბობს ასევე, რომ მას კინოს ან თეატრის მსახიობობა უნდა. თანაც ისე, რომ ალეგრის სახელი ფარად არ გამოადგეს: “მე ყველაფერს ჩემით უნდა მივაღწიო”, - ამბობს ის.



კლაუდია

კლაუდია უგას თაობაზე იტალიური მედია ძალიან ცოტას წერს. ამას ალეგრი ასე ხსნის: “მართალია, ჩვენ 8 წლის განმავლობაში ვიყავით ერთად, მაგრამ ეს თემა მედიისთვის მაინცდამაინც საინტერესო არ იყო. საქმე ისაა, რომ მე მაშინ “კალიარისა” და “სასუოლოს” ვწვრთნიდი და დიდად არავის ვაინტერესებდი”.

2011 წელს კლაუდიამ მაქსს შვილი გაუჩანა - ჯორჯო. არადა, წყვილი ჯერ კიდევ შვილის დაბადებამდე დაშორდა ერთმანეთს.

“ყველაფერი დაკავშირებულია ფეხმძიმობის კრიზისთან. საქმე ისაა, რომ მე არ მიღალატია მისთვის. შეიძლება იდიოტი ვარ, მაგრამ მოღალატე - არა”, - ასე ახსნა ალეგრიმ მომხდარი. 2014 წელს, “იუვენტუსის” მიერ მოწყობილ საშობაო კარნავალზე მაქსი მაინც კლაუდიასთან ერთად მივიდა. “მე მას ძალიან მაგრად ვუყვარვარ და მზად არის, ყველაფერი მაპატიოს, რასაც კი ჩავიდენ”, - თქვა მაშინ ალეგრიმ.

ბარბარა?

იტალიურმა მედიამ მაქსისა და კლაუდიას დაშორების ერთ-ერთ მთავარ მიზეზად დასახელა მწვრთნელის რომანი ტელეწამყვან ბარბარა დურკოსთან. “მე ის გავიცანი რესტორანში. მან მითხრა, რომ ძალიან იღბლიანი ადამიანია და აუცილებლად მომიტანს ბედნიერებას. არ ვიცი, მას მართლა მოვწონვარ თუ არა, მაგრამ ჩვენ არაფერი გვქონია. უბრალოდ, მეგობრები ვართ და მეტი არაფერი. შემიძლია ზუსტად გითხრათ, რომ ერთმანეთისთვის არცკი გვიკოცნია”, - თქვა ბარბარამ 2015 წელს.



ისევ გლორია

2012 წელს ალეგრიმ კვლავ “ააფეთქა” იტალიური სპორტული პრესა. ცნობილი გახდა მისი რომანის შესახებ ტელეწამყვან გლორია პატრიცისთან. ყველაზე საინტერესო ის იყო, რომ გლორია თავის ახალ “კავალერზე” მთელი 18 წლით უმცროსი გახლდათ და შვილად უფრო ერგებოდა, ვიდრე სარეცელის გამზიარებლად.

ისინი ერთმანეთს 2014 წლის ჩათვლით ხვდებოდნენ. ალეგრიმ გაიცნო გოგონას მშობლები. მედიამ დაადგინა, რომ საყვარელს მაქსმა 300 წითელი ვარდი უყიდა დიდი სიყვარულის ნიშნად. სწორედ გლორიამ დააწყნარა მაქსი მაშინ, როცა “მილანიდან” გააგდეს.

როდის დაშორდნენ ისინი ერთმანეთს? ამის თაობაზე იტალიურ მედიაში ზუსტი ცნობა არ მოიპოვება. ბევრი მიიჩნევს, რომ დაშორების მიზეზი “იუვენტუსის” ფანები იყვნენ, რადგან ერთ-ერთ ძველ ინტერვიუში გლორიამ მასიმოს გუნდს “იტალიის სირცხვილი” უწოდა.

ამბრა

ბევრი მიიჩნევს, რომ ყველაფერი დაიწყო 2017 წელს, ჩემპიონთა ლიგის ფინალში წაგების შემდეგ, როცა ალეგრი დასასვენებლად გაემგზავრა კურორტზე. ის იქ 40 წლის ამბრა ანჯოლინისთან ერთად ისვენებდა. ის იტალიაში ძალიან ცნობილი მომღერალი, მსახიობი, წამყვანი გახლავთ...

ამბრამ მოაჯადოვა ალეგრი. ის საქორწინო ბეჭედსაც ატარებს და მისი თქმით, მას ეს ბეჭედი სწორედ ამბრამ აჩუქა. ქალს შესანიშნავი ურთიერთობა აქვს ალეგრის ქალიშვილთან. იტალიური მედია ამტკიცებს, რომ იანვრის შემდეგ ამბრა ბავშვს ელოდება...

ყოველდღიური სპორტული გაზეთი "ლელო"
3811
მკითხველის კომენტარები / 0 /
მსგავსი ამბები
რუბრიკის სხვა სიახლეები
;