მთელი დიასპორა ყაზანში - რუბინი ქართველების გარშემო

თემის დასაწყისი: როგორ ნანობენ ლოკომოტივში კვარაცხელიას დაკარგვას... ქართველი ტალანტის ტრანსფერი შიდა ომებს შეეწირა?

“ტრანსფერმარკტის” ცნობით, ყაზანის “რუბინმა” ხვიჩა კვარაცხელია უკვე დაიმატა და პლუს, 21 წლის ბექა მიქელთაძე, რომელიც ბოლოს კვიპროსის (ფამაგუსტა) “ანორთოსისში” თამაშობდა.

ქართველების თემას წერილი ინტერნეტგამოცემა “სპორტბიზნესონლაინმაც” მიუძღვნა...

“ყაზანში შვიდი ახალწვეული დაიმატეს. ოფიციალურად წარდგენილი ბოლო ფეხბურთელი 18 წლის ქართველი შემტევი ნახევარმცველი ზურიკო დავითაშვილია. მაგრამ გუნდი ამაზე არ ჩერდება. ყაზანში მთელი დიასპორა მიდის - “რუბინი” ახალი სეზონის ტრანსფერის კამპანიას განაგრძობს.

კვარაცხელიას წასვლით სიომინმა სინანული არ დამალა და ისიც თქვა, რომ ცრემლი მოერია. ფეხბურთელის ბანაკში განწყობის მოულოდნელი შეცვლით “ლოკომოტივის” სხვა ხელმძღვანელებიც გაოცებულები დარჩნენ. ამ ამბავში ყველაზე საინტერესო “ლოკომოტივის” გენერალური დირექტორის ვასილი კიკნაძის კომენტარი იყო, რომელმაც ყველაზე მნიშვნელოვანი ამბავი გაამხილა”, - წერს გამოცემა.

“სპორტბიზნესონლაინმა” სააგენტო ტასს-თან ინტერვიუში ვასილ კიკნაძის ნათქვამი მოიშველია: “მენეჯერმა თავისი კლიენტისთვის ბოლო ორ დღეში ახალი კლუბი მოძებნა, რომლის შეთავაზებაშიც მნიშვნელოვნად უფრო მაღალი პირობები იყო, ვიდრე - ჩვენი. “ლოკომოტივმა” ჩათვალა, რომ ასეთი პირობების შეთავაზება ჩვენ არ შეგვეძლო”.

ინსტაგრამზე ფეხბურთელმა მოსკოველი გულშემატკივრებისა და კლუბის მიმართ მადლიერება გამოხატა. მაგრამ აღნიშნა, რომ “ლოკომოტივიდან” წასვლა მისთვისაც მოულოდნელი იყო.

“ვიცოდი, რომ მთელი სეზონი “ლოკომოტივში” ვითამაშებდი და ეს მახარებდა. მაგრამ, სამწუხაროდ, ასე არ გამოვიდა”, - წერს კვარაცხელია.

“ქართველს სინანებელი მართლაც აქვს. გასული სეზონის შედეგების მიხედვით “ლოკომოტივმა” ჩემპიონთა ლიგის ჯგუფურ ეტაპზე მონაწილეობის უფლება მიიღო. სიომინს ხვიჩა მოეწონა და, სავარაუდოდ, მთავარი მწვრთნელი მას მთავარ ევროპულ ტურნირზე თამაშის შანსს მისცემდა... ამის ნაცვლად, აგენტებმა უფრო ხელსაყრელ გარიგებას “რუბინთან” მიაღწიეს და ახლა ქართველი ყაზანში სათამაშოდ ემზადება, სადაც მეგობარი - ზუკა დავითაშვილი ელოდება.

თუ საბოლოოდ მისი იმედები გამართლდება, “რუბინი” არა მარტო საქართველოს ერთ-ერთ მთავარ ტალანტს მიიღებს, არამედ, მომავლისთვის მაღალხარისხიან ინვესტიციასაც გააკეთებს. გარდა ამისა, ყაზანში მას აუცილებლად ექნება სათამაშო დრო. რომან შარონოვის გუნდში ფლანგის შემტევების აშკარა დეფიციტია. ახალგაზრდულ გუნდში ის 4-3-3 სქემას იყენებდა, სადაც ფლანგის სწრაფი მოთამაშეების როლი მნიშვნელოვანია. კვარაცხელია ზუსტად ასეთია”, - ვკითხულობთ წერილში.

“სპორტბიზნესონლაინი” ასკვნის, რომ ამ ვითარებაში “ლოკომოტივი” დაზარალებული მხარეა: “კლუბმა კვარაცხელია დიდი ფეხბურთისთვის უფასოდ მოამზადა და ახლა იძულებულია, დაემშვიდობოს მას. ამიტომ, სიომინის ცრემლები გასაგებია. მაგრამ საფეხბურთო ბაზრის რეალობა ასეთია. ამ საკითხის შესახებ “რუბინმა” კომენტარი არ გააკეთა. თუმცა, “ტრანსფერმარკტმა” კვარაცხელია “რუბინში” უკვე “ჩარიცხა”. ავტორიტეტული გერმანული პორტალის შეფასებით, 18 წლის შემტევის სატრანსფერო ფასი 900 ათასი ევროა, თუმცა ვებგვერდზე მისი გადასვლის გრაფაში წერია, რომ “რუსთავი” თავისუფალი აგენტის სტატუსით დატოვა”.

საინტერესოა, რომ ერთ-ერთი ყველაზე ნიჭიერი ქართველი მოთამაშე რუსულ კლუბში გადავიდა და (რუსული გამოცემის მტკიცებით) ამით “რუსთავმა” ვერაფერი მიიღო. “სპორტბიზნესონლაინი” წერს, რომ “რუბინს” მალე ბექა მიქელთაძეც შეუერთდება (რაზეც “ლელო” უკვე წერდა - რედ), რომელიც სავიზო პრობლემების მოგვარებას ელოდება. რუსული გამოცემა დასტურად სწორედ “ლელოსთან” ფეხბურთელის ინტერვიუს იშველიებს.

“ყაზანის “რუბინს” ქართველ ფეხბურთელებთან განსაკუთრებული ურთიერთობა აქვს. მათი წვლილი კლუბის მთავარ წარმატებებში ყოველთვის მნიშვნელოვანი იყო. ყაზანში თამაშობდნენ ლევან სილაგაძე და დავით ჩალაძე, რომელმაც პირველ ლიგაში 20 გოლი გაიტანა.

“ოქროს” წლებში იყვნენ ლაშა სალუქვაძე და დათო კვირკველია. სალუქვაძე ზოგადად რუბინის ერთ-ერთი სიმბოლოც გახდა. ლაშამ მნიშვნელოვანი როლი შეასრულა ორივე ჩემპიონობასა და “ბარსელონასთან” ლეგენდარულ მატჩში, რომელიც ყაზანელებმა “კამპ ნოუზე” 2:1 მოიგეს. კლუბის უკანასკნელი ქართველი საბა კვირკველია იყო, რომელმაც 2017/18 წლების სეზონში რუსეთის ჩემპიონატის “ოქრო” “ლოკომოტივში” მოიგო და რუსეთის საფეხბურთო კავშირის ვერსიით, ჩემპიონატის ორიდან ერთი საუკეთესო ცენტრალური მცველი გახდა.

მისი წასვლის შემდეგ “რუბინმა” ჩემპიონატში გამოსვლის ანტირეკორდი დაამყარა. შესაძლოა, დაწინაურებისთვის “რუბინს” ქართველები არ ჰყოფნიდა. ერთი უკვე გუნდშია, ორიც - გზაში”.

ყოველდღიური სპორტული გაზეთი "ლელო"
1483
მკითხველის კომენტარები / 0 /
მსგავსი ამბები
რუბრიკის სხვა სიახლეები
;