გიორგი ქოჩორაშვილი 'ტოტენჰემსა' და ესპანეთში დარჩენაზე

"ლელოს" მკითხველმა უკვე იცის, რომ გიორგი ქოჩორაშვილმა ესპანური ლა ლიგის "ჟირონას" ფორმა ზედიზედ მეორედ მოირგო.

ამჯერად, "საბურთალოს" აღზრდილმა ნახევარმცველმა ესპანელთა მთავარ გუნდში ლონდონის "ტოტენჰემის" წინააღმდეგ ითამაშა.

19 წლის ქოჩორაშვილს, რომელიც ერთი წელი "ჟირონას" დუბლშემადგენლობაში თამაშობდა, ზედიზედ მეორე შეხვედრაში მიეცა პირველ გუნდში ადგილის დამკვიდრების შანსი, თუმცა არცთუ დიდი - "ტოტენჰემთან" მან მოედანზე ბოლო 5 წუთი დაყო.

ამ ამხანაგური მატჩის ფავორიტები, რა თქმა უნდა, ბრიტანელები იყვნენ და დებიუტში დაწინაურდნენ კიდეც, მაგრამ შემდეგ მხოლოდ "ჟირონას" გაჰქონდა გოლები და საბოლოოდ, კატალონიურმა კლუბმა 4:1 გაიმარჯვა.

"ლელო" ესპანეთში დაუკავშირდა გიორგი ქოჩორაშვილს და მცირე ინტერვიუ ჩაწერა...

- ძალიან კარგი ამბავია ჩვენი გულშემატკივრისთვის - აღარც გვახსოვს, ესპანური ლა ლიგის გუნდში ქართველმა ბოლოს როდის ითამაშა...

- რა თქმა უნდა, ძალიან გახარებული ვარ. 19-წლამდელთა ევროპის ჩემპიონატზე, რომელიც საქართველოში გაიმართა, გარკვეული გამოცდილება დამიგროვდა და ეს ძალიან მეხმარება.

- "ტოტენჰემმა" ძირითადი შემადგენლობით ითამაშა?

- ინგლისელებს ჩვენს სტადიონზე ვეთამაშეთ. მე ბოლო წუთებზე შემიშვეს მოედანზე, "ტოტენჰემს" კი ძირითადი შემადგენლობის რამდენიმე ფეხბურთელი ჰყავდა - ბენ დევისი, სერჟ ორიე, ლუკას მოურა, სონი, ფერნანდო ლორენტე... მაგრამ უფრო მეტნი იყვნენ სათადარიგო გუნდის ახალგაზრდა ფეხბურთელები.

- რა შანსია იმისი, რომ მომავალი სეზონი "ჟირონას" მთავარ გუნდში ჩაატაროთ?

- რაც შეეხება ლა ლიგაში თამაშს, ალბათ, შანსი მომეცემა, მაგრამ მთლიანი სეზონის ჩასატარებლად მზად ჯერ არ ვარ, შეგუება მჭირდება. ამ ერთ წელსაც ძირითადად მეორე გუნდში გავატარებ, რომელიც არცთუ ისე იოლ ჩემპიონატში თამაშობს. ვეცდები, შანსი გამოვიყენო - ესპანეთის თასი იქნება ეს თუ ლიგის სხვა თამაში.

- ინგლისური გრანდის წინააღმდეგ თამაშზე რას იტყვით?

- საერთოდ, "ჟირონა" საკმაოდ მშვიდად და ცივი გონებით მოქმედებდა, რითაც ინგლისელები ძალიან გაკვირვებულები დარჩნენ. 10 წუთის განმავლობაში დავალება მქონდა, რომ ბურთი შემენარჩუნებინა და შანსი თუ მომეცემოდა, გამჭოლი გადაცემები გამეკეთებინა... საბედნიეროდ, ყველაფერმა კარგად ჩაირა.

- "საბურთალომ" ესპანეთში იჯარით გაგიშვათ. ახლაც ამ პირობით თამაშობთ "ჟირონაში" თუ კატალონიელებმა ტრანსფერი გამოისყიდეს?

- ჯერ ისევ იჯარით. ამისთვის "ჟირონამ" "საბურთალოს" გარკვეული თანხა წელსაც უნდა გადაუხადოს, თუ ჩემს დატოვებას გადაწყვეტენ. ვნახოთ, რა და როგორ იქნება. მთავარია, ნდობას ვგრძნობ და ეს ძალიან მახარებს.

ყოველდღიური სპორტული გაზეთი "ლელო"
665
მკითხველის კომენტარები / 0 /
მსგავსი ამბები
რუბრიკის სხვა სიახლეები